مؤسسة الحلقة: مركز لتعليم علوم التراث الإسلامي فى منطقة الحسين - فن وثقافة Feature - كايرو 360
 







مؤسسة الحلقة: مركز لتعليم علوم التراث الإسلامي فى منطقة الحسين
مؤسسة الحلقة: مركز لتعليم علوم التراث الإسلامي فى منطقة الحسين
اصدرت في: 21/01/2016

كثير مننا لما بـ يسمع جملة "علوم التراث الإسلامي" دماغه دايمًا بـ تروح لعلوم الشرع واللغة بتشعباتهم، لكن قليلين جدًا اللي يعرفوا أن فيه علوم فنية بحتة لازالت مصنفة كعلوم تراث إسلامي وبـ يتم تدريسها على نفس هيئة تدريس علوم الشرع واللغة (من حيث نظام الإجازة والتلقي المسند وما إلى ذلك) في الجهات الرسمية والخاصة اللي مهتمة بإحياء التراث وبـ تدرس العلوم الإسلامية.

يعني مثلًا، تعرفوا أن كثير من المحاضرين ذوي الخبرة العالية والعلم الكثير في مدارس تعليم الخط العربي النظامية هم بالأساس مشايخ من الأزهر الشريف؟ وأخدوا فن الخط زي بقية العلوم تدرجًا في مستويات التعلم لحد ما أحكموا أصوله وقواعده ومذاهبه وتطبيقاته!

الموضوع ياخد الروح كده.. فكرة أنك تبقى متقن لفن ما بالشكل ده ويرجعك لثقافتك ويحسسك بانتمائك لها وينسب اللي بين أيديك النهارده لأصله بتاع زمان، حتى لو كان اللي بين أيديك ده.. مجرد "فن"!

هـ نتكلم دلوقت عن أحدى المؤسسات اللي ظهرت من فترة مش كبيرة نسبيًا وبدأت تدرس الفنون العربية جنبًا إلى جنب مع علوم ثانية بنفس الطريقة والمنهج والأسلوب وعلى أيد متخصصين ذوي كفاءة عالية وخبرة واسعة، وثقافة عربية أصيلة.

 

مؤسسة الحلقة لإحياء التراث

المؤسسة تم افتتاح مركزها الرئيسي في 1 شارع أم الغلام بجوار مسجد الحسين بمنطقة الأزهر عام 2007، وتم إطلاق أنشطتها بانتظام في المقر ده لحد النهارده.

 

أيوه اللي هي تطلع إيه بقى أنشطتها دي؟

بص يا سيدي.. أنشطة المؤسسة بـ تنقسم لقسمين كبار لهم أصل واحد: القسم الأول لتدريس القرآن وتحفيظه للعرب والوافدين ومنحهم إجازات في تلاوته وحفظه على أيد محفظين مجازين بأسانيد عالية.

والقسم الثاني وهو موضوع كلامنا: تدريس الفنون العربية القديمة على نفس المنهج التعليمي، والفنون اللي بـ يدرسوها هناك (إلى الآن) هما:

- فن المقامات الصوتية الشرقية: وده للناس اللي عاوزة تتعلم التلاوة أو الابتهالات الدينية أو الإنشاد أو حتى الغناء الشرقي عامة وتتمكن من المعرفة والأداء بشكل كويس.

- وفن الخط العربي: وده النشاط الأبرز للمؤسسة والأكثر شهرة، واللي عليه إقبال شديد جدًا من فئات عمرية منوعة وشرائح فكرية واجتماعية مختلفة، ومخصص لتدريسه ثلاثة أيام أسبوعيًا الأحد والثلاثاء والخميس.

 

طيب.. أنا بقى لو حبيت أروح أنتظم في أي نشاط من دول باعمل إيه؟

الموضوع بسيط جدًا، تروح المكان أي وقت (اتصل قبل ما تروح علشان تتأكد أن مسؤول الحجز موجود في المكان، رقمهم ‎01111771638)، وبـ تسجل اسمك على قائمة الانتظار في الحاجة اللي أنت عاوز تتعلمها، وأول ما يبقى متاح مكان هـ يكلموك علشان تبدأ.

 

وهنا فيه ملاحظتين مهمين لازم نقولهم:

الملاحظة الأولى أن المكان بـ يكون عليه ضغط شديد طوال الوقت تقريبًا من الطلاب المصريين والوافدين، فبالتالي ممكن يتأخروا عليك جدًا في أنهم يكلموك ويبلغوك ممكن تبدأ إمتى، فالموضوع هـ يحتاج منك متابعة باستمرار علشان يحسوا بالاهتمام ويعرفوا أنك هـ تلتزم فيخلوك أولوية عندهم.

الملاحظة الثانية: أن الضغط على المكان كبير زي ما قلنا وبالتالي الناس هناك مش بـ يسمحوا بأن حد غير ملتزم يكون موجود في الدورات، لأنه بـ يكون شاغل مكان على الفاضي وفيه غيره ممكن يكون مستني يستفيد به، فلما تبدأ تحضر لازم تاخد بالك أن عدم الالتزام يعني عدم الاستمرار مباشرة.

 
ممكن كمان تتابع صفحة مؤسسة الحلقة على الفيسبوك علشان تعرف تفاصيل أكثر عنهم وعن نشاطاتهم، وإن شاء الله تقدر تستفيد منهم وتعدي على تجربة تعلم لطيفة جدًا.

مزيد من الصور
  • مؤسسة الحلقة: مركز لتعليم علوم التراث الإسلامي فى منطقة الحسين
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
21/01/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