جيزة, Cairo_360_cairo_by_area - كايرو 360
القاهرة بالمناطق

جيزة

جيزة

الجيزة منطقة مشهورة بأنها المكان اللى موجود فيها الأهرامات، "الجيزة" اسم مرادف للتاريخ المصري القديم. فى الوقت الحالى توسعت بشكل كبير جدًا لتشمل من أول الأهرامات الثلاثة وأبو الهول لحد الضفة الغربية من نهر النيل.

البنية التحتية للجيزة تغيرت مرات عديدة عبر السنين لتأثرها باحتلالات متعددة مرت عليها، الاحتلال البريطانى فى القرن التاسع عشر والعشرينيات أحدث اختلافات فى شكل الشوارع والطرق والمبانى فى المنطقة، وقبل ثورة 1952 كان عليها اهتمام كبير للقيمة الأثرية اللى بـ تتميز بها.

فى حين أن الانتقال من شارع للثاني فى الهرم صعب بسبب الزحام المستمر إلا أنه أصبح أسهل من بعد افتتاح الطريق الدائري والخط الثاني لمترو الأنفاق اللى مش بـ يوصلك مباشرة للأهرامات، بـ تنزل فى أول الهرم عند محطة "الجيزة" وبـ تأخذ أى تاكسي يوصلك فى أى مكان لحد الأهرامات. قبل كده كان شارعي الهرم وفيصل هما الطريق الوحيد الموصل لها، لكن قلت أهميتهم دلوقت من بعد ظهور الطريق الدائري.

الجيزة تعتبر أكثر مكان جذاب لأى حد بـ يزور مصر لأن فيه ملاذهم لوجود العديد من الفنادق، فمثلاً فندق "مينا هاوس أوبروي" مشهور من زمان جدًا أنه الفندق اللى استضاف أهم المشاهير حول العالم زي: ريتشارد نيكسون ووينستون تشرشل، وفرانك سيناترا، وتشارلى تشابلن، تم بناؤه عام 1869 وخضع للعديد من التجديدات والإصلاحات علشان يحتفظ بصورته وسمعته كأفضل الفنادق فى مصر، ده غير الفنادق الثانية الموجودة زي: فندق المريديان بيراميدز، موفنبيك ريزورت، وميركيور كايرو لو سفنكس كلهم بـ يطلوا على منظر رائع، وخدمة ممتازة، وعلى الرغم من أنه لسه بـ يتم بناؤه، المتحف المصري الكبير تحت الإنشاء حاليًا بالقرب من الأهرامات وهـ يكون مستودع لحفظ أكبر تشكيلة من الأنتيكات.

من الحاجات اللى ما ينفعش تفوتك فى منطقة الأهرامات برضه عرض "الصوت والضوء"، العرض بـ يحكي تاريخ مصر القديمة على لسان أبو الهول وعرض مبهر بمؤثرات صوتية وضوئية تصلح أنها تكون خروجة عائلية بالليل، ده غير أن ساحة الأهرامات بـ يقام فيها حفلات موسيقية وحفلات خاصة وعروض أوبرا زي "أوبرا عايدة".

ولو تعمقنا أكثر فى منطقة الجيزة هـ نلاقى أنها مشهورة بوجود جامعة القاهرة فى قلبها، تم تأسيسها عام 1908 كمحاولة لنشر العلم وتم تحديد مكانها فى الجيزة عام 1924، وفيها كليات كثيرة زي: الحقوق، والصيدلة. والقصر العيني كان أول كلية للطب فى أفريقيا والشرق الأوسط، وحول الجامعة هـ تلاقى العديد من المكتبات ومحلات الأدوات المكتبية والكافيهات لتلبية احتياجات كم الطلبة الضخم فى الجامعة.

من الأماكن المشهورة كمان فى منطقة الجيزة هو "حديقة الحيوان"، افتتحها الخديوي إسماعيل عام 1891، وكانت حديقته الخاصة فيها نباتات من أفريقيا وأمريكا الجنوبية والهند وفيه شجرة مشهورة تم زراعتها فى عهده لسه موجودة لحد دلوقت هناك، خلال القرن العشرين كانت حديقة الحيوان بـ تعتبر من أفضل الأماكن اللى بـ تضم حوالى 400 فصيلة من الكائنات الحية فى العالم، وعلى الرغم من أن جزء من الحديقة تم بيعه للعامة علشان يبنوا عليها منازل خاصة إلا أنها مازالت مشهورة واستقبلت حوالى 3 مليون زائر عام 2007.

