القاهرة الجديدة, Cairo_360_cairo_by_area - كايرو 360
القاهرة بالمناطق

القاهرة الجديدة

القاهرة الجديدة

القاهرة الجديدة القاهرة الجديدة، زي ما اسمها بـ يدل هي فعلًا أحدث أحياء العاصمة، موجودة على مساحة عملاقة كانت في وقت قريب جدًا كلها صحارى تابعة لحي مدينة نصر.

مؤسسة عالمية قدمت خطة منظمة لإنشاء الحي الجديد سنة 2001، واشتهرت بين الناس باسم "التجمع الخامس" وأصبح اسم القاهرة الجديدة على الأوراق الرسمية فقط.

مكونة من عدة مناطق هي التجمع والقطامية ومدينة الرحاب. طبعًا أحسن طريق تخترق به المناطق دي كلها هو الطريق الدائري سواء القادم من وسط البلد أو القادم من المعادي أو مدينة نصر. مافيش أي خطوط مترو بـ تعدي قريب من هناك، لكن على طول هـ تلاقي ميكروباصات في أي وقت، والتاكسي حل جاهز طبعًا.

بـ تتطور وشكلها بـ يتغير يوم بعد يوم، القاهرة الجديدة ظهرت في السنوات الأخيرة بنمط حياة مختلف وجديد، المساحات الواسعة والكثافة السكانية القليلة من أهم سماتها.

أول مشروع سكني راقي يتعمل هناك كان "مرتفعات القطامية" التابع فعليًا للتجمع الخامس، وهو مجمع سكني مغلق على سكانه من الطبقات العليا وبعض مشاهير المجتمع، وساكن هناك رئيس الوزراء السابق الفريق أحمد شفيق. ملاعب الجولف والأندية موجودة هناك بوفرة، مفتوحة للأعضاء وسكان المجمعات السكنية فقط طبعًا. المنازل والفيلات هناك كبيرة وواسعة، وبعضهم على بواباته عمدان رومانية، والشوارع ممهدة ومرصوفة بالأحجار الكبيرة، وكل المناطق فيها مساحات خضراء وأشجار، باختصار.. عالم ثاني.

التجمع مكون من عدة مناطق هم: التجمع الأول والثاني والثالث والرابع والخامس والجولف الغربي. شارع التسعين المتفرع من الطريق الدائري هو الطريق الرئيسي اللي ممكن توصل من خلاله لكل المناطق دي. في نفس الشارع ده موجود المقر الجديد للجامعة الأمريكية بالقاهرة، والجامعة الألمانية والجامعة الكندية وجامعة المستقبل، وفيه هناك عدد من المراكز التجارية وأشهرهم "الداون تاون مول" أو "مول وسط البلد" المناسب لشراء الملابس، وجنبه شارع صغير متفرع منه هـ تلاقى فيه عدد من الكافيهات والمطاعم.

قريب من الجامعة الأمريكية مجمع تجاري ثاني مهم وهو "الميتنج بوينت Meeting Point" مليان مطاعم وأماكن تسوق ودور سينما، ومعظم زواره من الطلبة من الجامعات القريبة.

مدينة الرحاب موجودة في تقاطع الطريق الدائري مع طريق السويس. مجتمع متطور جدًا تم تجهيزه على 10 مراحل وقام بتنفيذ وتخطيط المدينة مجموعة طلعت مصطفى. المدينة شبه متكاملة فيها خدمات صحية وتعليمية ومنتجعات وملاعب. تم بناء منازل وفيلات تستوعب أكثر من 200000 ساكن ومع ذلك عمرك ما هـ تشعر أن المكان زحمة، ده غير أنها لسه مش مسكونة بالكامل. الرحاب على بعد 10 دقائق من مدينة نصر ومصر الجديدة.

الحياة هنا هادئة جدًا وبعيدة بمراحل عن كل الصخب اللي في شوارع كايرو القريبة من وسط البلد، الشوارع أوسع والمساحات الخضراء أكثر وكمان وجود الحي على أرض مرتفعة بـ يخلي الهواء أنقى. تقريبًا هنا المكان الوحيد اللي ممكن الدنيا تمطر فيه ثلج في فصل الصيف في العاصمة. وغير الجامعات اللي ذكرناها فيه عدد من المدارس الدولية زي "الشويفات" و"المدرسة البريطانية" و"المدرسة الأمريكية"، وطبعًا ده بـ يعمل إغراء أكثر للعائلات أنها تنتقل للمعيشة هنا.

