مدينة نصر, Cairo_360_cairo_by_area - كايرو 360
القاهرة بالمناطق

مدينة نصر

مدينة نصر

مدينة نصر أقدم حي حديث لو ينفع نقول كده. كان النبتة الأولى لتعمير قطاع كبير من الأراضي الفضاء في شرق القاهرة، ووصل الأمر أن المدن السكنية الجديدة اللي كانت جزء من حي مدينة نصر في بداية عهدها اقتربت بحدودها تقريبًا من مدينة السويس، لدرجة أن مدينة نصر اللي كانت من ضواحي القاهرة لما تم تخطيطها في نهاية الخمسينيات من القرن الماضي أصبحت دلوقتي "وسط البلد" بعد ما وصل الزحف العمراني لعشرات الكيلومترات بعد شوارعها الرئيسية اللي تم تخطيطها في البداية.

مدينة نصر كان اسمها في الأصل "مدينة ناصر" نسبة لجمال عبد الناصر اللي تم إنشاءها في عهده ضمن برنامج التوسع العمراني بعد ما كان اسم المنطقة زمان "صحراء العباسية"، والحي يعتبر الأكبر من حيث المساحة في القاهرة ومساحته حوالي 250 كم مربع وتم إنشاؤه بطريقة جديدة معاصرة وهي الشوارع المتوازية والمتقاطعة بدون أي ميادين. وتم تحريف الاسم فيما بعد لـ "مدينة نصر" ربما لأسباب سياسية، لكن لا يزال فيه ناس من اللي أعمارهم فوق الخمسين أو المعتزين جدًا باشتراكيتهم أو بحقبة عبد الناصر بـ يقولوا عليها مدينة ناصر.

التقاطعات الكثير واللفات الموجودة في كل الشوارع (U Turn) جعلت مدينة نصر مزدحمة بنسبة كبيرة من أول الساعات الأولى في الصباح لحد قبل منتصف الليل، وبـ تزداد الكثافة المرورية عند مواقف الميكروباصات ومحطات الأتوبيس وعند بداية كل شارع رئيسي. طريق النصر أو الأوتوستراد هو الشريان الرئيسي للحي ومنه تقدر توصل لأي شارع كبير في مدينة نصر زي مجموعة الشوارع المتوازية: شارع الطيران وعباس العقاد ومكرم عبيد وحسن المأمون وأحمد فخري.

الحي مقسم لمناطق بأرقام زي الحي السادس والسابع وهكذا، لكن الغريب أن إحنا ما نعرفش فين الحي الأول والثاني مثلًا، البداية من السادس على طول!

المواصلات العامة بـ توصل لمدينة نصر من كل أحياء القاهرة، أشهر أماكن ممكن نقطة تلاقي هناك هم مسجد رابعة العدوية، وأول شارعي عباس العقاد ومكرم عبيد وكلهم على طريق النصر. وفي المقابل فيه مواقف في الحي السابع والعاشر وزهراء مدينة نصر لكل مناطق القاهرة الجديدة والشروق، وبعربيتك ممكن تقطع المسافات على أطراف مدينة نصر بسرعة لأن الكثافة فيها لسه مش زي وسط القاهرة. وفيه ترام بـ يمر بطول شارع مصطفى النحاس قادم من مصر الجديدة وده أبطأ من أن نعتمد عليه أو ننتظره. بس مدينة نصر أرض الميكروباصات؛ بـ تروح أمام كل بيت وفي أي وقت.

الخروج في مدينة نصر يناسب الكل؛ شباب وعائلات وأطفال، الأماكن مش هـ تخرج عن شارعي عباس العقاد ومكرم عبيد وما حولهم، كل الكافيهات والمطاعم المشهورة موجودة هناك، وعدد مهول من محلات الملابس والأثاثات والمفروشات والإلكترونيات، وفي مدينة نصر أكبر عدد من المراكز التجارية في القاهرة: "طيبة مول" و"العقاد مول" و"سيتي سنتر" و"السراج سيتي مول" و"جنينة مول" و"الميركاتو" وعلى الحدود مع مصر الجديدة موجود المول الأهم "سيتي ستارز".

