السادس من أكتوبر, Cairo_360_cairo_by_area - كايرو 360
القاهرة بالمناطق

السادس من أكتوبر

السادس من أكتوبر

مدينة السادس من أكتوبر سميت المدينة بالاسم ده طبعًا تيمنًا بنصر السادس من أكتوبر عام 1973، وتم التخطيط للمدينة فى عهد الرئيس الراحل أنور السادات، وبـ تعد المدينة نموذج ناجح جدًا للمجتمعات العمرانية الجديدة، لأنها فى المقام الأول من أنجح المدن الصناعية فى مصر، كمان بـ تعد من أكثر المدن الجديدة عمرانًا لأن فيها أكثر من 12 حى ضمن كردون المدينة وتوسعت إلى أبعد من كده فى سنوات قليلة فـ تعددت المنتجعات اللى بـ تحيط بالمدينة وكمان تعددت التجمعات العمرانية الخاصة.

دائمًا بـ نحس أن أكتوبر والشيخ زايد منطقة واحدة، يمكن لأن بـ يربطهم نفس الطريق، مدينة الشيخ زايد زي ما أغلبنا عارف تم تسميتها على اسم الراحل الشيخ زايد بن سلطان رئيس دولة الإمارات العربية المتحدة وحاكم إمارة أبو ظبي. والمدينة تم بناؤها بمنحة من صندوق أبو ظبي للتنمية، فيها الكثير من المدن الجديدة زي "الشباب" و"المستقبل" و"الجومان" و"روضة زايد" و"الربوة" وغيرها.

تبعد مدينة الشيخ زايد حوالي 20 كم من ميدان لبنان و28 كم عن ميدان التحرير وبـ يحدها طريق مصر- الإسكندرية الصحراوي وامتداد محور 26 يوليو ومدينة 6 أكتوبر، بـ تنقسم المدينة إلى 20 حى يقسم كل منها إلى 4 مجاورات، كل حى فيه خدماته الخاصة من مسجد وسوق ومركز خدمى، فيه أحياء متوسطة المستوى زي الحي الأول والثالث والحادى عشر والثالث عشر، وأحياء فوق المتوسطة زي الحى الرابع وجزء من الحى الثاني والسابع وأحياء راقية مستواها الاقتصادى عالى زي الحي المتميز.

علشان تروح لأكتوبر (اختصارًا زي ما بـ نقولها) عندك كذا طريق: لو أنت سايق يا إما تمسك المحور من أوله (بعد ما تطلع الكوبري من ميدان لبنان) وتفضل ماشي لحد ما تعدي على الشيخ زايد وهايبر ماركت وبعدهم بفترة ميدان جهينة الشهير وتكسر الصينية وتمشي على طول وهـ يبقى مول العرب على إيدك اليمين لحد ما تلاقى نادي أكتوبر وجهاز المدينة على يمينك وللأمام شوية هـ تلاقى منطقة الحصري والمحور المركزي، يا إما من طريق ثاني لو أنت قادم من طريق الواحات هـ تفضل ماشى على طول لحد ما تلاقي يافطة مكتوب عليها "نادي وادي دجلة" على يمينك، يا إما تدخل يمين وتفضل ماشي لحد ما توصل ميدان جهينة، أو تكمل على طول هـ توصل برضه.

ولو أنت قادم من الهرم أو فيصل وأخذت الطريق الصحراوي هـ تفضل ماشي على طول كأنك طالع على طريق مصر إسكندرية الصحراوي، وقبل ما تحصل داندي مول أو "كارفور" فيه ملف U-Turn شمال هـ تأخذه وتفضل ماشي على طول لحد ما تلاقي يافطة مكتوب عليها "مدينة الشيخ زايد/ أكتوبر".

