المهندسين, Cairo_360_cairo_by_area - كايرو 360
القاهرة بالمناطق

المهندسين

المهندسين

من أحياء القاهرة الراقية، بنيت وتأسست في أوائل عام 1950 على الأراضى الزراعية بالإضافة إلى منطقة كبيرة من الفيلات، وفى عام 1970 زاد عدد سكانها بشكل ملحوظ واختلفت معالمها وتحول حى الفيلات إلى مبانى سكنية. المهندسين أصبحت حاليًا واحدة من أكثر المناطق تكلفة للعقارات والمبانى ويرجع ده إلى موقعها المتميز.

الحى مش مشهور بوجود أماكن سياحية وأثرية كمناطق ثانية (زي شارع الهرم)، لكنها بـ تشتهر بوجود كمية كبيرة من المحلات التجارية والكافيهات والمطاعم والقهاوي وفيها كمان سينمات زي سينما سفنكس الموجودة فى ميدان سفنكس الشهير اللى ممكن تروح منه على منطقة الزمالك عبر كوبري 15 مايو أو إلى العجوزة.

سفنكس يعتبر من أهم ميادين الحى ومشهور بوجود كذا مول سوق للكمبيوتر فى أماكن قريبة جدًا من بعض وكمان فيه فندق "النبيلة" الشهير.

الحي ده كمان مشهور بالمسجد الأشهر على الإطلاق "مصطفى محمود" اللى المتظاهرين كانوا بـ يتجمعوا عنده فى بداية الثورة، ومن النوادى الموجودة في الحي: نادى الزمالك، ونادي الترسانة، وبـ يعتبر شارع جامعة الدول العربية هو الشارع الرئيسي فى الحي، لأنه كمان بـ يعد موضع اهتمام وجذب للسياح العرب الزائرين للقاهرة.

فيه شوارع كثيرة متفرعة من جامعة الدول العربية، منها: شارع البطل أحمد عبد العزيز اللي فيه بنك الدم ومبنى المصل واللقاح وينتهى بميدان ومبى، وكمان شارع شهاب اللى فيه بلاتينيوم مول وعدد كبير جدًا من محلات الملابس، ومن الشوارع المتفرعة كمان شارع محيى الدين أبو العز اللى فى آخره هـ توصل لشارع السودان.

من الميادين المشهورة فى حي المهندسين ميدان لبنان واللى برضه فيه بنوك ومحلات كثيرة ولا يقل أهمية عن ميدان سفنكس، واللى فيه موقف شهير للميكروباص متجه لمنطقة 6 أكتوبر والحصري والشيخ زايد وهـ تلاقى فيه مواصلات متاحة حتى فى فترة الفجر.

الحياة بالنهار في المهندسين بـ تختلف تمامًا عن فترة الليل، الصبح بـ يغلب عليها الطابع العملى أكثر، هـ تلاقى الموظفين رايحين جايين والشوارع زحمة والحركة هناك ما بـ تهدأش وده بسبب وجود شركات كبيرة وبنوك كثيرة فيها زي البنك العربي الأفريقى وHSBC وCIB وعودة وكريدي أجريكول.

أما بالليل بـ تختلف كثير لأنها بـ تتحول من منطقة تجارية إلى منطقة ترفيهية من الطراز الأول، المهندسين فيها أكثر من 400 مقهى ومطعم بالإضافة إلى محلات الملابس أو أى تجارة ثانية فى أي مجال ممكن يتبادر على ذهنك. لكن تفضل مشكلة الزحمة اللى لا تنتهى واللى بـ تكثر كمان عن فترة الصباح.

