مشروع "تسعيناتى": والله زمان يا تليفزيون - فن وثقافة Feature - كايرو 360
 







مشروع "تسعيناتى": والله زمان يا تليفزيون
مشروع "تسعيناتى": والله زمان يا تليفزيون
اصدرت في: 31/03/2013

أفلام وكتاب وعروض وأغانى.. ياااه والله زمان يا تليفزيون ويا تسعينيات.. فترة بجد غريبة كنا فيها خلصنا من طنطنة الثمانينيات واللى كان فيها التليفزيون عجيب الشكل والصورة وبـ يفتح تقريبًا كام ساعة فى اليوم ويقفل على العصر ويرجع يفتح ثانى فترة مسائية علشان يقفل على 10 بالليل.. لكن التسعينيات كانت فترة ظهور البرامج الجديدة والأغانى الجديدة المصورة "كليبات" وحاجات كثير جدًا.. حتى الأفلام بدأت تأخذ شكل ثانى... علشان كده فيه مجموعة شباب قررت تعمل فيلم وثائقى، وكتاب، وتجهيزات فيديو، وعرض صوتى بصرى ويسموه "تسعيناتى".

افتتاح مشروع "تسعيناتى" هـ يكون غدًا يوم الاثنين ١ أبريل ٢٠١٣ بساحة روابط والدور الأول بتاون هاوس، واليوم الأول هـ يكون برنامجه: افتتاح واستقبال وإطلاق كتاب "تسعيناتي" لحسن الحلوجي: 7 مساءً في ساحة روابط يصاحبه تجهيزات فيديو في الدور الأول بتاون هاوس جاليرى، وعرض صوتى بصرى هـ يقدمه محمد علام ورامى أبادير الساعة 7:30 مساءً، ويليها عرض الفيلم الوثائقى "تسعيناتى" إخراج عماد ماهر الساعة 8 مساءً.

وهـ يُعرض فى الدور الأول بتاون هاوس جاليرى من يوم ١ حتى ١٧ أبريل مشروع "تسعيناتى" وهو مشروع فني بـ يتكلم عن المشهد الإعلامى المصرى فى التسعينيات وهـ يبقى فيه كتاب فنى هـ يوثق لبعض ما كُتب فى الجرائد والمجلات والأبحاث العلمية عن كل ما له علاقة بالتليفزيون المصرى فى الوقت ده، وفيه كمان إنتاج فيلم وثائقى مع رموز صناعة الإعلام فى فترة التسعينيات وتجهيزات فيديو من خلال تجميع لأكثر من ٤٠٠٠ شريط فيديو من محلات الخردة وسوق الجمعة بالقاهرة وبعض الأفراد، تمكن الفنان محمد علام اكتشاف ٢٠٠ شريط فيديو مسجل عليهم مواد تليفزيونية مختلفة من فترة التسعينيات، يعنى الموضوع شيق لأنه مش عمل رقمى شاق فى معمل سينمائى حديث، وإنما نتاج اهتمام شعبى بتسجيل البرامج والأعمال الدرامية والأفلام والمسرحيات اللي كانت بـ تُعرض على شاشات التليفزيون المصرى ما كانش أصحابها يتوقعوا أنها هـ تتحول إلى أرشيف مرئى مفتوح للذاكرة المصرية.

فريق عمل المشروع مكون من: محمد علام مدير المشروع، وبيتر فارس مدير الإنتاج ومنسق المعرض، وحسن الحلوجى كاتب وباحث، وعماد ماهر مخرج الفيلم، وأدهم بكرى مصمم الكتاب والمطبوعات، وروان الشيمى مسؤولة الإعلام.

"تسعيناتي" يشمل تجهيز فيديو لما تم اكتشافه من شرائط، ومنها ما يعرض كما هو دون أى تدخل، وفيه فيديوهات ثانية جُمعت من شرائط مختلفة باستخدام نفس التقنيات اللى كانت مستخدمة فى الوقت ده.

أما العرض السمعى البصرى اللى هـ يُعرض ليلة الافتتاح هـ يقدمه محمد علام (مدير المشروع) ورامي أبادير، باستخدام لقطات جمعوها من شرائط مختلفة بالإضافة لأصوات وموسيقى من مواد إعلامية من فترة التسعينيات. كمان المشروع فيه فيلم وثائقى من إخراج عماد ماهر واللى بـ يضم لقاءات مصورة مع عدد من رموز الإعلام فى التسعينيات، وطرح كتاب من إعداد حسن الحلوجى وهو كتاب فنى توثيقى لبعض المعلومات اللى كُتبت فى الجرائد والمجلات والأبحاث العلمية عن كل ما يخص التليفزيون والإعلام فى المرحلة دي.

مشروع تسعيناتي تم إنتاجه بدعم من الصندوق العربى للثقافة والفنون (آفاق) وصندوق شباب المسرح العربي (YATF) وجاليرى تاون هاوس، الدخول مجانًا لكل الناس والدعوة عامة.

مزيد من الصور
  • مشروع
  • مشروع
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الجواد
حرر بواسطة:
أحمد عبد الجواد
تاريخ النشر:
31/03/2013
شاعر عامية وصحفى ومنسق مشروعات أدبية فى الساقية، كائن بـ يحب الحياة، أحيانًا بـ يتحول لشخصية أسطورية وهو بـ يكتب بـ يظهر له جناحين، أو بـ يختفى ويظهر فى أماكن مختلفة، بـ يفضل أكل البيت مع أسرته عن الأكلات السريعة، بـ يلعب لعبة يابانية اسمها "آيكيدو" وحصل على الحزام الأسود فيها بعد معاناة.