المواصلات سهلة جدًا، فيه موقف ميكروباصات –وهو الأشهر- في ميدان لبنان بـ يحمل لأكتوبر والشيخ زايد، وفيه فى ميدان التحرير، وفيه موقف ثالث فى الهرم اسمه "موقف إسكندرية" بجوار مسجد الصباح، وفيه كمان من ميدان الجيزة، وفيه من الإسعاف، وللأسف مافيش حاليًا خط مترو بـ يوصل لأكتوبر لكن هـ يتعمل بعد كام سنة، آخر خط قريب له بـ يكون في أول شارع الهرم في منطقة نصر الدين.

"أكتوبر" فيها جامعات ومعاهد كثيرة وصل عددها إلى أكثر من ثلاثين معهد عالى، هـ تلاقى هناك أكاديمية أخبار اليوم، والأكاديمية الدولية للهندسة وعلوم الإعلام، والمعهد العالي للسياحة والفنادق، والمعهد العالي للهندسة المعمارية وتكنولوجيا إدارة الأعمال، وطبعًا جامعة 6 أكتوبر، وجامعة الأهرام الكندية، وجامعة مصر للعلوم والتكنولوجيا MUST المشهورة بالأوبرا الفخمة الملحقة بالجامعة وبـ تقدم أنشطة كل فترة، وكمان جامعة MSA.

في الطريق الصحراوي بعد البوابة الثانية للشيخ زايد برضه هـ تلاقي يافطة مكتوب عليها "مدينة زويل للعلوم والتكنولوجيا" اللي المفروض هـ يبدأوا بنائها قريب، كمان افتتح من كام شهر دار مناسبات ومسجد الشرطة هـ تلاقيها على الشمال وأنت متجه للشيخ زايد.

الجانب الترفيهي متوفر فى المنطقة، أول ما تجتمع كلمتى "ترفيه" و"أكتوبر" هـ ييجي فى دماغنا على طول ملاهي "دريم بارك"، وفيه هناك كمان "مدينة الإنتاج الإعلامى" اللي بـ يتصور في ستوديوهاتها مشاهد الأفلام العربي والمسلسلات.

المطاعم والكافيهات والمحلات مش موجودة بكثرة فى الشيخ زايد زي ما هى موجودة في أكتوبر خاصة فى منطقة الحصري اللي بـ تضج بالحياة وطبعًا أكبر مول فى الشرق الأوسط "مول العرب" وفيه كمان فرع لكل من نادي الصيد المصري ونادي المهندسين هناك، ونادي "دريم لاند"، أما في الشيخ زايد هـ تلاقى طبعًا الأشهر على الإطلاق والأقدم "هايبر ماركت" ومطاعم مش كثيرة قوي زي: "أفريكانو"، و"ديلاش"، وكافيه "دو أور"، و"سبكترا" له فرع هناك، ومؤخرًا كمان فتح هناك سوبر ماركت "سعودي".

الخدمات الطبية متوفرة بكثرة فى المدينتين، في الشيخ زايد فيه طبعًا مستشفى زايد التخصصى، وجنبها مستشفى زايد العام، وفي أكتوبر أشهرهم مستشفى "دار الفؤاد" وفيه مستشفى "الزهور" بالقرب من ميدان الحصري ومستشفى جامعة MUST، وفى أكتوبر فيه منطقة اسمها المنطقة الصناعية فيها مصانع كثيرة لشركات كبيرة منها: جهينة، سيراميكا كليوباترا، ترافكو، توشيبا العربى، شركة إيديتا للصناعات الغذائية، وأمريكانا. الفنادق برضه لها نصيب معقول فى المنطقة، هـ تلاقي فنادق "نوفوتيل" و"شيراتون دريم لاند"، و"سويس إن"، و"هيلتون بيراميدز جولف ريزورت".