كورنيش الجيزة بـ يبدأ من أسفل كوبري الجيزة لحد كوبري الجلاء اللى بـ يوصل على الزمالك والتحرير، على ضفاف النيل هـ تلاقى كثير من المطاعم والكافيهات الموجودة فى مراكب كبيرة ثابتة، واللى منها بـ تبص على النيل ومنها هـ تلاقى صف من البنايات السكنية اللى بـ نحسد أصحابها لأنهم بـ يطلوا على منظر من أروع ما يكون، من المطاعم المميزة فى المنطقة دي: فرايدايز، سويس أير، وفيه نايت كلوب زي: ياسو لاونج وبامبو.

كمان على كورنيش النيل هـ تلاقى متحف أحمد شوقى، المكان فى الأساس كان بيت الشاعر الكبير أحمد شوقى وبعد وفاته تم تحويل المكان إلى متحف ومركز ثقافى وبـ يحمل أكثر من 300 كتاب خاصين به وشعر مكتوب بخط اليد، وتم وضع تمثال من البرونز فى حديقة المتحف فى الذكرى الخمسين لوفاته.

أيًا كانت زيارتك لمصر لازم تعدي على الجيزة علشان تستمتع بأماكن الترفيه المختلفة فيها سواء كانت سياحية أو اجتماعية.

الخريطه
الأبرز
مطاعم
كشري الونش: صدمة كبيرة في الجيزة

كشري الونش: صدمة كبيرة في الجيزة

إحنا أكثر ناس تقدر الكشري وممكن تسافر بالمشوار علشان طبق مخدوم وطعمه حلو، لفينا كتير وعملنا قائمة بأحسن 10 محلات كشري في مصر، صحيح التصنيف اتغير بسبب الجودة اللي اتغيرت في أماكن كتير منها، لكن في النهاية مازلنا بندورعلى أفضل طبق كشري. "كشري الونش ده مش هزار..أحسن كشري في الجمهورية" جملة سمعناها في إعلان مستواه ماعجبناش لكن الجملة استفزتنا جدًا، وبدأنا ندور على العنوان المذكور في الإعلان علشان ندوق أحسن كشري في مصر، وهنا كانت الصدمة الأولى، للأسف المحل في مكان مش سهل يتراح له بالموصلات في قلب الجيزة، لازم عربية ملاكي أو البديل مشي كتير كرهنا في التجربة من قبل ما تبدأ، وحتى لو في عربية ملاكي هتتبهدل في الزحمة الرهيبة لمحيط ميدان الجيزة. الشيء الوحيد اللي كان بيصبرنا في الطريق هو ريحة ومنظر طبق الكشري الرائع اللي بنمني نفسنا بيه، بعد مشي كتير وصلنا، وجاء لنا تاني صدمة، المشهد ماكنش زي ما تخيلنا وظهر في الإعلان إن المحل ضخم وكبير، تقريبًا كان أصغر محل كشري دخلناه في حياتنا، فعلًا مخرج الإعلان يستحق جايزة على الخدعة الكبيرة اللي تحسس كل اللي يتفرج أنه داخل على صالة مالهاش مثيل. المحل من جوه لطيف لكن زي ما قولنا ضيق جدًا، وتقريبًا هم أربع ترابيزات في المحل كله! والصدمة التالتة إن ماكنش فيه حد، هنا بدأ الخوف الحقيقي يدخل قلبنا، مافيش محل كشري بيكون فاضي، خاصة لو كان له اسم زي الونش، بدأ الشك يتسرب لنا إن طبق الكشري اللي منتظرينه مش هيكون بحجم التوقعات. جاء لنا ويتر المحل وكان في قمة الذوق ولابس يونيوفرم، نزل الأطباق ومشي، وابتدا السحر، الكشري فعلًا كان حلو، والصلصة رائعة بشكل خاص، حسينا إننا ظلمنا ومع كل معلقة كنا بناكلها كنا بنسأل نفسنا إزاي المحل فاضي بالشكل ده مع إن الكشري حلو ومخدوم ومش صادم، لما جينا نحاسب اكتشفنا السر، طبق الكشري العادي عند الونش بـ 9 جنيه وده رقم غريب جدًا بالنسبة لمحل كشري في منطقة شعبية زي الجيزة، الأسعار كلها 9 و12 و15 وهكذا بالنسبة للطواجن والأطباق. "أنضف كشري في مصر" عنوان اليافطة المضيئة اللي على واجهة المحل، صحيح هو كان نضيف وطعم لكن مضيع نفسه بالسعر غير المنطقي والإعلان اللي بيرفع سقف التوقعات جدًا، عرفنا إن كان عندنا حق في كل كلمة لما اتمشينا شوية ولاقينا كشري زيزو على بعد أمتار منه مش باين من كتر الناس اللي جواه وطبعًا مش محتاجين نقول إن طبق الكشري العادي بـ 5 جنيه، يعني فرق أربعة جنيه في الطبق.
كافيهات
لابوم: حلويات سعرها رخيص نودع بيها رمضان