الخريطه
الأبرز
مطاعم
مو بيسترو: أكلة فخيمة عليها القيمة في المهندسين

مو بيسترو: أكلة فخيمة عليها القيمة في المهندسين

موضوع الأكل في مكان فخم وراقي بيكون صعب على معظم أهل القاهرة، وشوفنا تجارب كثيرة لناس حاولت تعمل الموضوع ده بطريقة كاجوال في متناول الناس لكن ماحققتش النجاح المنتظر. مكان واحد قدر يحقق المعادلة الصعبة وهو "مو بيسترو". مو بيسترو موجود في ميدان أسوان وبيتكون من دورين. الدور الأرضي من أول نظرة باين عليه الشياكة بالديكورات الرمادي المميزة والترابيزات اللي بتوفر أعلى درجة من الخصوصية، وكلها مخصصة للأكل بس. لو ركزنا شوية هنشوف باب مستخبي بيطلع على الدور الثاني بألوانه الهادية شوية وأجواءه الأقرب للكافيهات. عرفنا بعد شوية ليه حسينا بكده علشان الشيشة بتتقدم في الدور ده فقط. وإحنا بنتفرج على المنيو الجرسون فاجئنا ببروشيتا؛ طبق طماطم بالثوم مع طبق مكعبات باذنجان روعة ومعاهم عيش طعمه ولا في الأحلام. بصراحة تحس من جمال الطعم أنك بتأكل أكلة بيتي معتبرة. نبتدي الحكاية مع طبق مقبلات شريمب أند بيكون (80 جنيه). أربع قطع جمبري محشيين بلو تشيز طلياني وزبيب، وملفوفين في بيف بيكون. بعد كل ده بيضيفوا ساور كريم وشرائح فلفل أحمر رفيعة علشان تعمل الشطشطة المطلوبة، وبكده طعم الطبق يكون متوازن ونقف له احترامًا وتقديرًا. نطلع على الطبق الرئيسية وهو سباجيتي هولانديز مع البيكون (75 جنيه). السباجيتي كانت مستوية صح الصح وعليها قطع بيكون مقرمشة صغيرة وكافيار وفلفل أسود وعليها صوص هولانديز. كان ممكن الطبق يدخل موسوعة جينيس لأحسن أكلة لولا طعم الصوص الضعيف واللي مقدرش يضيف الطعم الكريمي المطلوب للسباجيتي. طلبنا كمان فلانك ستيك (310 لفردين) ومعاه بطاطس مهروسة وسبانخ سوتيه. عايزين تعرفوا إزاي وصلوا للون الستيك الوردي الرائع ده؟ قطعة الستيك المدهونة عسل بتتسوى على نار هادئة لمدة 8 ساعات، وبعدين تتقطع شرائح رفيعة مسكرة، وفي الأخر يصبوا عليها ترياكي صوص عشان يعمل نكهة زيادة. نادرًا ما قابلنا طبق معمول فيه شغل كبير بالشكل ده، ونقدر نقول إنه من أهم الأطباق عند مو بيسترو واللي بيبين إمكانياتهم وشغفهم. تحية كبيرة لشيفات مو بيسترو. كانت طالبة معانا نجرب حاجة حلوة لكن عرفنا للأسف إن الحلويات لسه مش متوفرة، وعرفنا منهم إن اللي عملوا المنيو هم خريجين من معهدLe Cordon Bleuوخبراء طبخ من فور سيزونز، فكان طبيعي إننا نعد الأيام عشان نجرب حلوياتهم. طبعًا زعلنا جدًا إن منيو الحلو لسه بتتحضر عشان المطعم لسه في بدايته، بس الناس هناك شوقونا إننا نجرب ابتكاراتهم. مو بيسترو ما بين الأجواء اللطيفة والخدمة الهايلة، للأكل الرائع والمنيو المميز قدر يحقق حاجة شبه مستحيلة؛ أكلة فخمة وسط أجواء لطيفة تناسب الذوق المصري.
كافيهات
فروزي تويست: آيس كريم رول بالبسبوسة في المهندسين