الخريطه
الأبرز
مطاعم
جيرمان دونر كباب: السلسلة العالمية وصلت مصر

جيرمان دونر كباب: السلسلة العالمية وصلت مصر

في شعار بنرفعه أول لما نسمع عن افتتاح سلسلة مطاعم عالمية في مصر وهو "لما تكون عامل حسابك إن الناس هتحبطك، عمرك ما هتتفاجئ لما يحبطوك"، وبصراحة كان صح في حالات كثيرة زي دانكن دونتس وآبل بييز وبرجر كينج. المشكلة ساعات بتكون في فكرة المكان وساعات بتكون المشكلة في جودة الأكل نفسه. ومن هنا كنا متوقعين جيرمان دونر كباب يكون إحباط جديد، لكن بصراحة كنا غلطانين. أول فروع جيرمان دونر كباب كانت في برلين سنة 1989، ودولقتي أحدث فروعهم وصل من كام شهر في مول بالم ستريب. مافيش اختلاف تقريبًا بين الفرع ده وباقي فروع السلسلة الشهيرة؛ اللونين البرتقالي والرمادي المميزة للمكان وصور بالأبيض والأسود وكراسي ومطبخ زجاجي بنقدر نشوف فيه الدونر وهو بيتحضر بكل عناية واحترافية. نروح على الأكل ونبدأ مع تشيكن دونر كباب كومبو (52 جنيه)، اللي بيكون معاه مشروب غازي وسلطة أو بطاطس محمرة جميلة– وطبعًا مش محتاجين نقول إننا طلبنا بطاطس –والفراخ نفسها عبارة عن شرائح رفيعة وخس وطماطم وبصل وكرنب أحمر وعليهم صوص ثوم سبايسي وزبادي وكل دول ملفوفين في عيش بلدي شكله كأنه مضغوط في جهاز وافل. الفراخ كانت طرية جدًا والخضار طازة والعيش البلدي كمان تحفة والصوصات عملوا نكهة مميزة. الموضوع كله على بعضه كان هايل. أما البيف دونر(40 جنيه) فكان زي الفراخ بس طلبنا معاه إضافة جبنة فيتا (2 جنيه) عملت شغل عالي مع البيف. صحيح شكل اللحم كان حلو بس المشكلة إنه مش طري زي الفراخ والساندويتش كله على بعضه كان ناشف ومحتاج صوصات زيادة. جرّبنا كمان دوروم تشيكن دونر (45 جنيه) ملفوف في عيش عربي وفيه نفس مكونات الدونر بس معمول على شكل راب محمص ومقرمش. الفكرة هايلة مافيش كلام بس بصراحة مافيش حاجة تغلب العيش البلدي. مافيش شك إن جيرمان دونر كباب مكان هايل لاستخدامه مكونات أكل جودتها عالية وطعم مميز وخدمة سريعة، ولو نفسك في شاورما خفيفة هو ده المكان المثالي. نتمنى أنهم يحافظوا على مستواهم ويتجنبوا أخطاء الغير؛ أيوه الكلام ليكم يا برجر كينج ودانكن دونتس. ملخص الموضوع إن جيرمان دونر كباب بيقدموا شاروما خفيفة جودتها عالية وطعمها حلو والخدمة هناك في منتهى السرعة.
كافيهات
لا إكلير باريس: أحلى إكلير في كايرو؟

