جوائز اختيارات محرري كايرو 360 لعام 2016 لأفضل مراكز الفن والثقافة - فن وثقافة Feature - كايرو 360
 







جوائز اختيارات محرري كايرو 360 لعام 2016 لأفضل مراكز الفن والثقافة
جوائز اختيارات محرري كايرو 360 لعام 2016 لأفضل مراكز الفن والثقافة
اصدرت في: 19/05/2016

كل مشروع بيبقى الهدف منه صناعة منتج ما، وباختلاف المنتج بتختلف طبيعة المشروع، وبتختلف قيمته كمان.
ومن هنا جت غلاوة الفن، ده لأن الفن بصوره المختلفة هو عبارة عن مشروع بيقدم أرقى إنتاج للنفس والعقل الإنساني، يعني بضاعته قيمة إنسانية حية متجددة بتجدد الزمن، مش حاجة هتستهلك وتروح لحالها..
وكل ما كان الفن محافظ على رسالته أكتر كل ما زادت غلاوته أكتر وأكتر..
وده يخلينا نحاول باستمرار نعبر عن تقديرنا الشديد واحترامنا البالغ للجهات الحريصة على أنها تقدم فن راقي بيلمس الروح بجد..
وهنا هنقولكم أفضل الأماكن اللي قدرت فعلًا تعمل كده، ولا زالت..

جوائز اختيارات محرري كايرو 360 لعام 2016 لأفضل مراكز الفن والثقافة:

زاوية – Zawya

الأماكن اللي بترفع القيمة اللي بتقدمها فوق كل حاجة دي أماكن تتشال على الراس، سينما زاوية واحدة من الأماكن دي، ده يظهر لك في طبيعة الأفلام اللي بتتعرض هناك اللي كلها أفلام تم اختيارها بعناية علشان تكون ذات قيمة حقيقية مش مجرد عروض للتسلية وخلاص، وهيظهر لك كمان في أسعار تذاكر الحضور اللي دايمًا مناسبة للجميع.



قاعة الزمالك للفن – Zamalek Art Gallery

لو فاكر أن أنواع الفنون محصورة في الكام حاجة المشهورة اللي نعرفهم بس فممكن تجرب تروح هناك مرة وأنت تشوف معارض أشكال وألوان هتخليك تغير فكرتك خالص.. بوابة حقيقية على عوالم تانية من الفن!

 

جاليري سفرخان – Safarkhan Gallery

ساحة الفن الكلاسيكي بامتياز، جرب تروح هناك علشان تبقى طبقت المثل اللي بيقول: "عاش زمنه وزمن غيره".. حرفيًا!

 

روم آرت سبيس -Room Art Space

تحس المكان بيتحول مع الوقت لصالون مفتوح على الدوام ومجهز لاستقبال كل أنواع الفنون المسموعة والمرئية وحتى الحركية.. جوكر يعني!

 

قاعة بيكاسو للفنون – Picasso Art Space

طريقة العرض نفسها فن مش كل الناس بتقدر تجيده، المكان ده قدر أنه بطريقة عرضه المميزة دايمًا يعزز من قيمة المحتوى الفني اللي بيتعرض عنده.


فوتوبيا – Photopia
كنز علي بابا بالنسبة لكل حد مهتم بمجال التصوير، كل حاجة بمعنى كلمة كل حاجة، بدايةً من ورش التعليم لحد المعارض لكبار المصورين..
افتح يا سمسم!

 

ماجنوليا Magnolia-

الباب المفتوح للفنانين الشباب أصحاب المواهب الفذة اللي لسه مش واخدة حقها في العرض، طريقة عمل المكان نفسه هتوصل لك قيمة أن الفن هو اللغة الوحيدة اللي تصلح كلغة مشتركة لجميع البشر مهما اختلفت طبائعهم وأفكارهم.

 

جيبسم جاليريGypsum Gallery -

 من الأماكن اللي عمرها مش كبير لكن وجودها مؤثر، السمعة الحلوة لما تتبني بالسرعة دي لازم تعرف أن وراها شغل عظيم ومجهود حقيقي. جاليري مصر المكان نفسه تحفة فنية يصلح للمشاهدة والاستمتاع بيه حتى لو فاضي!

