يعني إيه "شفشاون – Chefchaoun"؟.. دواء ده حضرتك يعنى ولا نجيبه منين؟ ولا أنتم بـ تشتغلونا وجايبين اسم غريب والسلام؟ هو من ناحية الاشتغالة هو فيه اشتغالة بس مش من الاسم، منكم أنتم لأنكم اللي هـ تشتغلوا هناك.

"شفشاون" دي اسم مدينة في المغرب، طيب يعنى إشمعنى الاسم ده؟ ما الأسماء كثير، لأ بص حضرتك وركز معانا كده، شوف سبحان الله المدينة دي في المغرب بـ تتميز بنفس طبيعة المكان والعمل المشترك فيه، خاصة أن السكان هناك طباعهم مختلفة وبـ يمارسوا أنشطة مش مترابطة في نفس المكان -من غير ما يختلفوا أو يموتوا بعض جدال- متقبلين بعض عادي لأ وبـ يساعدوا بعض كمان.

أما معنى الاسم نفسه بقى، فـ "شف" دي كلمة عربية من أصل فعل "شوف"، و"شاون" كلمة أصلها غير عربي ودي يعنى قمم الجبال، وبالتالى شفشاون معناها "شوف قمم الجبال"، وده لأن كل اللي هـ يروح هناك في الأغلب بـ يبص للعالم من فوق ويشوف إيه اللي ناقصه وهو يعرف يعمله فبـ يعمله.

يعنى من الآخر ما حدش بـ يروح هناك ويرجع زي ما جاء، لازم بـ يكسب حاجة جديدة حتى لو أنه بس يستمتع بالمنظر من الدور الخامس في الشمس الجميلة، أو أنه يقابل حد جديد ما يعرفوش.

ده غير أن فعلًا الدنيا صغيرة قوي، لازم هـ تلاقي حد تعرفه أو يعرف حد أنت تعرفه، بالذات لما يبقى سنك بداية من 18: 20 سنة لحد الثلاثين وأنت طالع بس ما تطلعش قوي يعنى، ولك أنشطة كثيرة.

أول ما بـ تدخل من الباب بـ تلاقي صورة لقمم الجبال فعلًا باللون الأزرق الجميل، وعلى أيدك اليمين هـ تلاقي الحائط مرسوم عليه مربعات بكل الألوان علشان تسيب تعليقك في شفشاون وحاطين يافطة كاتبين عليها "اكتبوا حاجة تخلي الناس تبتسم في المربعات"، وكل مرة تروح تفتكر أنك سيبت جزء من روحك هناك.

 أما عن أصحاب فكرة شفشاون فهم مجموعة شباب جرئ وواقعي وهم رضوى محسن وأحمد رأفت ومحمد رشاد ومصطفى أبو سيف وأحمد كمال وأحمد نجيب، حبوا أنهم يبنوا لنفسهم مساحتهم الخاصة اللي بـ يبدعوا فيها ويساعدوا غيرهم أنهم يبدعوا ويشتغلوا براحتهم، بمنتهى البساطة شفشاون دي مساحة عمل مشترك، يعنى لو عاوز تذاكر في مكان هادئ وتلاقي اللي يشجعك على المذاكرة، لو عاوز تعمل اجتماع سواء في شغلك أو لعملك الأهلي، أو لو عاوز تتعلم أي نوع من أنواع العلوم، هـ تلاقي كورسات في اللي أنت عاوز تتعلمه، وناس تتواصل معاهم في مجالات مختلفة ودي ميزة مساحات العمل المشتركة.

في الفترة الأخيرة انتشرت الفكرة دي وسط الشباب وبقى فيه أكثر من مكان للعمل المشترك في مدينة نصر والدقي وأماكن ثانية كثير، بـ يدعموا فكرة أنك تنزل تشتغل في مكان هادئ فيه ناس بـ تشتغل زيك أو بـ تذاكر، لأنك بـ تتعرف كمان على ناس ممكن تنفعك في شغلك أو في حياتك عامة، من مبدأ أن معرفة الناس كنوز.

نيجي للجد بقى أسعارهم مناسبة جدًا لو قارنت أنك ممكن تقعد اليوم كله بره البيت بالمبلغ البسيط ده في مكان محترم، غير أنك لما بـ تقعد اليوم كله كل مشروباتك ببلاش على حساب صاحب المحل زي ما بـ يقولوا.

بالنسبة للأسعار الطالب المجتهد يبدأ بالساعة بـ 5 جنيه والحسابة بـ تحسب زي أي سنتر بس الفكرة بقى أن العداد بـ يقف عند 15 جنيه بعد ثالث ساعة، وطبعًا مشروباتك في اليوم عليهم من شاي وقهوة وهوت شوكليت والذي منه، لكن لو حضرتك عضو في مؤسسة غير حكومية أو نشاط طلابي فرق السعر هـ يبدأ من 3 ساعات هـ يبقوا بـ 25 جنيه لحد آخر اليوم. أما لو حضرتك في شركة محترمة فلأنك يا سيدي العامل قدوة لأخواتك الطلبة وبـ تساهم في المجتمع وكده الثلاث ساعات بـ 35 جنيه برضه لآخر اليوم.

وفي حالة أن حضراتكم عاوزين تعملوا اجتماع وعاوزين قاعة خاصة بكم، بـ يكون بداية من 5 أفراد والساعة بـ 25 جنيه، والساعتين بـ 50 جنيه، وبعد الساعة الثالثة كل ساعة بـ 3 جنيه. ولو عددكم أكثر من 10 أفراد بـ نزود من ثالث ساعة 2 جنيه بس، أما لو عاوز قاعة كبيرة ممكن تستوعب لحد 100 شخص وربنا بـ يبارك ما تقلقش.

كمان شفشاون كل فترة بـ تعمل دورة تعليمية في مختلف المجالات، زي دورة التعليم المرن اللي عملوها الشهر اللي فات، ودورة الدفاع عن النفس للسيدات فقط we-do Training والأماكن محدودة للأسف، ودورات مختلفة ثانية كثيرة ممكن تشوفها على صفحتهم على الفيسبوك.

ولأنهم فعلًا بـ يختلفوا عن الآخرين، مكتبة شفشاون مفتوحة لكل اللي حابب يقرأ ويشارك بكتبه، بالتعاون مع جروب رشح لي كتاب على الفيسبوك وTrustious.

أخيرًا شفشاون مش مجرد مكان بـ تذاكر فيه أو بـ تجتمع فيه مع صحابك، ده مساحة بـ تساعد الناس أنها تبدع وتشتغل من قلبها.