القاهرة الجديدة مش أحسن مكان للخروج والفسح، ومع ذلك فيه عدد من الأماكن اللي ممكن تقضي فيها وقت ظريف زي «بريز» اللي في مرتفعات القطامية بالقرب من كلوب هاوس اللي بـ يقدم مشروبات ووجبات ظريفة، وفي رمضان بـ ينصب الخيمة الرمضانية الشهيرة.

فندق «دوسيت ثاني» القريب من مجمع ليك ﭭـيو Lake View السكني فيه عدد من المطاعم والمحلات المعروفة بالإضافة إلى النادي الصحي والسبا المميز.

المحكمة الجنائية في التجمع الخامس وأكاديمية الشرطة أصبحت من المعالم المهمة للمنطقة بعد ما شهدت محاكمات رموز النظام السابق.

الخريطه
الأبرز
مطاعم
جابيز: أكلة فخيمة في مول بوينت 90 القاهرة الجديدة

جابيز: أكلة فخيمة في مول بوينت 90 القاهرة الجديدة

يمكن سكان 6 أكتوبر هيعترضوا على كلامنا، بس أكيد القاهرة الجديدة يوم بعد يوم بتثبت إنها أهم تجمع للمطاعم والكافيهات والبارات، ومن أجدد الأماكن هناك " جابيز - Gaby's" اللي فتح فرعه الجديد في بوينت 90. منطقة الآوت دور بنشوف فيها كراسي جابيز الخشب المعروفة اللي تحسسك إنك في نادي، أما داخل المطعم فالموضوع أفخم شوية بكراسي وكنب، مع مواسير التكييف الظاهرة على الحوائط والإضاءة المميزة. قررنا نقعد داخل المطعم، وعلى طول طلبنا طبق بيتس أند ديبس Bits & Dips (110 جنيه) من المقبلات، والأطباق الرئيسية كانت شاتو برياند Chateubriand (270 جنيه) وتشيكن بورتوبيلو رول (95 جنيه). بعد دقائق قليلة وصلت سلة عيش هدية فيها عيش طازة وبقسماط مقرمش، ومعاهم طبق جبنة فيتا صغير عشان نغمس ونعيش. ثلث ساعة تقريبًا ووصل طبق المقبلات، عبارة عن طبق مستطيل فيه قطعتين ناتشو كبار وثلاث قطع سمبوسك بالسجق وأربعة بافالو وينجز سبايسي وثلاثة كريسبي بون بون وثلاثة بلح البحر مع سلطة بطاطس وطبق ساور كريم صغير. كمية كبيرة، مش كده؟ ندخل في المفيد ونبدأ مع البافالو وينجز ونكهتها الخارقة مع شطشطة معقولة عملت طعم هايل للفراخ. بعدها طلعنا على السمبوسك سجق المقرمش خصوصا إن حشو السجق الشرقي كان لذيذ والشطشطة جميلة. بعدها كان الدور على الكريسبي بون بون اللي بتتكون من كرات مقلية محشية جبنة وسبانخ، والمختلف فيها إن الطبقة المقرمشة تشبه الكورن فليكس بلونه الأصفر المميز. الحرب كانت على أشدها، الجبنة حاولت تسيطر على الطعم بس مقدرتش وطعم الكورن فليكس كسب وسيطر حتى على السبانخ والبطاطس. طعم بلح البحر للأسف كان عادي وصعب نقارنه بباقي أصناف الطبق، ولو كان اتشال من الطبق مش هنحس بأي فرق. سلطة البطاطس كمان مكانش لها طعم مميز، بس لازم نقول إنها معمولة كويس وعشان ننقذها أضفنا شوية ملح وفلفل. الناتشوز كانوا متبلين بضمير وعليهم بيكو دي جالّو، والتتبيلة كانت قوية جدًا فكان لازم نخفف الموضوع بشوية ساور كريم يعمل توازن للأكل. نروح على الكلام المهم، الشاتو برياند عبارة عن قطعتين فيليه طري وعليهم صوص عنب مع شرائح عنب صغيرة وأرز بسمتي. طعم الفيليه كان لذيذ وصوص العنب كان عبقري بطعمه المسكر نسبيًا وبعد ما تأكل بتحس بنكهة لاذعة تعمل توازن مع الفيليه المشوي well-done، أما الأرز البسمتي فكان كويس جدًا وبرضه صوص العنب عمل شغل عالي. أما التشيكن بورتوبيلّو رولز فكان عبارة عن أربعة رول فراخ صغيرين محشيين مشروم وجبنة وعليهم صوص فلفل، ومعاهم بطاطس مهروسة وبروكولي. ثلاثة رولات كانوا مستويين كويس والرابع كان لونه وردي، وطبعًا مقربناش عليه. الرولات من ناحية الطعم كانت كويس ولذيذة والفضل يرجع للبورتوبيلّو مشروم، والبطاطس المهروسة كانت لذيذة بس محتاجة تتبيلة قوية. بعد الأكلة الشديدة دي كان لازم نضرب فطيرة نوتيلا (70 جنيه) نحلّي بيها. وصلت الفطيرة المكعبة على لوح خشب وغرقانة نوتيلا ومتقطعة أجزاء، وكل واحد منهم عليه إضافة مختلفة؛ شرائح تفاح وكيوي وموز وأخيرًا بولة آيس كريم فانيليا.. اختيار الفواكه كان ممتاز وكل فاكهة منهم كان ماشي ١٠٠ ١٠٠ مع النوتيلا، يعني التفاح مثلًا عمل طعم مسكّر، والكيوي نكهة حادقة والموز بطعمه الجميل والآيس كريم الخفيف اللي وزن طعم النوتيلا الثقيل. أما الفطيرة نفسها فكانت خفيفة وتقطيعها سهل. عايزين تعرفوا تقييمنا لتجربتنا في جابيز؟ أجواء رائعة وجودة أكل ممتازة وموظفين هايلين – أكيد الرسالة وصلت.
كافيهات
ديكسي كريم: تشكيلة حلويات هايلة وجودة متواضعة في كايرو فيستيفال سيتي