وطبعًا معظم المولات دي فيها دور سينما، وبـ يتميز جنينة مول عن الباقين أنه فيه ساحة تزلج على الجليد. وفي امتداد شارع عباس العقاد فيه الحديقة الدولية اللي كانت أحلى فسحة في القاهرة في بداية التسعينيات وبجوارها مركز «وندرلاند» الترفيهي اللي فيه ملاهي ودور سينما ومحلات ومطاعم.

عدد من أهم المباني والمنشآت الحيوية موجود على أرض مدينة نصر، منها ستاد القاهرة الدولي على طريق صلاح سالم، ومركز القاهرة للمؤتمرات وأرض المعارض والنصب التذكاري للجندي المجهول والمنصة على طريق النصر وعدد من دور ونوادي القوات المسلحة اللي بـ يتعمل فيها المناسبات والأفراح زي دور "المدرعات" و"المشاة" و"المدفعية" ومساجد الشرطة وآل رشدان ورابعة العدوية، ومباني حكومية زي هيئة الاستعلامات ووزارات الدفاع والاستثمار والقوى العاملة، ونوادي رياضية كبيرة زي الأهلي والزهور والجيش ومدينة نصر، وجامعة عريقة هي جامعة الأزهر. والفنادق اللي لها أسماء رنانة مش كثير هنا، الأشهر هو فندق "سونيستا" الموجود في أول شارع الطيران من ناحية طريق صلاح سالم، فيه فنادق تابعة للقوات المسلحة والشرطة زي فندق "الماسة" و"تريومف" و"إيزيس".

المراكز الثقافية والأحداث الفنية قليلة جدًا في مدينة نصر، ونادرًا لما بـ نلاقي حد من المشاهير أو الفنانين عايش هناك، ويمكن ده لأن الحي حديث نسبيًا، لكن بـ يشفع له وجود عدد كبير من ستوديوهات الصوت والمكتبات وفعاليات ثقافية من وقت للثاني في مركز المؤتمرات أو أرض المعارض اللي بـ يُنظم فيها معرض القاهرة الدولي للكتاب في بداية كل عام، وعدد من مهرجانات التسوق ومعارض السيارات على مدار العام.

مدينة نصر مكان جميل تسكن فيه وتتفسح فيه وتشتغل فيه كمان، لسه أسعار السكن معقولة في بعض مناطق مدينة نصر، وفيها عدد لا نهائي من الشركات والهيئات اللي فيها جيوش من الموظفين، يعني أكيد هـ تكون واحد من اللي اشتغلوا في مدينة نصر في يوم من الأيام.