لابوم: حلويات سعرها رخيص نودع بيها رمضان

الحلويات جزء أصيل من الشخصية المصرية، بنحبها رغم صراعنا الدائم مع الريجيم، خصوصًا الحلويات الشرقية، وفي رمضان المصريين بيقفلوا باب الريجيم بمفتاح، وبيدورا على أحسن الأماكن اللي بتقدم حلويات شرقية، وإحنا اختارنا ننهي شرهر رمضان بزيارة لحلواني لابوم فرع الجيزة، اللي بيوفر حلويات شريقة مميزة بسعر مناسب جدًا. أول ما تدخل لابوم هتلاحظ النضافة اللي مسيطرة على المكان، وإحنا بنعتبر أن نضافة المحل واهتمام العاملين بنظافتهم الشخصية دليل حقيقي على أنهم بيهتموا بالأكل كويس، ودي حاجة مطمئة جدًا بالنسبة لنا، رغم الزحام الشديد في المحل لكن الجو العام كان مريح، تحس ببهجة رمضان وفي نفس الوقت بهجة انتظار المصريين للعيد. اختارنا اللي إحنا عايزينه من لابوم وطلبنا من المحل يوصل لنا اللي اخترناه لحد البيت لأننا كنا رايحين مشوار، ولما رجعنا البيت لقينا الحاجات اللي طلبناها في انتظارنا، (خدمة التوصيل لحد البيت 7 جنيه) طلبنا طبق مشكل سوري مكون من بسبوسة وكنافة بالقشطة وكنافة بالبندق وهريسة وجلاش بالبندق وجلاش بالقهوة، (سعر الطبق الكبير 100 جنيه)، الحلويات كانت رائعة، وسكرها مظبوط، وحسينا بطعم السمن البلدي في كل الحلويات. جربنا كمان الحلويات الشرقية اللي بيتميز بها لابوم، (الكيلو منها 150 جنيه) لكن إحنا طلبنا كمية تكفي شخص واحد (22 جنيه ونصف)، عجبتنا جودة الحلويات، ومقولة إن لابوم بيعمل حلوياته بالسمن البلدي طلعت حقيقية! تجربتنا مع لابوم كانت مميزة، الطلب وصل البيت في الميعاد اللي اخترناه، واسلوب العاملين كان مميز رغم الزحام في المكان، وأكيد هنرجع تاني، هو مين قال إن الحلويات لشهر رمضان بس؟
القاهرة بالليل
الخيمة: استمتع برمضان فى الجيزة

