ليلة رأس السنة.. هـ تقضيها فين؟ - فن وثقافة Feature - كايرو 360
 







ليلة رأس السنة.. هـ تقضيها فين؟
ليلة رأس السنة.. هـ تقضيها فين؟
اصدرت في: 29/12/2011

كل واحد فينا بـ يبقى عنده تخطيط معين لليلة رأس السنة، فيه اللى بـ يحب يقضيها مع أصحابه يضحكوا ويهزروا لحد الصبح، فيه اللى بـ يحب يدخل سينما، وفيه اللى بـ يحب يقضيها فى بيته أمام التليفزيون، وفيه اللى بـ يحب يخرج ويسهر مع أهله، علشان كده رشحنا لكم 10 اختيارات كلها تبدأ وتنتهى يوم 31 ديسمبر فى مواعيد مختلفة وأماكن مختلفة، تقدر من خلالها تشوف أنت عاوز تروح فين وتختار، وتعالوا نبدأ بسرعة.

 

ريسيتال ترومبيت (محمد حلمى):

محمد حلمى واحد من الفنانين اللى بـ يعزفوا بمهارة وجمال على الترومبيت، وهـ يقدم حفلة قوية زى ما اتعود عليه محبيه فى حفلاته فيها كثير من المعزوفات اللى من تخيل محمد حلمى وفيها معزوفات عالمية، جرب واستمتع بعزف جديد، الحفلة دى هـ تلاقيها فى دار الأوبرا يوم الجمعة 30 ديسمبر وتقدر تتصل على تليفون: 27390144 – 27390132.

 

أوركستر القاهرة السيمفونى:

عاوز تسمع أشهر سيمفونيات العالم وتستمتع بها، نعتقد أنك لازم تروح دار الأوبرا وتسمع أوركسترا القاهرة السيمفونى فى حفلته فى رأس السنة فى دار الأوبرا، يوم السبت 31 ديسمبر وتقدر تتصل على تليفون: 2739014402 – 2739013202.

 

"كاميراتا" فريق كورال الساقية:

استكمالاً لروح الكورال والموسيقى الكلاسيكية ممكن تقضي وقت ممتع مع "فريق كورال ساقية الصاوي" للاحتفال بالكريسماس في قاعة الحكمة يوم الجمعة 30 ديسمبر، لأسعار التذاكر زوروا رابط الحدث على صفحة الأجندة.

 

فرقة التنورة:

هـ تلف والعالم هـ يلف معاك، هـ تسمع موسيقى جديدة، هـ تحس أنك بـ تلف حوال العالم وبـ تخرج بره الأرض، حالة صوفية جميلة مع رقصة التنورة التراثية وكمان موسيقى وغناء صوفى، ها إيه رأيك؟ جرب يمكن تدور وتدور وتكتشف فن جديد تتعرف عليه، الحفلة دى هـ تلاقيها فى وكالة الغورى، يوم السبت 31 ديسمبر.

 

مسرح البالون:

لو حابب تفرح أولادك وتفرجهم على مسرحية جميلة تنفع للصغار والكبار ننصحك تروح مسرح البالون وتحضر مسرحية "سمسم ومنة والعصابة الغبية" مع الطفلة منة عرفة والفنان محمد الصاوى، هـ تلاقيها يوم الخميس 29 ديسمبر والجمعة 30 ديسمبر على مسرح البالون فى العجوزة، للتفاصيل اتصل على 0233471718.

 

السيرك القومى:

ألعاب خطيرة، ترويض الأسود، حيوانات بـ تسمع كلام مدربيها، مهرجين يخلوك تضحك طول الوقت، حفلات السيرك القومى يومية ما عدا يوم الأربعاء، روح وقضى ليلة رأس السنة مع الوحوش والضحك والألعاب البهلوانية، على فكرة السيرك فى العجوزة وهـ يبدأ عروضه الساعة 8 مساءً، تقدر تتصل بهم على 0233471718.

 

عشاء رأس السنة مع أنغام عود نصير شمة:

لو حابب تتعشى عشاء جميل وتسمع مزيكا وتقعد على النهر، يبقى لازم تروح الساقية ليلة رأس السنة وتقعد فى قاعة النهر، أما لو حابب تسمع موسيقى شرقية مش زى أى موسيقى ثانية، لو حابب تسمع عود واحد من أمهر عازفي العود فى العالم العربى يبقى برضه لازم تيجى الساقية الساعة 9 ونصف وتحضر حفلة الفنان نصير شمة فى قاعة الحكمة.

 

دار كليم:

لو مزاجك مختلف وعاوز تقضى ليلة رأس سنة شِعرية، يبقى لازم نقولك تروح فين، شوف يا سيدى، انزل المهندسين بالتحديد شارع أحمد عرابى واسأل عن عمارات البترول وبالتحديد عمارة رقم سبعة، تروح هناك يوم السبت 31 ديسمبر فى تمام الساعة 7 مساءً هـ تلاقى الشعراء الشباب أحمد عادل، ياسمين الشاذلي، محمود عبد الله سلامة، اسمع شعر واستمتع بليلة مختلفة.

 

المسرح العائم:

تعرف المنيل؟ تمام، شوف بقى لما تروح هناك انزل بعد كوبرى الجامعة شمال عند مسجد صلاح الدين، هـ تلاقى المسرح العائم وهو مكان جميل بـ يطل على النيل، وهـ يتعرض فيه ليلة رأس السنة مسرحية "بدلة سموكن" بطولة وائل نور وبدرية طلبة وعلاء زينهم وأحمد صيام وإخراج عادل أنور. لو حابب تعرف معلومات أكثر اتصل بهم على 0223684047.

 

بيت السحيمى:

بيت أثرى لكنه تحول إلى مركز ثقافى مهم، عاملين حالة مختلفة فى ليلة رأس السنة لو حابب تسترجع ذكرياتك زمان أيام ما كان فيه أراجوز وكانت عروضه الجميلة بـ تلف الشوارع ويستمتع بها الصغار والكبار، فرقة "ومضة" هـ تعمل عرض أراجوز في بيت السحيمي يوم الجمعة 30 ديسمبر الساعة 8 مساءً، وتقدر تعرف معلومات أكتر بالاتصال بهم على 2787886502.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الجواد
حرر بواسطة:
أحمد عبد الجواد
تاريخ النشر:
29/12/2011
شاعر عامية وصحفى ومنسق مشروعات أدبية فى الساقية، كائن بـ يحب الحياة، أحيانًا بـ يتحول لشخصية أسطورية وهو بـ يكتب بـ يظهر له جناحين، أو بـ يختفى ويظهر فى أماكن مختلفة، بـ يفضل أكل البيت مع أسرته عن الأكلات السريعة، بـ يلعب لعبة يابانية اسمها "آيكيدو" وحصل على الحزام الأسود فيها بعد معاناة.