الخريطه
الأبرز
مطاعم
إسكندراني: التطور الطبيعي للكبدة والسجق في مدينة نصر

إسكندراني: التطور الطبيعي للكبدة والسجق في مدينة نصر

من ثلاث سنين، كانت زيارتنا الأولى لمطعم إسكندراني، شهرته وقتها كانت أكبر ساندوتش كبدة في مصر، التجربة كانت لطيفة، خلال السنين اللي بعد كده المطعم تطور وشهرته زادت بتفوقه في أصناف ثانية زي غير ساندوتشات الكبدة والسجق والمكرونات. من الأصناف الجديدة اللي أضافها المطعم وطورها وبقت الموضة الجديدة بتاعته هي الحواوشي الإسكندراني والحواوشي الإسكندراني وش بيتزا (عبارة عن الحواوشي الاسكندراني العادي وعليه إضافات البيتزا زي الموتزاريلا وغيره)، كمان تطوير أطباق المكرونات اللي بقى فيها أفتكاسات زي الباشاميلو والنجرسكو بسدق (سجق) الفراخ، كمان أطباق الكبدة والسدق بس. المطعم ما اكتفاش بتطوير المنيو وأصناف الأكل بس، كمان طور في الديكور ومساحته الداخلية، المساحة بقت أكبر وبقى فيه حوالي 6 ترابيزات تكفي 3 – 4 أشخاص وبقى فيه شاشة تليفزيون وموسيقى خفيفة شغالة. جربنا قبل كده الحواوشي الإسكندراني قبل كده في بلده، قررنا نجرب حاجة غريبة وجديدة ونختبر إسكندراني فيها، من المنيو اللطيفة اختارنا حواوشي إسكندراني (وش بيتزا) مشكل لحوم سبايسي (39.50 جنيه) مع باكيت بطاطس وسط (7.50 جنيه) وزجاجة مياه (3.75 جنيه)، فترة انتظار حوالي 25 دقيقة وكان الحواوشي الجميل جاي موحوح (يعني سخن وبيطلع بخار) والرائحة طبعًا حاجة حلوة خالص. الحواوشي كان سخن جدًا لدرجة إننا قعدنا نرغي شوية عقبال ما يهدى شوية، عجينة ظريفة مش سميكة ولا رفيعة محشوة لحم مفرومة وبسطرمة وسجق ومن فوق طماطم وفلفل حار وشطة، مع البطاطس المحمرة اللطيفة هي كانت بس مالحة شوية لكنها كويسة، استمتعنا بالحواوشي الإسكندراني (أو زي ما بيقول واحد صاحبنا بيتزا شرقي) والوقت اللطيف اللي قضيناه في إسكندراني. مطعم إسكندراني (ماشاء الله) من المطاعم اللي بتطور من نفسها وبتهتم بجودة منتجاتها وخصوصًا أنه بيتعامل مع سلعة من أكثر السلع اللي عليها كلام اليومين دول وهي اللحمة، كمان أن أسعاره ما تعتبرش غالية قوي ومنطقية بالنسبة للي بيقدمه، والناس اللي بتشتغل فيه كويسين ولا يقل مستواهم عن مستوى المطعم المميز.
كافيهات
كلاسيك روك كوفي كو: كافيه أمريكاني مستخبي في سيتي ستارز