لا إكلير باريس: أحلى إكلير في كايرو؟

القاهرة على مدار السنين اللي فاتت كانت شاهد على خروج عدد كبير من الماركات المحلية للنور في مجالات كتيرة أهمهم الأكل والمشروبات. لا إكلير باريس كان واحد من الأماكن اللي بدأت من عربة صغير في داون تاون مول القاهرة الجديدة عليها عدد محدود من أصناف الإكلير. المشروع وقتها حقق نجاح هايل، وخلال كام سنة شوفنا فروع لا إكلير باريس في المعادي والمهندسين ومول العرب وغيرهم من الأماكن الحيوية. إحنا في كايرو360 قررنا نعمل زيارة لفرع مول العرب ونشوف وصلوا لإيه من ساعة أخر زيارة لفرعهم في المعادي. لا إكلير باريس هتلاقيهم في كابينة مربعة في المول جنب سينما جالاكسي وبتتكون من ثلاثة أماكن للعرض، أتنين منهم للإكلير وواحدة لباقي حلوياتهم واللي منهم نكهات آيس كريم. بصراحة تركيزنا كله كان على الإكلير، فدخلنا على العرض المميز اللي شوفنا فيه مجموعة متنوعة من النكهات، واخترنا منهم إكلير ريد فيلفيت (18 جنيه) وأسطورة الإكلير الخالدة: إكلير شوكولاتة (16 جنيه). بصراحة ماقدرناش نقاوم الإغراء إننا نجرب حاجة أو أتنين غير الإكلير، فطلبنا تارت نوتيلا (19 جنيه) مع طبق تيراميسو (14 جنيه). نبتدي مع إكلير الشوكولاتة اللي يمكن عجينته كانت طازة، بس حشو الشوكولاتة والتوبينج ماكانش لهم طعم مميز ومش مسكرين زي المتوقع. أما الريد فيلفيت إكلير فكان أحسن وطعمه مسكر، وكمان حشو الكريمة كان هايل، بس المشكلة إن طعم التوبينج كان فيه نكهة فراولة صناعية مش لطيفة. بصراحة ماكناش متوقعين المستوى ده واللي طلع أقل بكتير من زيارتنا السابقة لهم. نروح لتارت النوتيلا اللي عانى من نفس مشكلة إكلير الشوكولاتة، قاعدة التارت مقرمشة وطعمها ولا أحلى وكمان طازة، لكن التوبينج المكون من طبقة كريمة شوكولاتة ومرشوش عليها صوص شوكولاتة ماكانش على المستوى ومافيش أي وجود لنكهة النوتيلا. بعد الكلام اللي فات كنا خايفين من التيراميسو، بس المفاجئة أنه كان طبق اليوم. طعم التيراميسو كان متوازن والكريمة مع الكيك عملوا دويتو هايل. طبعًا كلكم لاحظتم إن زيارتنا لـ إكلير باريس ماكانتش تمام. جايز كل الحلويات اللي جربناها كانت طازة ولذيذة، لكن التوبينج والحشو ماكانش على المستوى وأكيد أثروا على طعم الحلويات.
تسوق
إنترسبورت: كل اللي يحتاجه الرياضيين في مول العرب