يعني بيت فني شكلًا ومضمونًا.. والمعروضات هناك متجددة ومتنوعة بشكل يخليك تحس أنك بتزور متحف متكامل مش مجرد قاعة عرض.

 

مسرح الفلكي

المسرح قيمته الحقيقية بتيجي من عدد وطبيعة الفعاليات اللي بيستضيفها، ومسرح الفلكي في خلال فترة قليلة جدًا استضاف فعاليات فنية كتيرة ومتنوعة أكسبته قيمة كبيرة جدًا.

 

ساقية الصاوي El-Sawy Culture Wheel –

عمود العمل الفني والثقافي في العاصمة.. أي كلام عن المكان ده هيبقى بيقلل قيمته الحقيقية، فخلينا نكتفي بأننا نقول لكم ببساطة أنه اللي لسه ما دخلش مجتمع رواد الساقية هو في الحقيقة لسه ما انكشفش على إحدى أكبر الصور المضيئة للمجتمع المصري.

 

مسرح الجنينة – El-Genina Theatre
المسرح ده لو اتكتب له أنه ينطق هينطق يتكلم بكل لغات العالم وكل لهجات العرب وهيلعب مزيكا من كل شكل ولون؛ من كتر اللي عدى عليه واللي اتعرض على خشبته!

 

درب 17 18 – Darb 17 18

فكرة المكان نفسه بديعة جدًا!
أنه يبقى في قلب مجمع الأديان في مصر القديمة، ملتقى الثقافات والحضارات والأفكار على مر زمن طويل من تاريخ البشرية.. فكرة عظيمة أنك تعمل مركز فني وثقافي هيبقى دوره أنه يعبر عن الثقافات والأفكار والتقاليد في الموقع ده بالذات!

مركز الصورة المعاصرة – CIC

المهتمين بمجال التصوير كمان مرة، المكان هناك بيوفر متعة حقيقية وفائدة كبيرة سواء في المعارض المتكررة والمختلفة، أو في الورش التعليمية، أو في ندوات كبار المصورين، حاجة تستحق التقدير.

 

آرتس مارت - Arts Mart

الأماكن الجديدة لما تطلع بسرعة الصاروخ بيبقى قدامها بعد كده طريق من اتنين.. يا تفضل مكملة، يا تقع من سابع سما بنفس السرعة اللي طلعت بيها، المكان ده واضح أنه عارف سكته كويس.. والحفاظ على النجاح ما يجيش إلا من حد قدر يحترم عمله ويحترم جمهوره اللي بيخدمه، واللي يعمل كده ما يستاهلش غير كل احترام وتقدير.



آرت توكس – Art Talks

اسم على مسمى.. حكاوي الفن وتاريخه اللي في تفاصيل المكان قبل ما تكون في الفعاليات التثقيفية اللي بيقدمها.. ده غير النشاط المميز والمستمر للمعارض اللي بتعرض شغل أبرز الفنانين المعاصرين.

 

المسار جاليري - Al Masar Gallery

الفن المعاصر كتير بيطلع مظلوم بس علشان هو معاصر، تحس أننا كبشر عندنا ميل كده لتقدير القديم أكتر..
علشان كده الفنانين المعاصرين بيكونوا منتظرين الجهات اللي تاخدلهم حقهم بالبلدي كده وتظهر جمال فنهم..
والمكان ده نصير الفن المعاصر.. شكلًا، ومضمونًا.

 

الكحيلة - Al Kahila Art Gallery

من الأماكن الفريدة من نوعها في منطقته "المهندسين".. وده على أد ما هو تميز فهي مسؤولية كبيرة أنه يكون بيقدم حاجة كويسة فعلًا للجمهور اللي في محيطه، وفي الحقيقة المكان طول الوقت أد المسؤولية.

 

علبة ألوان - 3elbt Alwan

الجوكر التاني في مقالنا ده، بس جوكر على واسع شوية.. ده لأن المكان كل يوم عنده جديد، تحس أنهم مش بس مركزين من نوع الفعاليات اللي بتتعمل، لأ كمان مركزين على أنه المكان يفضل مشغول طول الوقت بيها علشان يشبعوا رغبات جمهورهم.

مبروك لكل الفائزين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
19/05/2016
-