كلاسيك روك كوفي كو: كافيه أمريكاني مستخبي في سيتي ستارز

مكملين معاكم جولتنا المثيرة وسط مطاعم القاهرة، وصحيح في مطاعم محلية بتحاول تنافس بأفكار جديدة، كل يوم بنشوف ظهور قوي لسلاسل عالمية بتدخل على الساحة وتغير من خريطة مطاعم القاهرة. من الأماكن دي كلاسيك روك كافيه كو، وهو كافيه أمريكاني موجود داخل مطعم اسمه "الجراج" في سيتي ستارز. زي ما قولنا، كلاسيك روك كوفي كو بيشترك في المكان مع مطعم الجراج جنب مكتب حجز تذاكر سينما سيتي ستارز في الدور الخامس، وشكل الديكورات هناك يغلب عليه صور الدراجات، مرسومة بالجرافيتي على الحيطان، وأول لما تدخل بتقابلك دراجة حقيقية عند المدخل، أما الموسيقى فكانت روك هادئة، والمنيوهات مرسوم فيها صور للجيتار. طبعًا أنتم عارفينا كويس، لازم نستكشف المكانين ونشوف بيقدموا إيه، وعلشان كده قررنا نطلب الأكل من الجراج ونجرب مشروبات كلاسيك روك أند كو. بعد جولة استكشافية في منيو الجراج، اللي تشكيلة أطباقها من مطابخ عالمية زي البرجر والبيتزا وأكل صيني وإيطالي، حسينا بخوف شوية لأن المطعم مش متخصص في نوع معين من الأكل، فقررنا نخلي الموضوع بسيط ونفتح شهيتنا بنينجا فينجرز (39 جنيه) وبالنسبة للأطباق الرئيسية طلبنا جراج برجر (39 جنيه) ورويال ستار برجر (39 جنيه) ومعاه كوكتيل بطاطس الجراج (19 جنيه لكل طبق). النينجا فينجرز عبارة عن أربع قطع ستربس فراخ مقلية وطرية مقرمشة ولذيذة من بره، لكن أول ما تدخل على الفراخ نفسها فالطبقة المقرمشة بتتكسر وكمان بتقع من على الفراخ لو فكرت تغمسها في صوص الهاني ماسطرد. شوية صغيرين ووصل البرجر والبطاطس. كوكتيل البطاطس كان عبارة عن طبق بطاطس صغير، تقدر تقول أنه طبق تشيلي تشيز فرايز، متغطية بالجبنة مع كمية قليلة جدًا من اللحم المفروم، والحقيقة إننا ماشوفناش الفاصوليا الحمراء كأن الشيف مش عايزنا نجربها. الطبق عمومًا كان عادي جدًا. طعم الجراج برجر المكون من قطعة برجر كبيرة محشية جبنة موتزاريلا وعليها خس وطماطم ومخلل وصوص مخصوص على حسب كلام المنيو ماكانش لطيف، ومافيش أصلًا أي وجود للموتزاريلا، وحتى العيش كان عادي جدًا. أما الرويال ستار برجر فكان عبارة عن قطعتين برجر ومعاهم نفس إضافات الجراج برجر وطلبنا منهم يضيفوا بيف بيكون علشان يعمل طعم مميز للساندويتش. المشكلة أن طعم البرجر كان سيء زي اللي فات بالضبط ومافيش حاجة ممكن تصلحه. لحسن حظنا وصل الميلك شيك من كلاسيك روك كوفي كو علشان يلحقنا. الشوكولاتة بزبدة الفول السوداني (26 جنيه) كان لوحة فنية بصراحة، والطعم الجميل لبولة الآيس كريم شوكولاتة مع نكهة زبدة الفول السوداني اللذيذة عملوا تركيبة خرافية مالهاش حل. نروح على Purple People Eater (26 جنيه) المنعش خصوصًا مع الطعم اللاذع المميز للبلو بيري مع الموز اللي عملوا طعم رائع للعصير. خلصت الحكاية مع Full Tank of Sundae (36 جنيه)، وهو عبارة عن ثلاث بولات آيس كريم فانيليا وشوكولاتة وفراولة كانوا هايلين رغم أنهم وصلوا من غير صوص الشوكولاتة/الكراميل اللي قالوا عليه في المنيو. عمومًا، تجربتنا مع ساندويتشات برجر الجراج كانت سيئة، والمكان من وجهة نظرنا محتاج وقت علشان يرفع من جودة أطباقه ويحددوا شكل معين للمكان. لو بعدنا عن روعة الميلك شيك والحلويات عند كلاسيك روك كوفي كو – وهي السبب الحقيقي لزيارتنا – نقدر نقول أنهم قدموا نكهات مميزة قدرت تنقذ يومنا هناك وأكيد هنرجع لهم في زيارة ثانية قريب.
فن وثقافة
مركز الإبداع المصري: عندهم كل حاجة