إنترسبورت: كل اللي يحتاجه الرياضيين في مول العرب

بالرغم من أن في القاهرة فروع كثيرة لتوكيلات ماركات رياضية عالمية، إلا أن معظم الأماكن دي مش بتوفر للرياضيين غير الملابس. صحيح أن فيه هايبر ماركتس فيها أقسام بتبيع معدات رياضية، إلا أن محل زي إنترسبورت – Intersport يعتبر المكان اللي بيجمع أكبر تشكيلة من أي حاجة تهم الرياضيين، وبأسعار متنوعة. وبما أن الصيف دخل، وموسم شراء المايوهات بدأ، قررنا نعمل زيارة لفرع مول العرب، واللي بيعتبر من أكبر فروع إنترسبورت. أول حاجة لفتت نظرنا كانت مجموعة المايوهات الحريمي ضخمة اللي تنناسب كل الأذواق والرغبات. وبما أن فيه طلب كبير على المايوهات الشرعي؛ قلنا ناخد لكم جولة وسطهم علشان نجيب لكم المفيد. مبدأيًا، مجموعة النقشات المعروضة بسيطة وأغلبها أبيض في أسود، ومنهم الكامل (بدلة – فستان – غطاء للرأس) بـ 999 جنيه، أما لو عايزة البدلة لوحدها فمعروض منها كحلي وأسود وسعر الواحد (439 جنيه)، ومعروض جنبهم من نفس اللون Jupes وسعر الواحدة منهم (299 جنيه). أما لو أنت بتفضلي تلبسي فستان وتحته بنطلون منفصل ممكن تلاقي الفستان لوحده بـ 559 جنيه أما البنطلون فبـ 149 جنيه ومتوفر منه الأسود. يمكن الأسعار دي غالية بالمقارنة مع أماكن ثانية ممكن تقفلي المايوه كامل بـ 500 جنيه، إلا أن الخامة المعمول منها المايوهات نضيفة وما تفرقش عن خامة المايوهات العادية، ده غير ميزة الذوق اللي بنات كثير بيشتكوا منه في الأماكن الثانية. ما نعرفش ليه شدتنا بدلة الغطس، وهي أسمك وأثقل بكثير من المايوهات الثانية واللي كانت معروضة بسعر 1199 جنيه، يمكن لونها الأسود والوردي وسط كوم من المايوهات الكحلي والأسود، إلا أن أكيد دي هتنفع واحدة بتمارس رياضة الغطس باستمرار. إنترسبورت برضه عنده مجموعة كبيرة من المايوهات العادية واللي عليها نقشات زهور وفيه منهم أسود سادة، لاقينا منهم واحد أزرق في أسود من غير كمام وبشورت سعره 397 جنيه، ومتوفر من نفس الشكل بنصف كم. طبعًا فيه مجموعة من المايوهات اللي ماركتها Speedo -ودي ماركة مشهورة بيعتمد عليها السباحين المحترفين- ولكن أغلب القطع المعروضة كانت جد أوي لو حد عايز مايوه يبلبط بيه في الساحل، ده ما يمنعش أننا أخدنا فكرة سريعة عنها، كان موجود مايوهات رجالي –شورت لنص الفخد- منقوشين الواحد منهم سعره 439 جنيه، أما الحريمي فهو أسود بالكامل سعره 615 جنيه، ده غير مجموعة من مايوهات الأطفال اللي مش هتقل بأي حال من أحوال عن 300 جنيه. نسيبنا من المايوهات شوية وندخل على الحاجات الثانية الكثيرة الموجودة، زي مثلًا مجموعة الأحذية اللي ممكن تلاقي منها اللي يناسبك سواء الجري أو حتى الأحذية الكاجوال وكمان أحذية البحر. نبدأ بأحذية البحر والمناسبة جدًا للشواطيء الصخرية زي اللي موجودة في سيناء مثلًا، وسعرها 109 جنيه. أما أحذية الجري والرياضة فمتوفر منها أنواع كثير من أول ماركة Anta واللي هتلاقي منها من 300 وأنت طالع، لحد ماركات زي أديداس ونايكي واللي ممكن توصل قرب الـ 800 جنيه. أما الكاجوال، لاقينا مجموعة من ماركة Palladium ، وأغلبهم كان حريمي؛ النوعية دي نعلها من المطاط، مغطي وش الرجل وبقيتها من القماش متوفر منه ألوان كثيرة ومتنوعة، سعرهم 299 جنيه. كان نفسنا نكلمكم عن كل حاجة شفناها هناك، إلا أن فيه مجموعة كبيرة من المعروضات واللي مهووسين الرياضة هيفهموها أكثر مننا، زي الجوانتيات الرياضية المختلفة، النظارات وبونيهات السباحة وغيرها كثير. لو أنتم بتدوروا على أي حاجة متعلقة بالمعدات الرياضية ننصحكم أنكم تروحوا إنترسبورت، لأن غالبًا هتلاقوها هناك.
صحة ولياقة
سكين شيد: عيادة خبراء الجلدية الفنلندي وصلت 6 أكتوبر

