درب 17 18: الفن ثقافة والثقافة فن - فن وثقافة Feature - كايرو 360
 







درب 17 18: الفن ثقافة والثقافة فن
درب 17 18: الفن ثقافة والثقافة فن
اصدرت في: 22/07/2013

حول المكان

بصوا بقى ما ينفعش نتكلم عن درب غير لما نتكلم عن المكان الأول.. لأن اختيار المكان بالفعل مختلف تمامًا عن أى مكان ثقافى ثانى ممكن تروحه.. الاختيار عبقري من كذا ناحية.

المكان مفتوح وتقدر تعمل فيه عروض فى كل حتة.. وأنت رايح هـ تقابل مجموعة آثار بـ تعبر عن حاجات كثير هـ تلاقى مكان مهيب فيه جلالة غريبة، أول ما تدخله هـ تحس مجموعة أحاسيس مختلفة، هـ تحس أنك عاوز تقعد فيه شوية، هـ تفكر فى وسعه وطريقة بنائه، هـ تحس بالرهبة والجلال بالذات لما تعرف أنه أول مسجد بُنى فى مصر، هو جامع عمرو بن العاص.

أما المكان الثانى فهو التحفة المعمارية المبنية على حصن بابليون.. واللى اسمها "الكنيسة المعلقة"، وبـ تقول بعض الروايات أن الكنيسة بنيت على أنقاض مكان احتميت واختفيت فيه العائلة المقدسة (السيدة مريم العذراء، المسيح الطفل، والقديس يوسف النجار) فى فترة الثلاث سنين اللى قضوها في مصر وده مذكور فى الكتاب المقدس، وعلى فكرة إحنا تكلمنا قبل كده عن الأماكن دى وغيرها.


 هاه وصلت؟

هاه حضرتك وصلت لدرب 17 18؟.. طيب استنى نقول لك بقى ليه سمي بالاسم ده.. شوف يا سيدى هو اتسمى كده علشان كان فيه فنان تشكيلى وناشط ثقافى اسمه معتز نصر وهو صاحب المكان والفكرة فكرته، الرجل ده كان موجود فى مظاهرة زمان –أيام ما كانت المظاهرات موضة– وأصيب بطلقة فى كتفه.. فكان له قرار عجيب أنه يعمل مكان ثقافى مفتوح ويسميه اسم له دلالة مهمة عنده.


 عن درب

معتز قرر يسمى المكان درب لأن درب دليل على الطريق وهو عاوز الطريق ودائمًا بـ يدور عليه أى طريق شرط يكون الطريق إيجابى بـ يعمل تغيير فى المجتمع.. وهو مقتنع أن الطريق اللى يغير لازم يبدأ بالثقافة ومش أى ثقافة.. معتز عامل فكرته عن الورش الفنية الثقافية يعنى بـ يحاول يصنع ثقافة مش يستضيف عروض وخلاص.. هو بـ يصنع أحداث ثقافية خاصة.


 اوصف بقى

نعتقد أنكم دلوقتي عاوزينا نوصف المكان صح.. طيب بصوا بقى المكان عبارة عن مكتب واحد واسع شغال فيه ثلاثة: معتز وريم ومى، وهما دول القائمين على الموضوع.. بعد كده هـ تلاقى مساحة مفتوحة بـ يتم فيها عمل عروض موسيقية وفنية ومعارض لكل حاجة تقريبًا فيه شغل فن تشكيلى وفيه عروض سينما مفتوحة وفيه عروض مشغولات يدوية.. والجديد بقى هو ستوديو الفنان اللى بـ يتعمل فيه ورش عمل حول العروض الفنية المختلطة واللى بـ تجمع فنانين من الشرق والغرب وبـ يقدموا أشكال مختلفة.. وكمان فيه أماكن لإقامة الفنانين الأجانب.


 الرسالة

الناس دى رسالتها ببساطة هى الثقافة، هما عاوزين يقدموا ثقافة حقيقية بـ يتعاملوا مع كل أنماط المجتمع وبـ يخدموا كل الفئات اللى ممكن تتخيلها.. وكمان موجودين فى مصر القديمة يعنى عبق الماضى وتلاقى الحضارات.. والمنطقة اللى فيها اسمها "الفخارين" لأنها منطقة مشهورة بفنانين الفخار اللى بـ يعملوا أشكال متميزة من حرفة يدوية عبقرية بـ تعتمد على مادة من الطين اسمها (الفخار) وعلشان توصل لهم سهل جدًا، اركب المترو وانزل محطة مارى جرجس وامشى لمدة 5 دقائق ناحية الفخارين هـ تلاقى درب.. هاه هـ تروح؟

زوروا صفحتهم على الفيسبوك أو الموقع الرسمي.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الجواد
حرر بواسطة:
أحمد عبد الجواد
تاريخ النشر:
22/07/2013
شاعر عامية وصحفى ومنسق مشروعات أدبية فى الساقية، كائن بـ يحب الحياة، أحيانًا بـ يتحول لشخصية أسطورية وهو بـ يكتب بـ يظهر له جناحين، أو بـ يختفى ويظهر فى أماكن مختلفة، بـ يفضل أكل البيت مع أسرته عن الأكلات السريعة، بـ يلعب لعبة يابانية اسمها "آيكيدو" وحصل على الحزام الأسود فيها بعد معاناة.