ديكسي كريم: تشكيلة حلويات هايلة وجودة متواضعة في كايرو فيستيفال سيتي

شوفنا الكام سنة اللي فاتوا ظهور كمية محلات متخصصة في الحلويات مالهاش حصر، وكلامنا هنا مش محصور على الأماكن الجديدة وبس، حتى المحلات الموجودة كمان فتحت لها فروع جديدة علشان يثبتوا تفوقهم في حرب الحلويات القاهرية. أكيد ديكسي كريم واحد من الأماكن دي، وكلامنا هنا عن فرعهم الجديد في كايرو فيستيفال سيتي الموجود عند واحد من مداخل الفوود كورت، وطبعًا مكانه المميز هيلفت انتباه كل الداخلين والخارجين للمكان. الفرع كمساحة يعتبر صغير نسبيًا، ومناسب لزيارة سريعة تدلع بها نفسك بتشكيلتهم الكبيرة من الحلويات اللي تشمل دوناتس وجيلاتو على الطريقة الطلياني وزبادي مثلج، ومعاهم مشروبات سخنة وباردة بيعملوها بنفسهم. أول حاجة لاحظناها بعد ما وصلنا لترابيزتنا إنها مش نظيفة وعليها بواقي عصير وسكر من الناس اللي قبلنا، وعلشان مافيش مناديل اضطرينا نستنى الجرسون اللي وصل بعد فترة ومسح الترابيزة لما طلبنا منه. ندخل في صلب الموضوع ونبدأ مع الشوكليت جليزد دونات Chocolate glazed donut (11 جنيه) المشهور بيها ديكسي كريم مع دونات محشية ريد فيلفيت (16 جنيه) وميني آبل فريتر (14.70 جنيه)، ومعاهم لاتيه (17 جنيه) بنكهة البندق (7 جنيه) وسموزي توت (15 جنيه). الدونات اللي عليها آيسينج شوكولاتة للأسف ماكانتش طازة ومالهاش طعم مميز، أما الدونات بالريد فيلفيت فكانت غنية بكريمة بيضاء جميلة طغت على الدونات اللي برضه مالهاش طعم. نروح على الأبل فريتر الطرية وطعم القرفة مع نكهة تفاح خفيف جدًا وكمية آيسينج سكر كبيرة، والملحوظة إنها وصلت باردة وكان الأحسن طبعًا أنها تكون سخنة. سموزي التوت كان تحفة بس مسكر بزيادة، وفيه نكهة صناعية بعدية عن طعم الفاكهة الطبيعي. أما اللاتيه فكان عبارة عن قهوة تركي دوبل ودي كانت حاجة غريبة طبعًا، بس مع كل المشاكل اللي قابلناها يومها ماكانش عندنا استعداد حتى نتناقش مع الجرسون ومشينا بعدها على طول. مافيش شك إن ديكسي كريم (على الأقل فرع كايرو فيستيفال سيتي) عنده كذا مشكلة محتاجين حل سريع علشان يستمروا في المنافسة مع دانكن دوناتس وغيره من خبراء الحلويات. لازم نقول أن الموظفين هناك بيشرحوا كل حاجة محتاج تعرفها عن الحلويات الموجودة ما عدا الدوناتس اللي هي أصلًا تخصص ديكسي كريم.
تسوق
تومبوكا: فنانين شباب سايبين بصمتهم على منتجات متنوعة تقدر تشتريها أون لاين