فروزي تويست: آيس كريم رول بالبسبوسة في المهندسين

فروزي تويست كانوا أول ناس يقدموا الآيس كريم رول على الطريقة التايلاندية في القاهرة سنة 2014 مع أول فروعهم في مدينة نصر وحقق نجاح مميز. وطبعًا إحنا متعودين إن أي فكرة جديدة زي الكب كيكس أو الوافلز أو الكريب الناس بتقلدها تقليد أعمى من غير أي ابتكار أو تجديد. بعد سنتين فروزي تويست فتحوا فرع جديد على شارع أحمد عرابي المهندسين، وبصراحة أبهرونا واستمتعنا بزيارتهم. الفرع ده مختلف ومش متقيد بألوانهم الغامقة المعروفة، واختاروا حوائط طوب بألوان مبهجة زي الوردي والأخضر والأزرق والأصفر، والإضاءة كمان قدرت تظهر جمال الألوان. واضح إن المنيو عندهم كبرت ودخلوا فيها أشكال وألوان من الميلك شيك والمولتن شوكليت كيك والتشيز كيك، وطبعًا نكهات آيس كريم رول مالهاش حصر. إحنا قررنا نلم الموضوع ونطلب آيس كريم رول كاجو (20 جنيه) وسط. الأول نحكي لكم إزاي بيتعمل؛ بيصبوا خلطة الآيس كريم على سطح متجمد مع شوية كاجو مملح، وبعدين بيفرشوهم عن طريق حاجة زي سكينة المعجون لغاية ما يحولوهم لطبقة مستطيلة رفيعة جدًا. بعدها بيحرك السكينة من الأول للأخر علشان يعمل رول آيس كريم صغير. درجة السكر في الآيس كريم كانت مضبوطة والكاجو متوزع صح، وبكده تقدر تحس بالنكهة المملحة المميزة للمكسرات مع كل قضمة. قوام الآيس كريم رول كان سميك شوية وصعب تأكله بملعقة بلاستيك لدرجة إننا كسرنا ملعقتين. جربنا كمان آيس كريم رول بسبوسة وسط (13 جنيه)– أيوه آيس كريم بسبوسة؛ الكلام صح. الآيس كريم مع البسبوسة عملوا خلطة سحرية لذيذة مليانة قطع بسبوسة صغيرة. تخيل معايا إنك بتأكل بسبوسة ساقعة بالكريمة، بس مسكرة زيادة حبتين. إحنا مقتنعين إن مافيش أحلى من بولة الآيس كريم العادية اللي كلنا عارفينها، لكن فروزي تويست قدم لنا ابتكار مميز هايل. نقدر نقول إن الفرع ده هو أحسن فروعهم خصوصًا مع الموظفين الهايلين وتشكيلة الحلويات الرائعة والديكورات المبهجة.
القاهرة بالليل
كايرو جاز كلوب: موسيقى حية ودي جي وأكلات خفيفة ومشروبات في المهندسين

