يعتبر جاليرى الهناجر الموجود فى الزمالك واحد من أبسط الأماكن الفنية على أرض دار الأوبرا المصرية اللى بـ تحافظ على أساسياتها. الفنانة المصرية نهال وهبى قررت تعرض مجموعتها الفنية على الناس من وحى الأحداث السياسية والاجتماعية اللى بـ تحصل فى البلد تحت عنوان "أنا بامشى بس عندى جناحات، أنا مقدر لى أنى أطير" أو بالإنجليزى I Can Walk But I Have Wings, I Am Meant to Fly. فريق كايرو 360 حضر ليلة الافتتاح وقابل الفنانة نهال.
بـ يركز معرضها على الوعى الفردى والجماعى بآمالنا وأحلامنا وصراعاتنا وكمان حيرتنا وسط رحلة حياتنا، علشان نحاول نحققهم ونوصل لحريتنا من داخلنا. نهال بـ تستخدم مجموعة مختلفة من الأدوات علشان تعبر بها زى الرسم بالألوان والزيت، والفيديو والأعمال المركبة.
فى يوم من الأيام قال شاعر مشهور: Walking in the dark allows truth in the light، ورغم أن نهال وهبى ما قالتش لنا مين هو الشاعر بس إحنا فهمنا مضمون الكلام. الجملة دى كانت هى المعنى اللى بـ تدور حوله مجموعتين فرعيين شدوا انتباهنا. واحدة مبنية على خلفيات جادة لونها غامق والثانية بـ تستخدم ألوان فاتحة مبهجة؛ والمجموعتين بـ يظهروا صور من مشاهد جماعية وفردية. الرسومات دى مع بعض بـ توصف رحلة، بين الفوضى اللى بـ يخلقها النسيان وبين ناس منقسمين بين قوتين كبار أو صانعى قرار، لحد الوصول للسلام الداخلى والحرية اللى بـ تتحقق بعد تغيير العلاقة مع الأجواء المحيطة وتحقيق الذات. سبب استخدام الخرائط العالمية بـ توحى بفكرة العالم المضطرب وأوقات التغيير.
آخر مجموعة من اللوحات المعلقة عبارة عن سلسلة من صور الطيور مرسومة بالزيت. اللوحات دى بـ تحسسك قد إيه الطيور جميلة وبـ تخلق جو من الهدوء النفسى، ومعظم الصور بـ تستخدم فيها نهال لون رمادى خفيف مع درجات الأزرق. بـ تحاول نهال فى اللوحات كمان أنها تجمع بين "العزلة والسكينة" وتباينها مع "الارتباط والحركية" وهى بـ ترسم لوحة فيها مجموعة من الطيور بـ يكافحوا علشان يتعلموا إزاى يطيروا.
بعد كده فيه مجموعة عبارة عن خلفيات من الورق الأبيض الطبيعى عليها ريش طيور غامق اللون مُجمع من كل أنحاء العالم اسمها The Trace وترجمتها بالعربى "الأثر". نهال عملت كده عن قصد علشان ترمز لطريقة تقدر بها توصل لـ "طيران من غير موانع، والارتفاع للانهاية" باعتبار أن الريش بـ يعبر عن الحرية.
أكثر قطعة شدت انتباهنا كانت فنار معمول على شكل بيت للطيور فى آخر الغرفة، اسمها البرج أو The Tower علشان الطيور عادة بـ تعتبر رسل من نوع ما، فالفكرة كانت أنك تكتب أو ترسم حلمك وتدخلها فى واحدة من الثقوب الموجودة جنب الفنار، وبعدين الطيور تأخذها بعيد وتوصلها. قدرنا من خلال فكرة المشاركة أننا نتفاعل مع رسالة نهال ونبقى مدركين لآمالنا وتطلعاتنا. فيديو معمول عن مجموعة من النجوم تم تصويره يوم بعد يوم، فى الفيديو ده مجسمات معروضة على جانب من جوانب قفص طيور كبير بـ يقترح أنك تخلى أحلامك دائمًا حولك.
فكرة المعرض أنه يرجع الحياة من ثانى للأعمال الفنية، واللى بـ يفتنك أكثر من المجموعة نفسها هو تماشيها مع الثورة المصرية الأخيرة. نهال بـ تتمنى أنها تكون موجودة فى معظم أيام المعرض علشان تقدر تفيدك فى أنك توصل للمعنى العميق وراء أفكارها. على الرغم من كده أغلب الناس يقدروا يسرحوا فى القطع ويفهموها بخيالهم.