Shuffle designs: العلاقة المباحة بين المسامير والفن - فن وثقافة Feature - كايرو 360
 







Shuffle designs: العلاقة المباحة بين المسامير والفن
 Shuffle designs: العلاقة المباحة بين المسامير والفن
اصدرت في: 16/08/2016

"من غيرَك مش هتكمَل .. الصورة"

الأغنية دي المفروض إنها تكون موجّهة لصديق، لكن بعد ما سمعنا عن مشروع Shuffle designs بقى ممكن نوجّهها لمسامير الباش مهندسة/ أمل صلاح مؤسِسِة فكرة المشروع. أمل خلّت المسامير بتلعب الدور الأساسي في لُوَحها الفنية بعد ما كان دور المسمار في اللوحة مُجرّد تثبيتها على الحيطة. المسمار عندها هو العنصر الأساسي في اللوحة لو اتشال يبوظ العمل الفني كله.

قصة أمل مع بداية مشروعها قصة ملهمة، خلّونا نحكيها لكم بالتفصيل:

أمل صلاح خريجة كلية هندسة قسم عمارة, في يوم عيد ميلاد جوزها من خمس سنين حبّت تقدم له هدية فنية مختلفة؛ بالفعل بدأت ترسم صورة لجوزها وابنها علشان تقدمها له، لكن حسّت إن لسة الهدية مش بتنطق بكل الكلام اللي هي عايزة تقوله بالرغم من إدراكها إن قيمة الهدية بقيمة صاحبها لكن الموضوع كان أعمق من كده شوية.

أمل توصلت في الآخر إنها عايزة الرسمة دي تكون 3D -ثلاثية الأبعاد- يمكن كانت فلسفتها ساعتها إن الحاجة كل ما كنا بنستخدم فيها حواس أكتر علشان نُدركها كل ما هتوصل للقلب أسرع، فبدل ما كانت هتوصل من باب العين للقلب على طول كمان هتوصل من باب اليد.

أول تجربة ليها كانت إنها تثبت (الخِلّة) على (فِل) بس ماحستش إنه شئ قيّم كفاية فعزفت عن التفكير في الخامات دي وجربت غيرها كتير وفي الآخر استقرت على المسامير اللي هتدُّقها على خشب. خلصت أمل أول لوحة وقدمتها لجوزها بس لسه المشروع مابدأش بالنسبة لها.

المشروع بدأ بعد تشجيع من اللي حواليها ولفت نظرها لجمال منتجها ولشيء هتكون هي الرائدة فيه بعد فترة لشطارتها غير المتناهية في الموضوع ده.

أول كوليكشن عملته أمل في الفن ده كان عن مشاهد من أكتر أفلام ملهمة بالنسبة لها منها فيلم (الكيت كاتfight club – the godfather وغيرهم).


أول لوحة باعتها كانت لفيلم الكيت كات واستمرت في تميزها ده وحلمها لغاية ما كتبت في يوم في بوست على الفيسبوك بنبرة ساخرة إن هييجي يوم والموسيقى اللبناني العالمي إبراهيم معلوف هيطلب الـ contacts بتاعتها، ماجاش في بالها ساعتها إن لما إبراهيم معلوف ييجي مصر هتكون هي اللي هتقدم له هدية الحفل من شغلها بالفعل.

أمل وقفت ك speaker في tedx كشخص ملهم وناجح بتحكي للشباب إنها بدأت من الصفر ووصلت لأول طريق العالمية.

شغل أمل بيميزه إحسانها وإتقانها ومجهودها الكبير جدًا وحبها للي هي بتعمله وده مفتاح نجاحها. أمل مؤخرًا بدأت تدخل خامات غير المسامير في لوحها، والتطور والتقدم باين في شغلها علشان هي مش ساكتة وقاعدة بتنحت مستقبلها بتعبها.

تقدروا تتابعوا شغل shuffle designs من خلال صفحتها على الفيسبوك من هنا وكمان تتوصلوا معاها من خلالها.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
فاطمة عبد القوي
حرر بواسطة:
فاطمة عبد القوي
تاريخ النشر:
16/08/2016
محررة بالموقع العربي، بتطل من شباك الكتابة على جمال الحياة، المزيكا أعز صحابها، وولاد بلادها الجدعان هم أهلها وناسها بتعشق حكاويهم وبساطتهم وضحكهم العالي اللي بيعدّي الأيام.