كايرو جاز كلوب: موسيقى حية ودي جي وأكلات خفيفة ومشروبات في المهندسين

لما تتصفح أجندة كايرو 360 اليومية هـ تلاقي كل يوم أحداث موسيقية وفنية في مكان اسمه «كايرو جاز كلوب». المكان فعلًا يعتبر علم وسط أماكن السهر وسماع الموسيقى الحية والأكل والشرب، لكن رغم كده اكتشفنا أن فيه ناس كثير ما تعرفش حاجة عن المكان ولا عن موقعه ولا نظام الدخول ولا إيه المميز فيه، يمكن بس يعرفوا اسمه وأنه موجود ناحية المهندسين أو العجوزة. كايرو جاز كلوب «Cairo Jazz Club» هو بَب Pub أو نادي ليلي بالمفهوم المعتاد، هو واحد من الأفضل والأشهر على الساحة حاليًا في القاهرة، اشتهر بتقديم أحسن الفرق الموسيقية والعازفين اللي بـ يقدموا كل أنواع المزيكا مش بس جاز زي ما اسمه بـ يوحي، وفي أيام خاصة بـ يقدم فيها موسيقى الهاوس والتكنو والإلكترونيك مع أحسن DJs في مصر وأحيانًا في العالم، وتقريبًا مافيش فريق موسيقي أو عازف شهير أو دي جي عالمي بـ ييجي مصر من غير ما يقدم حفل في كايرو جاز كلوب. عملنا زيارة مخصوص لكايرو جاز مؤخرًا علشان ننقل أجواء المكان للناس اللي ما راحتش قبل كده، لازم تحجز بالتليفون قبل ما تروح، ويا ريت يكون قبلها بيومين أو ثلاثة، وتحدد الساعة اللي هـ تروح فيها كمان، علشان الحجز ممكن يسقط بعد 30 دقيقة لو المكان امتلأ على الآخر. والدخول بـ يكون Couples أو بنات فقط، ما ينفعش شباب لوحدهم يدخلوا إلا في أضيق الحدود وبحالات استثنائية، حسب رغبة إدارة المكان، ومافيش حد أدنى للطلبات وممنوع الدخول لأقل من 25 سنة. معظم العروض بـ تبدأ الساعة 9 مساءً والدخول ممكن يكون قبلها بساعة. موجود في بداية شارع عرابي في المهندسين من ناحية العجوزة. له مدخل جانبي مش على الشارع الرئيسي تطلع له بكام درجة سلم. إضاءة خافتة جدًا، وعلى غير المتوقع المكان صغير جدًا من الداخل، وفيه عدد محدود من الترابيزات، لكن فيه أكثر من بار للجلوس بشكل منفرد، لكن لو عاوز ترابيزة وعشاء لازم تأكد على ده في الحجز اللي بـ تعمله قبلها بالتليفون. المكان على شكل حرف L وفي الركن الوحيد فيه مسرح صغير بالكاد يتسع لفرقة مكونة من 4 أفراد، لكن الغريب أن فيه فرق مكونة من 7 أفراد أو أكثر بـ يلعبوا على المسرح ده، وبـ يضطر بعض أعضائها أنهم يقفوا خارج المسرح. ومش بسهولة هـ تعرف تشوف العازفين لأن المسرح بنفس مستوى الأرض، يعني اللي في الصفوف الخلفية مش هـ يشوفوا أي حاجة، بس هـ يسمعوا كويس لأن توزيع الصوت ممتاز في المكان وإن كانت جودة الصوت بـ تختلف من عرض للثاني حسب مهندسي الصوت المصاحبين للفرق، وحسب جودة العازفين نفسهم. لكن اتضح من زيارتنا الأخيرة أن المكان وجهة كثير من عشاق موسيقى الـ Underground في مصر وبـ يروحوا مخصوص علشان يشوفوا فرقهم المفضلة اللي كثير منها نادرًا لما بـ يلعب في أي مكان ثاني غير كايرو جاز وكمان علشان أجواء الخصوصية والتفرد اللي بـ يتمتع بها المكان. وقت زيارتنا كان فريق Glass Onion اللي بـ يقدم أغاني البيتلز وبس كان مولع المسرح بالمعنى الحرفي واندمجنا معاه جدًا والمكان كان مليان على الآخر وتقريبًا ما كانش فيه حد مش بـ يغني بصوت عالي مع الفرقة وهو ماسك مشروبه المفضل وبـ يتمشى في الطرقات الضيقة للمكان. والناس بـ تبقى عارفة بعضها بنسبة كبيرة خاصة اللي بـ يحبوا نوع معين من المزيكا وبـ يحضروا كل الحفلات الخاصة بالنوع ده في أيامه المخصصة. يوم الروك أند رول غير يوم الهاوس غير يوم الجاز غير يوم الموسيقى المصرية البديلة والفولكلور. فيه منيو للأكلات والمزات والمشروبات، ممكن تطلب أطباق رئيسية ساخنة بأسعار من 50 لـ 80 جنيه، إحنا جربنا مسخن الدجاج في العيش السوري بالبصل (58 جنيه) وكان لذيذ وبسيط في مكوناته وعجبنا شكل الطبق وطريقة التقديم، ومعاه بعض المقبلات زي العيش المحمص والزبدة (8 جنيه) وعصير برتقال فريش (22 جنيه) ومن الأكلات الحلوة هنا البيتزا والباستا والمزات الباردة زي الخضروات والسلاطات. وفي النهاية الفاتورة للفرد الواحد صعب تيجي أقل من 100 جنيه مع الخدمة والضريبة وخاصة أنك هـ تطلب أكثر من مرة لأن السهرات هناك بـ تبقى طويلة، ولو كنت عاوز تطلب أكل ومش حاجز مكان جلوس قول لأي حد من الجرسونات اليقظين جدًا وهو هـ يدبر لك مكان للجلوس والأكل. ممكن تيجي هنا لأسباب كثير لكن أهم سبب بالنسبة لنا كان العروض الموسيقية المميزة، اللي رغم ضيق المكان والزحمة اللي في الداخل إلا أن لها مذاق خاص مش شبه أي مكان ثاني في كايرو. كايرو جاز كلوب هو أيقونة سهرات المزيكا في القاهرة مافيش كلام.
فن وثقافة
صالون ديالونا: للثقافة تسويق في المهندسين

