عالم سمسم: عرض حي ضخم ومبهر لأول مرة في مصر - فن وثقافة Feature - كايرو 360
 







عالم سمسم: عرض حي ضخم ومبهر لأول مرة في مصر
عالم سمسم: عرض حي ضخم ومبهر لأول مرة في مصر
اصدرت في: 25/10/2011

عالم المسرح والاستعراض عالم مبهر بلا شك، خاصة لما يتوفر للعرض طاقم عمل محترف وأزياء وموسيقى مبهجة مع ديكورات ممكن تكون بسيطة لكن محترفة إلى جانب وجود قدرة كبيرة على التفاعل مع الجمهور وجعلهم جزء من العرض كأنهم مع الممثلين على المسرح.. دي بالضبط المعادلة الصعبة اللي قدر يحققها "عالم سمسم" في أول عرض له إمبارح على مسرح جامعة مصر للعلوم والتكنولوجيا MUST في مدينة 6 أكتوبر وبرعاية شركةFun Factory Entertainment.

عرائس "عالم سمسم" جاءوا لزيارة مصر ضمن جولة بـ يعملوها في كذا بلد وبـ يقدموا عرض باسم "Elmo makes music" وهـ يروحوا بعدها لبيروت ودبي.

أول ما تدخل مبنى أوبرا MUST الضخم والمزين بأضواء وديكورات احتفالية هـ تلاقي أكشاك بيع للشركات الراعية للحفل وكمان على اليمين كشك بـ يبيع ألعاب وعرائس عالم سمسم محشوة بحجم صغير سعرها بـ يتراوح من 100 لحد 130 جنيه، والمجموعة كاملة لهم بأحجام صغيرة جدًا بلاستيك بـ 165 جنيه وسي دي للمزيكا الأصلية للعرض، وتي شيرتات عليها الشخصيات.

"إلمو" و"جروفر" عروستين من عالم سمسم كانوا ماشيين وسط الجمهور قبل العرض علشان لو حد من الأطفال عاوز يتصور معاهم، وبعدين بـ يقفوا عند ممشى التصوير اللي عليه صور لباقي أفراد العرض والأطفال وقفت طوابير مستنية دورها.

دخلنا قبل العرض بنصف ساعة، التنظيم هائل جدًا والدخول كان سهل، المسرح رائع وضخم يساع 1000 متفرج على شكل أوبرا بدرجات متعددة، لو معاك أطفال حجمهم صغير ما تخافش أنهم ما يعرفوش يتفرجوا براحتهم من اللي أمامهم لأن لما بـ تدخل بـ يعطوا لك مخدات عالية علشان الأطفال يقعدوا عليها محطوطة على جانبي القاعة.

بدأ العرض في وقته بالضبط الساعة 6:30 مساءً، أول ما فتح الستار بدأ عالم الإثارة والتشويق والأطفال كلها كانت متحمسة جدًا من الفرحة، منظر المسرح كان مبهج جدًا بنفس بهجة الأطفال. أول ما دخلت الشخصيات قدموا فقرة راقصة بدأ بعدها "إلمو" يعرف أصحابه: بيج بيرد، بيرت، أرني، أبى كادابي، كوكي مونستر، إلمو، كونت فون كونت، أوسكار ذا جروتش، جروفر، زو، تيلي مونستر، وروزيتا.

فكرة العرض بـ تدور حول أن أي شىء حولنا يقدر يطلع مزيكا، سواء كان بالتخبيط على جسمنا أو التصفيق أو صوت الأشياء حولنا زي برطمان الكوكيز لما نرُجه أو التليفون والنفخ في زجاجة فارغة، وبدأت العرائس توضح للأطفال –في عرض استعراضى غنائي- جمال الأصوات اللي حولنا لما تُمزج مع بعض وتطلع موسيقى. ألوان العرائس بجودة صنعهم وتكنيك تحريكها رائع ومبهر، لدرجة أنك مش عارف المحرك اللي جوه بـ يعمل كده إزاي خاصة أنها عرائس عملاقة مش صغيرة وبـ تتحرك باليد زي اللي بـ تطلع في التليفزيون.

المسرح مقسم لجزءين: أمامي وخلفي وكل شوية بـ يفتح الستار عن الجزء الخلفي وبالتالي كان فيه تنوع في المساحات والخلفيات لأنها بـ تتغير فى الوقت اللي بـ يكونوا فيه في الجزء الأمامي، أكثر جزء في العرض كان أكثر من مبهر ومش هـ تعرف تشيل عينك من عليه الجزء اللي قدموا فيه عرض "المسرح الأسود" باستخدام تقنية "Ultra Violet" اللي بـ تستخدم فيه ألوان فسفورية بـ تنور في الظلام، ارتدي الراقصين أحذية بألوان فسفورية مبهجة وعملوا رقصة باستخدام الأقدام فقط لأنهم كانوا لابسين لبس أسود زي الخلفية تمام، وهو ده التكنيك اللي بـ يقوم عليه المسرح الأسود أنك ممكن تقدم عرض كامل بنفسك وما يظهرش منك غير العنصر اللي أنت عاوز تركز عليه علشان يكون بمفرده بطل العرض.

العرض من جزءين ومدته طويلة يتخللها استراحة نصف ساعة، الراقصين محترفين وعندهم لياقة عالية جدًا، إلى جانب أنهم بـ يعلموا الأطفال من خلال فقرات تعليمية كثيرة –وبشكل تفاعلي- الأشكال الهندسية والأرقام والألوان عن طريق أغاني مؤلف بعضها على موسيقى أغنيات مشهورة زي Fame، وكان فيه فقرة عن "موسيقى الشارع" اللي ممكن تستخدم فيها مقشات وعصيان وصفائح وآلات حفر طرق علشان تصنع مزيكا من العدم.

الختام كان مفاجأة.. أول ما وقفت العرائس لتحية الجمهور انطلقت شرائط ملونة طويلة في الهواء من على الجانبين غطت كل الجمهور في المدرجات اللي تحت علشان يخلوا اللحظة دى محفورة داخلك وداخل طفلك طول عمره عن العرض.

عرائس عالم سمسم زارت أماكن ثانية في مصر غير جامعة MUST بأيام قبل العرض، راحوا عملوا جلسات تصوير يوم الجمعة 21 أكتوبر في القطامية في "داون تاون مول"، ويوم السبت 22 أكتوبر في فيرجين ميجا ستورز، بس ما تخافوش أطفالكم لسه عندهم فرصة يتصوروا مع نجومهم المفضلين في العروض اللي لسه مستمرة أيام الثلاثاء 25، والخميس 27، والجمعة 28، والسبت 29 أكتوبر (عرضين في اليوم الوحد) وبـ تحصل على صورك مع شخصيات عالم سمسم من على موقع www.picsmeister.com من خلال اسم مستخدم وكلمة سر خاصة بك.

اليوم كان أكثر من رائع ومشينا وإحنا بـ نغني الأغنية الرسمية لعالم سمسم "How to get to Sesame street" وقابلنا المحركين وهنيناهم على مجهودهم في العرض، لو عاوزين تعرفوا معلومات أكثر زوروا صفحة الحدث على الفيسبوك.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
25/10/2011
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!