صوفي: نقي روحك في أحدث مكتبة ومساحة ثقافية في الزمالك - فن وثقافة Feature - كايرو 360
 







صوفي: نقي روحك في أحدث مكتبة ومساحة ثقافية في الزمالك
صوفي: نقي روحك في أحدث مكتبة ومساحة ثقافية في الزمالك
اصدرت في: 13/02/2012

بنفس الروح والمبادئ اللي بـ تتسم بها "الصوفية" أسسوا المكان، وحبوا أنها تكون الأساس اللي يُبنى عليه، حلم جميل تحقق بعد تعب وشغل موجود دلوقت في شارع سيد البكري في الزمالك.

"صوفي" مش مكتبة لبيع وقراءة الكتب بس، ده كمان مساحة ثقافية صغيرة بـ يقام فيه ورش عمل ومعارض وحفلات وبرامج مخصصة للأطفال وبـ يعرض فيه لوحات فنية ومشغولات يدوية وأنتيكات.

الطريق سهل جدًا، أول ما تدخل شارع البرازيل اللى على ناصيته محطة البنزين هـ تدخل أول يمين، شارع صغير لكن هـ يوصلك لحاجة أكبر من توقعاتك، هـ تلاقي يافطة صوفي مميزة أمامك والمدخل على اليمين في بيت قديم.

المكان عبارة عن خمس قاعات، أول ما تدخل على اليمين هـ تلاقى الكاشير وعلى الشمال هـ تلاقي قاعتين كبار حوائطهم خضراء مفتوحين على بعض فيهم مكتبة كبيرة مليانة كتب كثيرة ولوحات فنية معلقة في أماكن مختلفة تحس أنها جزء من ديكور المكان المتخذ روح أورينتال مصرية قديمة بداية من النجف والشبابيك لحد الكنب.

القاعة اللي بعدها في الواجهة ودى خاصة بالكتب الإنجليزية، التدخين ممنوع فيها هي وقاعة العربي، لو كملت مشي يمين هـ تلاقي حجرتين في الآخر، أرفف الكتب موجودة في كل مكان حتى فى الممرات. المكان بـ يقدم كمان للزوار منيو فيها أكلات خفيفة (ساندويتشات، سلاطات، وباستا) ومشروبات ساخنة وباردة علشان يستمتعوا بها أثناء قراءة الكتب، وكمان فيه إنترنت Wi-Fi.

أسس "صوفي" -غير الهادف للربح- شريف وخطيبته فريدة، ومعاهم ساندرا وشيري كشركاء في التأسيس، ببساطة المكان ده كان حلم عند شريف من وهو في مرحلة ثانوي، ولكنه بدأ التحضير والإعداد له من حوالي سنة، ومن الصعوبات اللى واجهتهم أنهم يبحثوا عن مكان لـ "صوفي" يقدر يخدم الهدف من فكرتهم لحد ما استقروا على المقر الموجود دلوقت في الزمالك.

كلهم تحمسوا للمكان وما بخلوش عليه بالأفكار، ولقوا دعم وتشجيع من كل أصدقائهم وعائلاتهم علشان يقدروا يحققوا حلمهم زي ما تخيلوه، وفريق "صوفي" فخور بالنتائج النهائية للمكان. وزي ما قال لنا "شريف": "رؤية "صوفي" معتمدة على إيجاد مناخ مناسب للبحث عن الذات وتنقية الروح من خلال الأنشطة اللي بـ يقدمها المكان أو من خلال القراءة، ومن هنا جاء اسم المكان، إلى جانب أن هو وفريدة بـ يحبوا الصوفية".

على الرغم من أن عمر المكان ما كملش أسبوعين (الافتتاح كان في أول فبراير) إلا أنه بدأ أنشطته بكثافة، كان فيه حفلة لرامي عصام يوم 9 فبراير، وكمان كل يوم جمعة هـ يكون فيه عرض لأفلام عادية ووثائقية من الساعة 7: 9 مساءً هـ يكون الشهر ده يومي 17 و24 فبراير، ويوم الخميس 16 فبراير هـ يكون فيه حفل موسيقى مودرن جاز، كمان صوفي هـ تعمل أول "Garage Sale" (مكان لبيع الأغراض المستعملة) يوم السبت 18 فبراير، وأخيرًا الخميس 23 فبراير هـ يكون فيه حفلة هـ يقيمها "مشروع المريخ". اللوحات الموجودة على الحوائط للبيع، ولو كنت عاوز تعمل معرض لأعمالك الفنية مافيش قيمة للتأجير لكن المكان بـ يأخذ 30%.

لو حابب تحجز أى قاعة من قاعات "صوفى" لازم تحجز قبل الحدث بتاعك بأسبوع من خلال أنك تكلمهم على رقم التليفون أو تروح بنفسك خلال ساعات عمل الشهر ده من الساعة 10 صباحًا لحد 12 مساءً، وهم بـ يحددوا هل الحجز مجانًا ولا برسوم بناءً على طبيعة الحدث والهدف منه.

فريق "صوفي" عنده آمال وأحلام كبيرة للمكان، ونفسهم أن كل واحد ييجي لهم يشعر بسلام داخلى وراحة واسترخاء وهدوء كأنه في بيته. وكمان في الحديث والاختلاط مع ناس ثانية براحة تامة كأنه يعرفهم قبل كده.

لو عاوزين تتابعوا "صوفي" وتعرفوا الجديد عندهم ورقم زوروا صفحة الفيسبوك بتاعتهم. وبمناسبة الافتتاح بـ يقدموا لكم في الفترة من 15 فبراير لحد أول شهر مارس تخفيض 10% على الكتب والمأكولات هناك.

مزيد من الصور
  • صوفي: نقي روحك في أحدث مكتبة ومساحة ثقافية في الزمالك
  • صوفي: نقي روحك في أحدث مكتبة ومساحة ثقافية في الزمالك
  • صوفي: نقي روحك في أحدث مكتبة ومساحة ثقافية في الزمالك
  • صوفي: نقي روحك في أحدث مكتبة ومساحة ثقافية في الزمالك
  • صوفي: نقي روحك في أحدث مكتبة ومساحة ثقافية في الزمالك
  • صوفي: نقي روحك في أحدث مكتبة ومساحة ثقافية في الزمالك
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
13/02/2012
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!