مركز الإبداع المصري: عندهم كل حاجة

مجموعة قررت تعمل شغل جديد، بفكر جديد، وتجمع كل اللي نفسك فيه، علشان تلاقيه في مكان واحد، سموا نفسهم مركز الإبداع المصري. هناك مكان مفتوح لكل الناس، واسع مفروش حلو، وفيه تجهيزات لكل أنواع الورش والمحاضرات، علشان الناس تبقى مبسوطة، تعالوا نعيش مع اللي بيقدموه. بيقدموا إيه؟ كورسات التنمية البشرية واللي فيها هتتعلم، إزاي تطور من مهاراتك، وتجدد حياتك، علشان تبقى الشخص اللي أنت عايزه، وكمان هتتعلم تتخطى المقابلة الصعبة اللي كلنا بنخاف منها، المقابلة الشخصية لعمل جديد. ورش العمل Communication Skills Time Management Basic Leadership وكمان فيه كورسات في إدارة الموارد البشرية، خدمة العملاء، أما بقى HR package، فدي دبلومة بتأهل حديثي التخرج لسوق العمل، والناس اللي عايزة تغير مسار عملها. وفيه حاجة اسمها Business Administration، دي بقى منحة سنه أولى شغل والهدف منها، متابعة الناس اللي اشتغلوا علشان يزودوا من مهاراتهم، ويتحملوا ضغوط العمل، ويسوقوا لنفسهم صح، بمعنى أصح علشان يشتغل بأسلوب علمي مدروس. أما لو كنت بتفكر في المبيعات والتسويق، يبقى أنت هناك هتروح علشان تحضر محاضرات وندوات وورش عمل حوالين مفهوم التسويق وطرقه المختلفة، وتتعرف على أهميته. حاجات منسية مانسيوش المحاسبة ووضعوها في الحسبان فعملوا كورسات المحاسبة، وكمان كورسات القانون، اللي فيها بتدرس الاستشارات القانونية، وتأمين قانون العمل المصري والتأمينات الاجتماعية، وكشف التزيف والتزوير للعملات وعندهم كورس التحليل المالي المتقدم باستخدام برنامج الإكسل، وكورسات في التصوير الفوتوغرافي والفوتوشوب للكبار الأطفال، وكتابة السيناريو، والصحافة والتلفزيون، استشارات زوجيه وتنمية أسرية، ومهارات البحث العلمي، والتفوق الدراسي لطلاب المدارس والجامعات، واللغات المختلفة. الجديد أما بقى الجديد جدًا هناك فهو الكورسات الخاصة بالسيدات، كورس ميك أب، ورش عمل صناعة الإكسسوارات، رياضه وصحة. زوروهم واستمتعوا بالندوات والورش والمحاضرات والكورسات اللي بيعملوها في مدينة نصر.
تسوق
شو رووم: أرخص أسعار أحذية وشنط في سيتي ستارز

شو رووم: أرخص أسعار أحذية وشنط في سيتي ستارز

محلات كثيرة وماركات معروفة جدًا بـ نحتار ما بينهم في مكان زي سيتي ستارز، ما بين الجودة والشكل والسعر وكل ده متوفر في محل "شو رووم – Shoe Room". مبدأيًا، كان عنده مجموعة شنط مميزة صغيرة مربعة ومستطيلة سادة وللسهر، بس أكثر حاجة عجبتنا كانت شنطة للظهر، مليانة زخرفة هندي وورود ملونة أحمر وروز وأزرق وأسود وأصفر في شكل صفوف كل صف لون، ده مقدمة الشنطة أو واجهتها، لكن النصف الثاني فيه زخرفة زرقاء على شكل ورود خفيفة بـ 200 جنيه. وكان فيه شنطة مربعة فضي وأسود وكل الألوان فيها خطوط من الأمام وتنفع لبعض الظهر، كمان كان فيه شنطة قماش كلها ألوان مبهجة وزخارف هندي وتنفع للبحر بـ 150 جنيه، وكان فيه مجموعة شنط صغيرة جدًا، فيها سوستتين من فوق ولها ذراع طويل ذهبي، ومنها كل الألوان وكانت بـ 185 جنيه بس أكثر لون عجبنا اللون الروز، وأغلب الشنط يبدأ من 150 وينتهي لـ 300 جنيه. أما مجموعة الأحذية، فأول حاجة لفتت نظرنا كانت أحذية عادية قماش مغطي نصف الرجل بـ 140 جنيه و فيه منها كل الألوان. ونوع زيها بس كله ألوان هندي نفس قماشة الشنطة خطوط وورود بكل الألوان بـ 140 جنيه برضه، وكمان كان فيه باليرينات عادية فيها فيونكة من فوق والقماشة بتاعتها جلد وفيها خيوط مخيطة فيها زي الجاكيت الجلد وكانت بـ 120 جنيه، ده غير السابوهات اللي بصوباع واللي كروس وكميات الباليرينا بأشكالها المختلفة واللي أسعارها مش غالية. كمان مجموعة باليرينا سادة، طرفها بس على شكل مثلث ذهبي في منها كل الألوان، بـ 130 جنيه. وعنده برضه مجموعة تالونات High Heels منها واحد مفتوحة من الأمام على شكل نصف دائرة صغيرة، وعليه سلسلة ذهبي على شكل ضفيرة كبيرة بـ 130 جنيه، وفي منها كل الألوان برضه. وواحدة ثانية عادية وعلى طرفها مثلث صغير جدًا ذهبي وبنفس السعر. أهم حاجة في محل الأحذية والشنط أن يكون أسعاره حلوة وذوقه حلو، وده متوفر في Shoe Room.
صحة ولياقة
كوكيت مديكال سبا: جلسات دلع وبعروض مغرية فى مدينة نصر