صالون ديالونا: للثقافة تسويق في المهندسين

المكان: (المهندسين.. شارع أحمد عرابى) الزمان: (نهايات شهر ديسمبر) الطقس: (بارد جدًا.. من باب إيه يا مصر مالك؟) البطل: متطوع من كايرو 360 نازل يستكشف المكان الجديد ويحضر حفل توقيع واحد صاحبه. الحدث: المكان فيه أحداث كثير لكن وقت الزيارة زى ما قولنا (حفل توقيع مجموعة قصصية) ليه ديالونا؟ علشان ديالونا واخدة شكل أكاديمي.. مش بمعناها الحرفي لكن تقدر تعرف ده من خلال شعارهم "ملتقى المبدعين". هى أول أكاديمية للفنون والآداب بـ تعتمد على أساليب التدريب الفني و الأدبي الحديثة.. وواخدين أساليبهم من الأكاديميات والمعاهد الفنية المعروفة بتميزها على مستوى العالم. ولما حضرتك تسأل يعنى إيه الجديد؟ نقول لك أن مناهجهم التدريبية بـ تعتمد على الأساليب التفاعلية (يعنى بـ يشتغلوا عملى مش نظرى) واللى بـ يقدمها مجموعة من كبار الأساتذة المتخصصين في كل المجالات الفنية والأدبية القديم منها والجديد. وفكرتهم قائمة على تعليم الناس علشان يبقوا محترفين ويقدروا يساعدوا المجتمع وينافسوا فى سوق العمل.. يعنى الموضوع مش ورشة وتأخذ شهادة.. الفكرة أكبر من كده، الفكرة هى تكوين جيل من المثقفين والمتدربين يقدروا ينعشوا سوق العمل الفنى والثقافى فى مصر. قلم: من الآخر لو معاك قلم وعاوز تكتب وبـ تدور على مكان يكون فيه حفل توقيعك الأول.. روح "ديالونا".. لو معاك قلم وعاوز تقعد تكتب.. روح ديالونا.. لو معاك قلم وعاوز بعد ما تكتب تلاقى حد يسوق لك شغلك.. اتصدق (روح ديالونا برضه). المايك والتسويق: بقى لنا كثير فى مصر ماسكين مايك وماشيين فى الشوارع وجنب المثقفين وفى وسط البلد وعمالين نقول "محتاجين حد يشتغل تسويق ثقافة.. الله يعمر بيوتكم".. الثقافة بقيت مُنتج يعنى ممكن تسويقها.. وطبعًا كأنك بـ "تؤذن فى مالطة".. أما فى ديالونا فالموضوع مختلف. ليه بقى؟ نقول لكم إحنا، لأن اللى عملوا المكان أصلًا تخصصهم فى التسويق والعلاقات العامة والكلام هنا عن مالكة المكان أ/ أمنية طلعت وشريكتها المذيعة/ رانيا زكى.. والاثنين مجال شغلهم كان فى الصحافة والميديا بشكل عام وفى مواقع مختلفة وده صنع حالة من الوعى عندهم وخلاهم يفكروا فى التسويق للثقافة والفن بشكل جديد ومتميز فكانت ديالونا. كاميرا: امسك كاميرا وامشى فى المكان علشان تشوف حفلات توقيع وموسيقى وفن تشكيلى وجاليرى وبيع لوحات وحتى إكسسوارات (المهم يكون لها فكرة جمالية) وبيع كتب علشان متعاقدين مع دور نشر كثير زى "روافد.. العين.. دوِّن.. الدار.. اقرأ" وفيه ورش وتدريبات فى "السيناريو.. القصة.. الرواية.. بيانو.. عود.. كمان.. جيتار.. رسم للأطفال.. المختبر العلمى للأطفال". وأنت هناك تقدر تتفرج على التليفزيون أو تسمع مزيكا أو تقرأ وتشرب حاجة (بأسعار لطيفة جدًا) أو تشترى كتاب أو تستنى ندوة.. وأنت هناك ممكن تفهم يعنى إيه ديالونا!
تسوق
كريولان: الماركة المحترفة الأشهر في عالم الميك أب وصلت المهندسين