سكين شيد: عيادة خبراء الجلدية الفنلندي وصلت 6 أكتوبر

صحيح الأنوار المبهرة والإيقاع السريع الموجودين فى العاصمة بـ يقدموا أجواء مثيرة، لكن الرياح الجافة والتراب الكثيف بـ يقلل من نشاط أى واحد مهما كان نشيط وحماسى. التوازن الصحى ما بين العقل، الجسم والروح أكيد عنصر أساسى علشان تقدر تستحمل العيشة فى القاهرة، ومافيش طريقة للوصول للكلام ده أحسن من العناية بالحاجز اللى بـ يحميك من التلوث والمشاكل المنتشرة هنا. "سكين شيد - Skin Sade" عيادة جلد فنلندية بـ تقدم علاجات طبيعية بدون جراحة ومستحضرات تجميل بـ تزود الجلد بكل احتياجاته. هو ده المميز فى سكين شيد واللى بـ يفرقه عن باقى عيادات الجلدية المنتشرة فى القاهرة. وسط الحى المتميز فى 6 أكتوبر، سكين شيد موجود فى فيلا مشتركة مع عيادة أسنان. بعد ما حجزنا بالتليفون، دخلنا لمنطقة الاستقبال الشيك، وهناك رحب بنا الطبيب المختص. العيادة معلقة "منيو" فيها كل أنواع العلاجات من مساج الوجه (100 جنيه) لغاية عمليات شد بوتوكس (500 جنيه). بعدها روحنا على غرفة المعالجة وفيها سلمونا ورقة طبية علشان نملأها وبعدها طلبوا مننا نتخلص من أى حُلىّ وأى ملابس زائدة. تركونا شوية علشان نندمج مع الأجواء المريحة والموسيقى الهادئة، بجانب الأجواء الدافئة، الأدوات والأجهزة المستخدمة كانت منظمة ومعقمة بالكامل أو بـ تستخدم أجزاء يتم التخلص منها بعد استخدامها. بعد ما استقرينا على الكرسى المريح، بدأت الإخصائية فى علاج ترطيب البشرة (450 جنيه) أولاً بالتنظيف وإزالة الماكياج بمنظف من الحليب، وبعدها استخدمت جل مُلطّف، كل المنتجات المستخدمة كانت من الماركة الشهيرة أوكسينرجي باريس. بعد ما خلصت مرحلة التنظيف، بدأت فى الكشف على جلدنا تحت الضوء علشان تحدد نوع البشرة والعلاج المناسب لها. بعد ما صنفت بشرتنا أنها "دُهنية" وحددت المناطق المحتاجة لتنظيف، حضرت الأخصائية سائل كيميائى للتقشير بمكونات نشطة من السليكا والجليكوجين. وضحت لنا الفرق بين التقشير الكيميائى والإنزيمى على حسب نوع البشرة. الأخصائية كانت بـ توضح لنا كل خطوة، وقالت لنا أن التقشير بـ يسبب ألم بسيط وإحساس بالحرارة، وأن ده شيء طبيعى ومافيش خوف منه. بعدها، شالت طبقة التقشير وبدأت مرحلة البخار. الهدف منه هو تفتيح المسام لتحضير البشرة لإزالة الرؤوس السوداء، والبخار كان على مسافة مناسبة بحيث نقدر نتنفس. البخار كان فيه أوزون، وقالت لنا أن الهدف منه هو تعقيم وترطيب البشرة بعد التقشير الكيميائى. بعد ما فتحت المسام، بدأت عملية إزالة الرؤوس السوداء. الأخصائية المسئولة عننا تعاملت بمهارة واحترافية مع أماكن المشكلات عندنا. بعدها، استخدمت جهاز ذبذبة لغلق المسام بعد إزالة الرؤوس السوداء، فتحة الجهاز كانت من القماش واستخدمتها على الوجه كله بدون أى ألم. بعد جهاز الذبذبات، وضعت محلول واستخدمت جهاز مغناطيسى لمساعدة الجلد على امتصاص المحلول. آخر حاجة كانت مساج ممتاز للكتف باستخدام زيوت أساسية ومساج للوجه بالكولاجين، وكريم مسائى علشان زيارتنا كانت بالليل. "سكين شيد" بوصفه عيادة شاملة ومحترفة، وكمان عنده أشطر أخصائي جلدية قابلناهم فى مجال علاج الجلد. ومع أسعارهم المعقولة وباقاتهم المميزة، قدر يبنى سمعة قائمة على الأمانة والاحترافية.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

النهارده في القاهرة: وجبة فنون كومبو.. إكسترا مسرح وأفلام

يوم جديد في كايرو. طبعًا فيه الروتين المعتاد من شغل ومشاوير وغيرهم. وحاجات ممكن تحسسك بشوية ملل. بس على مين؟ طول ما أجندتنا موجودة انسى إن الملل يعرف لك طريق. علشان ال