تومبوكا: فنانين شباب سايبين بصمتهم على منتجات متنوعة تقدر تشتريها أون لاين

بالرغم من أن صناعة أي حاجة بنستعلمها تعتبر فن في حد ذاته، وخصوصًا لو الحاجة دي لها وظيفة جمالية جنب وظيقتها الأساسية، إلا أن فيه منتجات بتبقى معمولة لأنها تقضي الغرض المطلوب منها وخلاص؛ حتى لو فيه فرصة أن يكون فيه لمسة جمالية داخلة في الموضوع الاهتمام بها بيبقى ثانوي، ده إذا كان موجود. تخيل بقى لو المنتجات دي زادت عليها لمسة جمالية من فنان، مش من مصمم شغلته أنه يعمل Mass Production وخلاص... أكيد الموضوع هيختلف. تومبوكا - Tombokka موقع إلكتروني بيجمع ما بين المنتجات اللي بنستعملها كثير في حياتنا ولمسة الفنان اللي بتجملها؛ المنتجات دي بتشمل تي وسويت شيرتات، Covers للموبيلات واللاب توب، ساعات حائط وحتى الشنط والخداديات. مجموعة المنتجات دي ثابتة وما فيش عليها زيادة أو نقص. اللي بيحصل كالآتي: فنان يطلع بفكرة حلوة، ينفذها ويقدمها للقائمين على الموقع، ويحدد إيه المنتجات اللي يحب يشوف عليها فنه... ييجي حد تعجبه حاجة، يعملها أوردر علشان يشتريها وتوصله لحد باب بيته. مجموعة الفنانين كبيرة؛ فأنت هتلاقي حاجة تعجبك أيًا كان ذوقك. ممكن تدوّر على اللي أنت عايزه من خلال اسماء الفنانين الموجودين على الموقع، أو من خلال المنتجات اللي بيقدموها. إحنا شخصيًا عجبنا فنانين زي نوران فراج، واللي بتقدم رسومات هندسية تشبه الماندالا، ورسومات لطيور وحيوانات بالأبيض والأسود واللي مطبوعة على الشنط بعكس الرسومات اللي مطبوعة على الشنط ومنتجات ثانية زي التي شيرتات وساعات الحائط وحاجات ثانية. ولو أنت بتحب الكوميكس ومتابع أعمال الفنانين اللي بيرسموها، هتلاقي أعمال للفنان أحمد عبد الحميد واللي بيشارك في مجلة "توك توك". عجبنا من تصميماته كذا واحد منهم "حمامة"، "مورابة" و"ألو". الجميل في أعمال أحمد عبد الحميد أنها متنوعة بدرجة كبيرة في الأسلوب ما بين الرسومات اللي فيها بساطة سواء في الخطوط أو الألوان، ورسوم ثانية معقدة أكثر وحتى اللي بتشبه أعماله في "توك توك". مش ناقص غير أننا نقول لكم أن الأسعار موحدة لكل منتج؛ عندك التي شيرت بـ 180 جنيه (ودلوقتي عليهم عرض بقوا بـ 144 جنيه)، السويت شيرت بـ 275 جنيه، أما الساعات فهي بـ 150 جنيه. أما الـ Covers الخاصة باللاب توب فهي بـ 200 جنيه، أما للموبايلات فهي من 120 لـ 150 جنيه، وأخيرًا الخداديات بـ 180 جنيه، والشنط بـ 150 جنيه. ممكن حد يشوف أن الأسعار غالية حبتين، بس ده ما يمنعش أن الجهد المبذول في التصميمات واضح، وخصوصًا أنها مختلفة عن نفس المنتجات اللي ممكن تشتريها هي هي من مكان ثاني.
صحة ولياقة
FitNation: مبادرة الرياضة للجميع فى جيم بالتجمع الخامس