كريولان: الماركة المحترفة الأشهر في عالم الميك أب وصلت المهندسين

نعتقد أن المقال ممكن يبقى ممل جدًا لو افتتحناه بكليشيه من نوعية "ما فيش بنت ما بـ تحبش الميك أب... إلخ، إلخ، إلخ"، وبالتالي إحنا هـ ندخل في الموضوع على طول لأن المقال ده مخصوص لكل اللي مهتم بالميك أب، سواء فنانين محترفين أو مجرد واحدة الميك أب بالنسبة لها من الاحتياجات الأساسية. من سنة بالضبط، كريولان – Kryolan فتح محل خاص به في المهندسين؛ كريولان –للي ما يعرفهاش- هي من أشهر ماركات الميك أب في العالم اللي بـ تستخدم مش بس لغرض التجميل في عروض الأزياء، دي كمان بـ يستخدموها كثير من فناني الميك الأب المحترفين في المجال السينمائي والمسرحي، وبالتالي إحنا بـ نتكلم عن نوع ميك أب مش هـ يسيح مع الحر والإضاءة. المحل ديكوراته بسيطة جدًا، ما يفرقش كثير عن المحلات اللي بـ تبيع أدوات التجميل فيما عدا أنهم بـ يقدموا منتجات شركة واحدة بس، توقعنا أن القائمين على خدمة البيع في المحل هـ يكونوا من النوعية اللحوحة اللي بـ تفضل ماشية وراءك طوال جولتك في المحل، وبـ تحاول تبيع لك أي حاجة، ولكن على العكس تمامًا، استقبلنا شاب بملابس فورمال، واللي سهل علينا مهمتنا لأنه كان مذاكر كويس كل منتجات الشركة واستخدماتها بالتفصيل. بدأنا بمجموعة كريمات الأساس واللي كان متوفر منها مجموعة درجات كثيرة تناسب كل ألوان البشرة، للمحترفين كان فيه بالتة فيها 24 درجة مختلفة (1000 جنيه). أما سعر عبوة الدرجة الواحدة، واللي حجمها أكبر من حجمها في البالتة فسعرها (275 جنيه). للاستخدام الشخصي فيه بالتات صغيرة فيها حوالي 5 درجات مختلفة بـ تختلف الدرجات فيها حسب لون بشرتك وسعرها (350 جنيه)، وضح لنا القائم على خدمة البيع أن كرايولان دمجت الكونسيلر في كريم الأساس في المجموعة دي علشان يكونوا بنفس اللون. بعدها عرض علينا مجموعة من ظلال الجفون، واللي موجود منها بالتات بأحجام ومجموعات لونية مختلفة، أما الدرجة الواحدة منها فسعرها (100 جنيه) ولكن حجمها كبير زي حجم أحمر الخدود واللي هو كمان سعر الدرجة الواحدة منه (100 جنيه)، بالنسبة للروج ففيه منه أشكال وألوان مختلفة؛ فـ "صباع" الروج العادي سعره (100 جنيه)، أما البالتات للمحترفين فيه مجموعتين (24 لون) سعر الواحدة منهم (1000 جنيه)؛ الأولى منهم درجاتها Matte معهم درجة أبيض وأسود وجليتر للتفتيح والتغميق وإضافة لمعة. أما الثانية فدرجاتها كلها فيها لمعة، أما سعر الـ 12 لون (650 جنيه)، المجموعات الأصغر فيها 6 درجات من نفس المجموعة اللونية (350 جنيه) ممكن يستخدموا برضه كأحمر خدود، أما مجموعة الميني (350 جنيه)، ففيها مجموعة كبيرة من الدرجات ولكن الدرجة الواحدة ممكن تستخدم لمرة أو مرتين على الأكثر لأن حجمهم صغير جدًا. كريولان كمان عارض مجموعة من الفرش اللي بـ يختلف حجمها حسب الاستخدام، سعر الواحدة منهم بـ يصل لـ 220 جنيه، أما سعر مجموعة الاستخدام الشخصي المكونة من 7 فرش –واللي موضوعين في حافظة من الجلد- سعرهم كان 470 جنيه وبقى عليهم خصم فسعرهم (250 جنيه). آخر حاجة سألنا عنها كانت سبراي مثبت الميك أب، وسعره (190 جنيه). في رأينا، أي حد فعلًا مهتم بجودة الميك آب اللي بـ يستخدمه لازم يجرب يزور محل كريولان، وخصوصًا أن مستوى أسعاره يعتبر معقول بالنسبة لجودته وشهرته، وطبعًا لماركات ثانية عالمية، ده غير أنه مفيد جدًا لأي فنان ميك أب محترف محتاج مجموعات لونية مختلفة بجودة عالية.
صحة ولياقة
ذا نيل سبا: منتجع رائع للعناية بالأظافر فى المهندسين