كوكيت مديكال سبا: جلسات دلع وبعروض مغرية فى مدينة نصر

أحيانًا بـ نبقى محتاجين أننا نفصل من كل حاجة ونحاول نعمل Refresh علشان نقدر نرجع نتواصل مرة ثانية مع أعباء الحياة، وفيه طرق كثيرة طبعًا علشان نعمل كده، وكل شخص له طريقة معينة أو حاجة بـ يحبها لما بـ يعملها بـ تجدد نشاطه مرة ثانية، بس الشائع أن أغلب البنات لما بـ تحب تجدد نشاطها غالبًا بـ يحاولوا يعملوا لوك جديد أو يروحوا أي مكان يكون مناسب للاسترخاء وتغيير الحالة المزاجية. وده اللى إحنا عملناه لما حبينا نفصل شوية فكرنا أننا ندور على سبا ونحاول نعمل شوية تغييرات تحسن حالتنا المزاجية، وبالصدفة عرفنا "كوكيت ميديكال سبا" في مدينة نصر. أول ما دخلنا كوكيت ميديكال سبا لفت نظرنا أن المكان كبير وشيك جدًا، اللى جهز المكان أكيد ذوق نسائى لأنه رقيق جدًا، وتم استقبالنا من القائمات على المكان كأننا من رواد السبا من سنين وده خلانا نأخذ على الجو بسرعة. كان في حسابنا أننا رايحين لأهداف معينة بس لما موظفة الاستقبال عرضت علينا العروض اللى بـ يقدمها كوكيت، غيرنا رأينا واختارنا جلسة "نيتوياج" وهى عبارة عن عرض (لفترة محدودة لحد آخر الشهر الجاى) تنظيف عميق+ تفتيح لون البشرة + تحفيز وشد البشرة بالتيار الجلفاني + علاج حب الشباب في جلسة واحدة + جلسة إزالة الشعر من منطقة الشارب بالليزر(سعر الجلسة 175 جنيه)،وفاء اللى نفذت الجلسة كانت شاطرة جدًا ولطيفة. وجربنا كمان الحمام المغربى وكان مختلف عن أى مكان ثانى، كان فيه اهتمام شديد يعنى مثلاً بـ يتم عمل حمام كريم للشعر علشان الساونا ما تضرش الشعر وحاجات ثانية كثير بـ تدل على مدى اهتمامهم وعنايتهم بعملائهم.. وندى شاطرة جدًا فى الحمام المغربى. وطبعًا عرفنا عروض كثير منها مثلاً عرض العروسة وبـ يكون عبارة عن كل ما تحتاجه العروسة من عناية بجسمها وبشرتها وشعرها (سعر العرض 925 جنيه). من أفضل ميزات كوكيت ميديكال سبا أن فيه احترام شديد للخصوصية ومكان مناسب للمحجبات والمنتقبات لأن كل العاملات بنات وبـ يتعودوا على الزبائن من أول زيارة للسبا وبـ يحسسوا كل بنت أنها أميرة وبـ يتعاملوا باهتمام شديد حتى فى متابعة الحجز، وكل جلسة بـ تأخذ وقت كافى جدًا ولازم نكون إحنا راضيين عن أداءهم.. هو ده اللى حسيناه. الشيء الوحيد اللى كان مزعج بالنسبة لنا هو بُعد المكان خصوصًا أن ما كانش معانا عربية والمكان فى مدينة نصر، وعامة فيه مكان مناسب لركن العربيات.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

5 حاجات تخليك لازم تحب #القاهرة!

الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة ح