جامع الحاكم بأمر الله: الحلم اللى كمله الابن بعد أبوه فى شارع المعز - فن وثقافة Feature - كايرو 360
 







جامع الحاكم بأمر الله: الحلم اللى كمله الابن بعد أبوه فى شارع المعز
جامع الحاكم بأمر الله: الحلم اللى كمله الابن بعد أبوه فى شارع المعز
اصدرت في: 18/01/2016

المعز:

تعرف شارع المعز؟ زرته قبل كده؟

لو الإجابة بأيوه..

يبقى جاوب على السؤال ده..

جربت تخلص الشارع لآخره؟

تمام..

برضه الإجابة أيوه؟

(كمل معانا باقى الموضوع)

 

آخر شارع المعز بالضبط عند باب الفتوح.. هـ تلاقى هناك واحد من أجمل الجوامع اللى هـ تقف أمامها وتستمتع بها فى حاجات كثير.. هـ تستمتع بالحالة والتصميم والوسع والجمال والنقوش.. والحاكم بأمر الله..

 

الحاكم:

اللى بدأ البناء فى الجامع ده هو الخليفة الفاطمى الخامس العزيز بالله.. لكنه توفى قبل ما يكمل بناؤه.. واللى كمله ابنه الحاكم بأمر الله الخليفة الفاطمى السادس.. وكان رجل كريم جدًا مع كل أطياف المجتمع ومع المسلمين والمسيحيين، كل الناس كانت مبسوطة فى عهده.. لكن برضه كان فيه مشاكل فى عهده كثير وفتن وحاجات كثير قدر أنه يسيطر عليها لأنه كان حاكم قوى.. وكان حلمه أنه يكمل بناء الجامع ويبقى على اسمه.. هو الخلود اللى بـ يدور عليه كل الناس.

 

الخلود:

وعلشان الخلود حاجة صعبة مش سهلة فالجامع تفاصيله كثير.. بدأ بناء الجامع 379 هـ، وانتهى فى عام 403 هـ... تخيلوا الوقت قد إيه.. بس لما تروحوا هـ تعرفوا ليه أخذ كل الوقت ده، مبدئيًا كده الجامع طوله 120 متر وعرضه 113 متر.

ولما حضرتك تروح ناحية واجهته البحرية هـ تلاقى مدنتين عاليين ومعمولين بتصميم مثمن عبقرى.. وكل مآذنة حولها قاعدة هرمية الشكل وتتركب كل قاعدة بقى من مكعبين فوق بعض.. والمكعب اللى فوق راجع لورا شوية علشان يقدر يشيل المآذنة وارتفاعه تقريبًا بـ يبقى قد ارتفاع سور الجامع.. وطالعة باصة للسما من كل مكعب مآذنة مثمنة وفى نص الواجهة البحرية وبين المآذنتين هـ تلاقى مدخل الجامع الأثرى وهو أول مدخل بارز بُنى في جامع فى القـاهرة كلها.. وبـ يغطى المدخل قبة أسطوانية بطول 5 متر تقريبًا..

ولازم لما تروح تقف هناك عند الباب شوية وتشوف العقد اللى معقودة من الحجر وتتأمل بقايا النقوش البديعة اللى معمولة على الطراز الإسلامى ولما تدخل هـ تلاقى مساحة كبيرة جدًا وواسعة هـ تحس فيها أنك جوه عالم ثانى خالص.. عالم مالوش علاقة بنا ولا بعالمنا.. حاجة كده هـ تخليك تحس بالسلام النفسى هناك..

وفى وسط المساحة الواسعة دى فيه قبة فى النص شكلها كانت بير قديم أو حاجة كده للوضوء زمان.. وبعدين تدخل بقى علشان تتفرج على الإيوان اللى جوه وفيه القبلة بنقوشها البديعة وفيه العواميد الكثير اللى مرصوصة بانتظام علشان تقدر تتحمل سقف المكان اللى الناس بـ تصلى فيه.. هناك هـ تلاقى حالة من الطمأنينة من الاستقرار من راحة القلب، هـ تلاقى ناس بـ تصلى وناس بـ تذاكر وناس بـ تتصور وناس قاعدة بـ تتكلم وناس قاعدة بـ تتأمل.. هناك هـ تلاقى حالة مش عارفين نوصفها، حالة بـ تتحس بس.. روحوا وحسوها.

مزيد من الصور
  • جامع الحاكم بأمر الله: الحلم اللى كمله الابن بعد أبوه فى شارع المعز
  • جامع الحاكم بأمر الله: الحلم اللى كمله الابن بعد أبوه فى شارع المعز
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الجواد
حرر بواسطة:
أحمد عبد الجواد
تاريخ النشر:
18/01/2016
شاعر عامية وصحفى ومنسق مشروعات أدبية فى الساقية، كائن بـ يحب الحياة، أحيانًا بـ يتحول لشخصية أسطورية وهو بـ يكتب بـ يظهر له جناحين، أو بـ يختفى ويظهر فى أماكن مختلفة، بـ يفضل أكل البيت مع أسرته عن الأكلات السريعة، بـ يلعب لعبة يابانية اسمها "آيكيدو" وحصل على الحزام الأسود فيها بعد معاناة.