ذا نيل سبا: منتجع رائع للعناية بالأظافر فى المهندسين

أنك تلاقى مانيكير مميز فى القاهرة دائمًا مهمة صعبة، بس دورى كويس وأكيد هـ تلاقى. إحنا عن نفسنا كنا عاوزين مكان بـ يقدم عناية بالأظافر ونجرب فيه ستايل طلاء "الكافيار" الجديد، ومن هنا قررنا نروح على صالون فى المهندسين ألوانه كلها وردى×وردى، وهو "ذا نيل سبا – The Nail Spa". الصالون المكون من دورين فى عمارة على شارع الفواكة تم تجديده من فترة قريبة. وصلنا فى أول الليل بدون أى حجز وطلبنا نعمل مانيكير وباديكير (120 جنيه) وطلاء أظافر يد كامل من الكافيار (15 جنيه/ الظفر). تغيير نوع الطلاء يكلفك حوالى 25 جنيه، فى وقت وجودنا وسط اللوبى بأرضيته الوردى، لاحظنا مجموعة من الشنط والمحافظ المقلدة، مرتبة بشكل لطيف جنب الكنب الجلد الأبيض. بعد وقت بسيط، موظفة الاستقبال عرفتنا بأخصائية الأظافر وأخذتنا للدور العلوى. وعلشان كنا مجموعة، قعدونا جنب بعض على كراسى كبيرة مريحة جدًا لها مساند، أمامها أحواض الباديكير وعرضوا علينا نشرب شاى أو قهوة كهدية من المكان. كل واحد منا كان معاه اثنين أخصائيين، واحدة للقدم والثانية بـ تركز على الأيدى، وده سبب لنا تركيز شوية وراحة فى نفس الوقت. شغلهم كان قمة فى الاجتهاد؛ الأظافر تم قصها وبرَدها لشكل معين، تم عمل تقشير لأيدينا وأقدامنا وعملوا لهم مساج، ونظفوا زيادات الجلد حول الأظافر وشالوا الجلد الميت. وسط مرحلة الباديكير، عرفنا أن مجموعة طلاء الأظافر الموجودة كانت بكل غرابة معروضة فى الدور الأرضى وأننا المفروض كنا نختار فى الأول. عمومًا، ومن غير كلام كثير، نزلنا تحت واختارنا مجموعة من الألوان المبهجة من مجموعتهم الكبيرة المتنوعة من طلاء الأظافر، وبعدها نفذوا الطلاء المكون من طبقتين بكل حرص على أصابع القدم. بعد كده لبسنا شباشب من الفوم، وأخذونا لترابيزة علشان يضعوا طلاء الكافيار على أظافر الأيدين. مجموعة الألوان الموجودة كان منها المبهج، والبراق، والباهت وتقدرى تعملى خليط من ثلاثة ألوان. اختارنا خليط تقليدى من الوردى الفاتح، والوردى الباهت والأبيض، والنتيجة كانت تشبه لون الملبس. الأخصائية أخذت وقت علشان تتأكد أن الكافيار تم وضعه بشكل صحيح واتغلف بطبقة عليا شديدة. صعب نلوم عملية الطلاء علشان الكافيار معروف عنه أن آخره يومين ويبدأ يتقشر. بجانب شغل الأظافر "ذا نيل سبا" بـ يقدم أظافر أكريليك، تنظيف كامل للجسم بالشمع سعره حوالى 200 جنيه، وهو إزالة الشعر بالسكر والليمون مع عمل الفتلة، بس اعملى حسابك تحجزى قبلها. نقدر نقيم تجربة "ذا نيل سبا" أنها مريحة ومرضية، قدر فيها الموظفين الودودين أنهم يقدموا نتائج ممتازة.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن