واضح أن مصر الجديدة هـ ترجع لمجدها وتنافس وسط البلد والمهندسين والدقي اللي أصبحت واجهة مزيكاتية كثير في الفترة الأخيرة بعد ما انتشرت فيها ستوديوهات البروڤات الموسيقية في الوقت اللي أغلقت فيه أبواب ستوديوهات كثير كانت موجودة في وقت واحد في مصر الجديدة.
المكان اللي بـ نتكلم عنه النهارده كان واحد من الستوديوهات دي، وكان فاتح من أكثر من 7 سنين باسم Room 5 وتحت نفس الإدارة تقريبًا، ولظروف ما قفل الستوديو بشكل نهائي رغم أنه كان من أحسن أماكن البروڤات في القاهرة وقتها وكان من الأماكن المفضلة عند كثير من العازفين، لأن القائمين على الستوديو كمان فنانين وعازفين محترفين، ودي بـ تبقى ميزة تضمن بها جودة الصوت والمعدات في المكان، لأن أصحاب المكان بـ يعملوا بروﭭاتهم فيه وهدفهم هو الاستمتاع بالمكان قبل ما يكون الربح من خلاله.
ستوديو «فريكوانسي – Frequency» موجود قريب من ميدان روكسي خلف محل العبودي لملابس السهرة، في شارع هادئ اسمه شارع الأشجار، وهو في الدور الأرضي وله مدخل جانبي مستقل عن مدخل العمارة نفسها. مافيش علامة مميزة ممكن تعرف بها الستوديو غير المدخل أو الممر ده والدهانات اللي عليه باللون الأبيض، لو تهت اتصل بأرقام الستوديو علشان يساعدوك توصل.
المكان من الداخل هادئ زي الشارع اللي هو فيه، فيه مكان للاستراحة والانتظار على كراسي مريحة وممكن تطلب أي حاجة تشربها ساقعة أو ساخنة وفيه قائمة أسعار موضحة على باب البوفيه الصغير اللي في آخر الطرقة. بعد كده فيه غرفة تحكم مجهزة بشكل جيد بس مش هـ نخوض في تفاصيل المعدات اللي فيها لأننا ما جربناش التسجيل من خلالها، وطبعًا كفاءة المهندس بـ يبقى لها دور كبير في مستوى التسجيل وجودته مهما كانت جودة المعدات والبرامج المستخدمة. بـ يفصل بين غرفة التحكم وغرفة البروڤات الزجاج الشفاف، وبمجرد ما دخلنا غرفة البروﭭات وشوفنا توزيع الآلات والسماعات وطريقة العزل في الأرضيات والجدران عرفنا أن الصوت هنا أكيد هـ يبقى كويس. التوزيع حاصل بشكل مدروس وفيه سماعات ضخمة ماركة JBL من موديل EON وفيه أمبلفاير Roland للباص جيتار وواحد ثاني Line6 للجيتار وميكسر Mackie والدرامز بقى من أفضل الحاجات في الستوديو وهي موديل Imperialstar من ماركة TAMA وفيها نحاسات إضافية مش هـ تلاقي أي ستوديو حاططها على الدرامز اللي عنده، ده طبعًا بالإضافة لصوتها الرهيب واللي ينفع في أي نوع مزيكا بـ تلعبه.
ممكن توصل الجيتار على الميكسر والصوت هـ يبقى كويس برضه، والميكروفونات حالتها ممتازة لأنها جديدة. والمكان واسع شوية يكفي فرقة عددها 6 أفراد أو أكثر. ملاحظتنا الوحيدة على الصوت هو أنك محتاج دائمًا تلعب بمستويات صوت منخفضة علشان تسمع أصوات المغنيين بوضوح، لأن مهما عليت صوت ميكروفون المغني هـ يبقى صوت الآلات أعلى منه. بس بشكل عام الصوت كويس وهـ تستمتع بالبروڤة بتاعتك.
ساعة البروڤة بـ 50 جنيه وساعة التسجيل بـ 100 جنيه، وده بـ يتضمن الميكساج كمان بعد التسجيل، بس واضح أن العرض ده لفترة محدودة! وطبعًا أي تفاصيل ثانية ممكن تعرفوها بالتليفون وبالتحديد من محمد الأزهري صاحب ومدير المكان ومهندس الصوت الخاص به.