مهرجان القاهرة لموسيقى الجاز 2015: خمسة عروض اوعى تفوتك السنة دي - فن وثقافة Feature - كايرو 360
 







مهرجان القاهرة لموسيقى الجاز 2015: خمسة عروض اوعى تفوتك السنة دي
مهرجان القاهرة لموسيقى الجاز 2015: خمسة عروض اوعى تفوتك السنة دي
اصدرت في: 12/10/2015

موسم جديد من مهرجان القاهرة لموسيقى الجاز على الأبواب، ومنتظر مشاركة عدد من أهم الفرق الموسيقية والموسيقيين في البلد على مسارح ذا جريك كامباس في وسط البلد مع عروض ثانية متميزة من الشرق الأوسط والعالم، فرق وفنانين من كل مكان بجد، يعني من أول لبنان والعراق لغاية فرنسا وفنزويلا واليابان.

المهرجان هـ يكون في الفترة من الخميس إلى الأحد 15: 18 أكتوبر، وصحيح المهرجان مليان بما لذ وطاب من المدارس الموسيقية المميزة، بس فيه عدد من الأسماء لازم تحضر عروضهم.

 

ريما خشيش

إمتى؟ يوم الخميس 15 أكتوبر الساعة 9 بالليل

فين؟ المسرح الرئيسي

مع نزول ألبومها "فلك" اللي ناس كثير بـ يعتبروه ماشي على الطابع الكلاسيكي الحديث، تعتبر المغنية اللبنانية ريما خشيش واحدة من المواهب الموسيقية الرائعة في الشرق الأوسط اللي مش واخدة حقها بالشكل الكافي، كمان قُدرتها أنها تغني أشكال معقدة من الموسيقى العربية ساعدتها توصل لجيل الشباب وتقدم واحدة من أرقى وأجمل عمليات الدمج بين موسيقى الشرق والموسيقى العالمية اللي ممكن تسمعها.

في نفس اليوم تقدر تحضر حفلات: للثلاثي ماكيكو هيراباياشي (7 مساءً) وريف باند (10:30 مساءً).

 

نوربرت شنايدر

إمتى؟ الخميس 15 أكتوبر الساعة 8 بالليل

فين؟ مسرح فايب جام Vibe Jam، داخل المكتبة.

نوربرت شنايدر هو موسيقي استرالي حصل على عدد من الجوائز وقدم عدد من الألبومات المميزة، وهو أحسن واحد يخليك ترقص وتدندن طوال الليل، والفضل يرجع لأغانيه الخفيفة الجذابة على خطى أغاني البوب، نوربرت كمان هـ يقدم حفلة ثانية في كايرو جاز كلوب يوم السبت 17 أكتوبر ضمن عروض المهرجان الإضافية، وهـ تلاحظ كمان أن موسيقى نوربرت متأثرة بموسيقى الريجي والفانك والآر أند بي، وده بـ يضيف روح احتفالية مبهجة لموسيقاه.

في نفس اليوم تقدر تحضر حفلات: لا يوجد.

 

فريق L'Hijâz'Car

إمتى؟ السبت 17 أكتوبر الساعة 7:30 بالليل

فين؟ مسرح فايب Vibe Jam، داخل المكتبة

أحسن وصف لموسيقى L'Hijâz'Car هي: موسيقى جاز من منطقة البحر المتوسط مع لمسات شرقية مميزة، وهي غير أي حاجة هـ تسمعها في المهرجان، الموضوع غريب شوية ومختلف، والفريق الفرنسي المكون من خمسة أفراد بـ يقدموا عروض حماسية باستخدام الباص كلارينيت Bass Clarinet، والآلات الإيقاعية والكونترباص اللي يعتبروا أساس أعمالهم، الموضوع ممتع ومختلف فعلاً.

في نفس اليوم تقدر تحضر حفلات: تود ماركوس كوينتت (4:30 مساءً) وإليسا رودريجيز كوارتيت (6 مساءً) وهاويدرو (9 مساءً).

 

نصير شمة

إمتى؟ يوم الجمعة 16 أكتوبر الساعة 8:30 بالليل

فين؟ المسرح الرئيسي

طبيعي أسطورة العود العراقية نصير شمة يكون حاضر المهرجان، وحفلته هـ تكون بمصاحبة فريق من العازفين اللي يوصل عددهم لغاية 23 فرد وهم فريق "Blood, Sweat, Drums+ Bass". أكيد موهبة نصير شمة في عزف العود هـ تكون ممتعة مع وجود الفريق الدانماركي وآلاتهم القوية.

في نفس اليوم تقدر تحضر حفلات: ستيفان ماركوفيتش/ أكرم الشرقاوي (6:30 مساءً) بوب مغرب (10:30 مساءً).

 

سعاد ماسّي

إمتى؟ الأحد 18 أكتوبر الساعة 9 بالليل.

فين؟ مسرح فايب Vibe Jam، داخل المكتبة

اختيار ثاني طبيعي ومنطقي، أصل مين يقدر يستغنى عن عظمة موسيقى سعاد ماسّي، بعد ما عملت ثلاث حفلات السنة دي في مصر (اثنين في القاهرة وواحدة في الساحل)، سعاد هـ تحظى بشرف الغناء في حفل ختام المهرجان وبكده تكون مسك الختام.

في نفس اليوم تقدر تحضر حفلات: افتكاسات (7:30 مساءً)

 

لمعلومات أكثر عن مهرجان القاهرة لموسيقى الجاز، اضغط هنا وتابع أجندة كايرو 360.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/10/2015
-