الخيمة: استمتع برمضان فى الجيزة

فى كل سنة بـ نشوف خيام رمضان بـ تزيد فى أنحاء المدينة علشان تحقق رغبة سكان القاهرة المستمرة أنهم يقضوا سهرة لطيفة. فجأة، بقت نكهات الشيشة المميزة، والموسيقى الشرقية الهادئة والوجبات الشرقية المعروفة اللى بـ تُقدم هي العلامات المميزة لأي مكان جديد، فكرة "مكان للخروج وخلاص place to be"" تحولت بسرعة إلى حاجة مختلفة خالص عن اللي نعرفه. وعلشان يتماشى مع العصر اختار منظم الحفلات "باى جانز" «واى لاونج –Y-Lounge » الموجود فى الجيزة علشان يقدم كل ده فى خيمة رمضانية اسمها "الخيمة". يمكن الموضوع له علاقة بالموقع (اللى دائمًا بـ يفكرنا أنه نادى ليلى موجود على مركب تريانون)، أو يمكن له علاقة بجو المكان اللى بـ يعمله باى جانز، لكن سهل قوى نقول أن الخيمة هى أقرب حاجة لنادى ليلى هـ تلاقيها فى رمضان، على الأقل قائمة الضيوف عند الباب وصلت لنا نفس الإحساس. الخيمة فيها قعدة فى الهواء الطلق وقعده داخل المكان. رغم أن القعدة فى الهواء الطلق بـ تطل على منظر تحفة على النيل، لكن صعب تقعد فيها علشان الجو بـ يبقى حر قوى. إحنا بـ نفضل نقعد جوه، المكان واسع والإضاءة مناسبة وكمان الأسقف عالية. ديكورات المكان بسيطة أغلبها مقاعد لونها أبيض ونجف مدور، والستائر شفافة مغطية الشبابيك، والحليات الأرابيسك ماشية مع الكنب بألوانها التركواز والبنفسجى. منيو الأكل لبنانى، بدأنا بجبنة بيضاء بالطماطم، وحمص، وجبن الحالومى وطعمية. سعر أى مقبلات باردة 18 جنيه، أما المقبلات الساخنة زى المقانق والعرايس فسعرها بين 30 و40 جنيه. قسم الرمضانيات فيه فول، وطعمية وبيض أسعاره تتراوح بين 10 و30 جنيه. كمان طلبنا عصير ليمون بالنعناع مع عصير كيوى، سعر المشروبات من 15 لـ 30 جنيه. إحنا جربنا جبنة بالطماطم أحلى مرات كثيرة، قوام الجبنة كان غير متماسك وده أثر على الطعم. طعم الحمص كان لذيذ مع ملمسه المتماسك، لكن كان يبقى أفضل لو فيه شوية ليمون أكثر عليه. جبن الحالومى كان طعمه حلو لكن الطعمية كان فيها بهارات زيادة شوية. على الناحية الثانية، طعم المقانق كان لذيذ فعلاً. وبـ يُقدم فى طبق صغير، قطع السجق الصغيرة كانت تحفة بطعمها المشطشط. وعرايس اللحم كمان كانت حلوة جدًا بسطحها المقرمش والحشو الطرى. كمان من الحاجات البارزة فى الوجبة عصير الكيوى الطازج، اللى فعلاً يروى العطش بطعمه المسكّر. الليمون بالنعناع برضه كان لذيذ، لكن محتاج كمية سكر أقل شوية علشان تحس بالطعم اللاذع. يوجد أيضًا اختيارات من مشروبات رمضانية سعرها 18 جنيه فـ قررنا نشرب سحلب، لكن للأسف جاء لنا إحباط أن السحلب كان خلص. الخيمة بـ تقدم اختيارات ثانية كثيرة فى المنيو زى طواجن الفتة أسعارها بين 30 و40 جنيه ومجموعة من الأطباق الرئيسية سعرها بين 50 و120 جنيه زى أطباق الميكس جريل وأطباق السى فوود. كمان الحلويات التقليدية زى أم على والأرز باللبن، والأسعار بـ تتراوح بين 20 و40 جنيه. المنيو كمان فيها اختيارات خفيفة، وصحية أكثر علشان تقدر تأكل وجبة خفيفة بالليل زى زبادى بالعسل وطبق فواكة. الخدمة المقدمة فى الخيمة بـ تتميز بالكفاءة واليقظة، وكمان المعاملة لطيفة واحترافية. بوجه عام التجربة كانت ممتعة، وعلشان كده المرة الجاية لو فكرنا فى مكان نشرب فيه شيشة (20: 25 جنيه) ونلعب طاولة، وكمان نستمتع بجو لطيف له إطلاله على النيل، يبقى أكيد هـ نروح على "الخيمة".
فن وثقافة
مكتبة مصر: جنة كتب حقيقية ومكان مريح للأعصاب في الجيزة

مكتبة مصر: جنة كتب حقيقية ومكان مريح للأعصاب في الجيزة

ساعات بـ تحس أنك محتاج مكان جديد تتردد عليه بانتظام ويكون ملجأ لك لما تحب تنفرد بنفسك، وتفكر بهدوء، وتحس أنك بجد بـ تستجم عقليًا، وبـ ترمم دماغك من كمية الضغوط والمشاكل اللي بـ تواجهك في كل دقيقة، إحنا نعرف مكان كده اسمه "مكتبة مصر"، المكتبة دي في الدقي لكنها معزولة بشكل عجيب عن الدوشة، وموقعها بـ يطل على النيل مباشرة، وكل حاجة فيها لونها أبيض، والناس اللي شغالة فيها بـ تحافظ على الهدوء، وبـ تحب شغلها، ولما تروح هناك بجد هـ تتبسط ومش هـ تندم أنك رحت. المكتبة ممكن تروح لها بثلاث طرق من ثلاث اتجاهات، لو أنت في الجيزة، تعالى عند مديرية أمن الجيزة، ومن هناك هـ توصل بسرعة في ثواني، وهـ تلاقي يافطة على أول الشارع بـ تقول لك أن المكتبة موجودة، ولو أنت في الدقي عندك طريقتين تروح بهم: إما أنك تدخل شارع النيل اللي على أوله الشيراتون وتتمشى وسط المنظر التحفة اللي هناك على النيل، أو تدخل الشارع اللي فيه مجلس الدولة ومدرسة الأورمان اللي بـ يوصل لك على مديرية الأمن وهـ تلاقيه في السكة برضه... أنت وراحتك. كان اسمها قبل الثورة "مكتبة مبارك العامة" ولها فروع في دمياط والزيتون، وتم تغيير اسمها إلى "مكتبة مصر" بعد الثورة، لكن سيبك أنت من الاسم أهم حاجة المضمون، وفعلاً المكتبة من الداخل تحفة، مكونة من أربعة أدوار وجنينة، الجنينة فيها أماكن للقعود، علشان لما تستعير كتب وتحب تقرأها قبل ما تمشي في المكتبة تقدر تقعد وتستمتع بالمشهد حولك، أما المكتبة نفسها ففي الدور الأرضي هـ تلاقي شئون الاستعارة والاشتراكات والدفع والمعاملات، والإعلانات عن الندوات. وفي الدور الأول هـ تلاقي الكافيتريا وقسم القراءة للكبار، كتب رصينة ومهمة في كل المجالات، مقسمة وتقدر تتبع الكتاب، وكمان فيه مراجع ضخمة جدًا وقواميس قديمة وضخمة برضه، ودي مش للاستعارة، للاستخدام الداخلي لكن مهمة، ومنها حاجات نادرة وغالية جدًا المكتبة هـ تسعفك فيها. في الدور ده هـ تلاقي كافيتريا ممكن تدخل تقرأ داخلها وتشرب أو تأكل حاجة وأنت بـ تقرأ، والكافيتريا دي ميزتها أن فيها كل أنواع الجرائد والمجلات اللي ممكن تخطر على بالك من أول الأهرام لحد الفجر، ومن أول روزاليوسف لحد النيوزويك النسخة العربي، وفي الدور ده كمان هـ تلاقي أجهزة كمبيوتر مظبوطة على أنك تقدر تعمل بها بحث عن اسم الكتاب اللي أنت عاوزه، ويقول لك مكانه، وعدد النسخ المتوافرة منه، أو تبحث عن كاتب معين وعدد الكتب المتوفرة له. في الدور الثاني متعة خاصة، ده بقى دور الأطفال، والشباب، دور حلو جدًا، كله قصص وروايات، قصص عالمية وكتب عن حاجات كلنا بـ نحبها، إحنا تحديدًا من عشاق ركن قصص الرعب والأشباح ودي هـ تلاقي على الرف بتاعها قصص صرخة الرعب، وقصص دكتور أحمد خالد توفيق أسطورتنا.. كمان هـ تلاقي كل أعمال أجاثا كريستي، والروايات العالمية.. بجد متعة. علشان تشترك في مكتبة مبارك لو أنت صغير سنك أقل من 18 سنة هـ تدفع 16جنيه ونص ثمن الاشتراك واستمارة العضوية وهـ تحتاج صورتين شخصيتين وصورة من شهادة الميلاد، أما لو كنت أكبر من كد فـ هتحتاج 31 جنيه ونصف ثمن العضوية واستمارة الاشتراك، وصورة بطاقتك وصورتين شخصيتين لك، والاشتراك بـ يستمر لمدة سنة كاملة، تقدر خلالها تستعير خمسة كتب كل ما تروح المكتبة وتستعير غيرهم بشرط أنك ترجعهم قبل مرور أسبوعين كاملين، لكن لو عجبك الكتاب قوي وحابب تكمله في البيت ممكن تجدد الاستعارة من خلال التليفون وتكمل الاستعارة أسبوعين كمان، وترجعهم وتأخذ غيرهم وهكذا.
تسوق
كيمونو كريز: بوتيك إلكتروني للكيمونو الياباني في القاهرة

كيمونو كريز: بوتيك إلكتروني للكيمونو الياباني في القاهرة

انطباعنا الأول عن موضات الملابس الجديدة والمطرقعة أنها غالبًا مش مريحة ومش عملية، بس الوصول للجمال محتاج تعب، صح؟ بوصول موضة الكيمونو السنة دي وتحوله لموضة منتشرة، من حق كل عشاق التسوق دلوقت بس يعيطوا من الفرحة، أه والله، أيوه بـ نتكلم جد، موضة مريحة وشكلها جذاب ومنتشرة. "كيمونو كريز - Kimono Kraze" هو مشروع بيتي ناشئ لحبيبة أحمد، بـ تديره من خلال حساب على أنستجرام وصفحة الفيسبوك، وبـ تقدم فيهم كل أنواع الكيمونو الجاهز والتفصيل بكل الأطوال والأشكال. دخلنا الأول على أنستجرام وتفرجنا على عشرات الأشكال من الكيمونو الجاهز، أكثر الحاجات اللي عجبتنا كانت كيمونو حرير بنفسجي فاتح (160 جنيه) وكيمونو دانتيل قصير سماوي ووردي (150 جنيه)، وكيمونو دانتيل أسود بشراشيب (180 جنيه) وكيمونو طويل نبيتي (200 جنيه). قررنا بما أننا في موسم الصيف وده وقت الاسترخاء على البحر نطلب كيمونو دانتيل قصير (150 جنيه) وكيمونو أسود طويل دانتيل (200 جنيه)، وبعتنا لهم رسالة بطلبنا، من حسن الحظ أنهم ردوا علينا سريعًا واختياراتنا كلها كمان موجودة، وبعدها بعتنا العنوان ورقم التليفون علشان تأكيد الطلب. الطلب احتاج 13 يوم علشان يوصل وتكلفة التوصيل كانت 50 جنيه، الحقيقة أن التسوق الإلكتروني في مصر لسه بـ يعاني من مشكلة –تحديدًا الاتفاقات اللي بـ تتم من على شبكات التواصل الاجتماعي– بس عمومًا، وبعيدًا عن أن الطلب احتاج حوالي أسبوعين علشان يوصل، ما نقدرش نقول أن كيمونو كريز عليه ملاحظات كبيرة، كنا خائفين كمان من حكاية فكرة المقاس الواحد للكيمونو، بس المدهش أن فعلًا مقاسه كان مضبوط وطوله بالمسطرة. بشكل عام، تجربة التسوق من على كيمونو كريز كانت ناجحة بكل المقاييس، وكفاية أننا اشترينا طلبنا من غير الوقوف في طوابير طويلة وغرف اختبار الملابس الزحمة (أيوه، الحياة صعبة)، وأكيد هـ نشتري من عندهم ثاني. بصراحة شديدة، كيمونو كريز يعتبر إضافة هائلة للمشروعات المحلية اللي بـ تعرض منتجاتها على الإنترنت، إيه اللي هـ يحصل لو الكيمونو موضته انتهيت –لا سمح الله– دي قصة ثانية خالص.
صحة ولياقة
ورلد جيم: جيم كلاسيكي في الجيزة

ورلد جيم: جيم كلاسيكي في الجيزة

مع كل نهاية فصل القاهريين بـ يهجموا على كل النوادي الرياضية ومراكز الجيم للتدريب وتعويض الوزن الزائد من أنتخة ودفء الشتاء وكمان علشان فورمة الساحل (أي كلام وخلاص)، الفترة دي فكرة أنك تواظب مع جيم كويس حاجة صعبة جدًا بسبب الزحمة المبالغ فيها وتضطروا تنتظروا أدواركم أمام كل جهاز كأنكم في طابور عيش، غير "الكروتة" من المدربين والأنفاس الكثيرة، لكن مع نهاية الصيف الحركة بـ تقل وتقدروا تنتظموا مع جيم كويس ونظيف زي الجيم اللي هـ نكلمكم عنه النهارده. "ورلد جيم - World Gym" في شارع همدان بالقرب من ميدان الجيزة، يعتبر من مراكز الجيم القديمة في المنطقة من سنة 2001 وحصل له تغيير وتعديل أكثر من مرة علشان يناسب معايير المراكز الثانية وفي نفس الوقت بأسعار معقولة مش مبالغ فيها، بواجهة كبيرة باسم "World Gym" باللون الأحمر أكيد هـ يلفت نظركم، سلم صغير وبعد كده بـ تكونوا في صالة كبيرة، على شمالكم هـ يكون مكتب الاستقبال وعلى اليمين ثلاثة أنتريهات حديد للانتظار، وفي واجهة المدخل لصالة التدريب وغرف ملابس الرجال وقبلها على الشمال غرف ملابس وتواليت السيدات. بـ تدخلوا من باب هـ تلاقوا غرف ملابس الرجالي والساونا وحمامات البخار والجاكوزي وكمان التواليت وغرف الاستحمام على يمينكم ومدخل صالة التدريب في الوجه، صالة التدريب عبارة عن دائرة إلا ربع كبيرة بـ يكون فيها قسم الـ Fitness على شمالكم وده مكون من أجهزة المشي والعجلات وأجهزة أخرى ومساحة كبيرة للتمارين زي عضلات البطن وغيرها، أما النصف الثاني على اليمين فهو نصف الـ Body Building مليان بأجهزة الحديد والأوزان الثقيلة وما تتخضوش لو سمعتوا صوت أشبه بالزعيق أو حاجة "دول الأولاد بـ يتدربوا"، أجهزة صالة التدريب تعتبر من الأنواع الحديثة نسبيًا لكن فيه أحدث من كده بكثير، لو قارننا السعر بالمستوى ده يبقى كويس جدًا. مستوى النظافة في كل الجيم كويس جدًا لكن الأجهزة مش قوي يعني مثلًا مافيش وسيلة للتنظيف من مكان لعب اللي قبلكم زي أماكن ثانية، كمان لازم تجيبوا معاكم فوطتكم الشخصية لأن المكان مش بـ يقدم فوط للتدريب أو للاستحمام برضه زي أماكن ثانية، باقات الاشتراك في الجيم هي شهر واحد (400 جنيه) ودعوة لشخص يتدرب معاك مجانًا، اشتراك ربع سنوي (3 شهور) 1000 جنيه و10 أيام هدية مع 3 دعوات للتدريب مجانًا، اشتراك نصف سنوي (6 شهور) 1700 جنيه مع شهر اشتراك هدية و5 دعوات للتدريب مجانًا، اشتراك سنوي (2800 جنيه) مع شهرين اشتراك هدية و8 دعوات للتدريب مجانًا، الاشتراك بـ يضم الدخول لصالات الجاكوزي والساونا وحمامات البخار وجلسات التغذية ومدربين اللياقة البدنية وكمال الأجسام، يعني تقدروا تقولوا "اتدرب وانبسط يا شعب". مستوى المدربين في ورلد جيم كويس ومعقول ووقت زيارتنا كان فيه مدرب بـ ينظم حصة تدريب عضلات البطن وكان أشبه بضابط جيش بـ يدرب الجنود بكل حزم واحترافية وقوة، ولو طلبت من حد منهم المساعدة هـ يرحب جدًا ويتابعكم من جهاز لجهاز بس تبقى معرفينهم إيه هدفكم من التدريب وهـ يساعدوكم في الوصول له في الوقت اللي أنتم عاوزينه بس تستحملوا. ورلد جيم يعتبر من المراكز اللي تقدروا تتدربوا فيها بسعر مقبول وإمكانيات كويسة لكن مستوى النظافة نتمنى يكون أفضل من كده وياريت يكون فيه فوط للتدريب وللحمام.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

النهارده في القاهرة: إنشاد ومسرح وجولة سياحية وعروض أفلام

بداية ساخنة جدًا للفعاليات الفنية والثقافية في القاهرة تقول أن أول أسابيع ديسمبر جاي لنا بكل خير.. يللا نعدي سريعًا على الموجود النهارده ونشوف ممكن نروح فين. بعد جول