FitNation: مبادرة الرياضة للجميع فى جيم بالتجمع الخامس

يعنى إيه FitNation: ده أول سؤال لازم حضرتك تسأله علشان تعرف إحنا بـ نتكلم عن إيه.. وهنا لازم نقف ونقول لك الأول: "أنت بـ تحب الرياضة؟" طب عندك استعداد تقضى حوالى ساعة كل يوم فى التمرين.. لأ، لأ مش الجيم ومش الأيروبكس ومش الكارديو.. هى حاجة كده قريبة من اللى فات لكن بفكر جديد. المبادرة: قررنا نروح نشوف إيه مبادرة FitNation فى التجمع الخامس وإيه موضوع الرياضة اللى بـ يلعبوها، هل هى حاجة مختلفة ولا إيه.. ولما تكلمنا مع كابتن "محمد المصرى" صاحب المبادرة لاقينا نفسنا أمام حد مثقف بجد مش بس رياضى. اتضح أن فكرة المبادرة قائمة على البرنامج العالمى الرياضى المعروف باسم "Insanity" وجنب ده الفكرة قائمة على رفع وعى الناس بالرياضة وتحويل تفكيرهم علشان يبقى صحى أكثر وده عن طريق مجموعة من التمارين الرياضية المخصصة ببرنامج محدد، ومش لازم يكون عندك خلفية رياضية علشان تتمرن معاهم.. يكفى أنك تستمر شهرين علشان تلاقى فرق كبير فى صحتك وقوتك ولياقتك العامة كمان. وصف المكان: المكان عبارة عن ملعب أقل من الخماسى شوية.. يتسع لحوالى 40 شخص يتمرنوا فيه بسهولة من غير ما تكون المساحة مضايقاهم.. وهو ملعب مرتبط بجيم اسمه "Vein Gym" واخد دور فى مول اسمه "Mall 66" فى التجمع الخامس. البرنامج: البرنامج المتبع عبارة عن مجموعة تمارين رياضية مرتبطة باللياقة العامة والإطالات واكتساب القوة وكمان اكتساب مظهر جسدى جميل ورشيق.. ولازم نقول أن ده من غير تمارين الجيم المعروفة وإنما تمارين جسدية كلها.. ممكن يكون الموضوع صعب فى أوله لكنك هـ تستمتع به بعد كده، وأى حد يعرف يعمل التمارين دى والموضوع ده بـ يتطلب مستوى عالى من الالتزام.. وممكن تعمله فى البيت لكن ده عاوز التزام منك ومساحة فاضية وكمان تشتغل صح.. علشان كده كابتن المصرى بـ يركز فى التمرين على "التكنيك وطريقة عمل الحركة" والحالة النفسية القوية اللى بـ تبقى فى تجمع الناس مع بعض فى التمرين.. وكمان بـ يركز مع الناس علشان يعملوا كل الحركات صح علشان ما يبقاش فيه إصابات. معلومات مهمة: التمرين بـ يختلف من شخص للثانى ومن ولد لبنت حسب معدل حرق الدهون عنده وحسب أداؤه فى التمرين وقوته الجسدية.. لكن فى النهاية لازم توصل لمستوى جيد من رفاهية اللياقة البدنية وقوة التحمل والجسم الرياضى. وعلشان تبقى النتيجة قوية لازم تتبع نصائح كابتن "محمد المصرى" فى التغذية وهى سهلة جدًا. - اشرب مياه كثير على قد ما تقدر. - ابعد عن السمن والزيوت والزبدة والسكر. - تناول وجبات كثير لكن بكميات قليلة. - اوعى تأكل قبل النوم بثلاث ساعات. وفى النهاية اللى عاوز يشترك يقدر يكلمهم ويروح على طول، هما بـ يتمرنوا كل يوم وتكلفة الاشتراك فى الشهرين 1500 جنيه.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن