9 فنانين مصريين محبي الكوميكس لازم يكونوا عارفينهم - فن وثقافة Feature - كايرو 360
 







9 فنانين مصريين محبي الكوميكس لازم يكونوا عارفينهم
9 فنانين مصريين محبي الكوميكس لازم يكونوا عارفينهم
اصدرت في: 28/03/2016

بالرغم من أن مجلات الكوميكس بمفهومها المعتاد تعتبر حاجة جديدة نسبيًا في مصر، إلا أن مجلات زي "توك توك" و"جراج" قدرت تحقق نجاح وانتشار واسع، وأثبتت أن القاهرة ممكن تكون مقر عالم الكوميكس في الشرق الأوسط بعد ما كانت بيروت هي المقر الأوحد للفن ده لسنين طويلة، لو أنت شاكك في كلامنا ده، خذ عندك مجموعة الفنانين دول اللي لازم تكون عارفهم لو لك في الكوميكس.

 

1 أنديل:

(صورة خاصة بأنديل من على الفيسبوك)

بمشاركته الدائمة في "مدى مصر" و"توك توك"، مافيش حد متابع كوميكس مصرية ما صادفش رسمة من رسومات أنديل الساخرة، أكثر حاجة بتميز أنديل أنه بيعرف إزاي يوصل الفكرة من غير هري كثير، وده اللي بيخلي الكوميكس الخاصة به منتشرة على الإنترنت... فنان ساخر يعني دم خفيف وذكاء، فأكيد صفحة الفيسبوك الخاصة به هـتبسطك.

 

2- إسلام جاويش:

(صورة خاصة بصفحة الورقة على الفيسبوك)

ده بقى لازم تكون قابلت رسوماته في Scroll من سكرولاتك على الفيسبوك، وللي ما يعرفش، إسلام جاويش ده صاحب كوميكس "الورقة"، واللي بيميزها بساطة الرسم وذكاء الفكرة، وبالرغم من أن "الورقة" محققة نجاح كبير من زمان، إلا أن الأضواء تسلطت عليها أكثر لما اتقبض على إسلام جاويش بدعوة أن صفحة الفيسبوك "مالهاش تصريح"... آه، ما علينا، المهم الموضوع انتهى على خير الحمد الله، وربنا كرم "الورقة" وبقيت مجمعة في كتاب يسليك في الأيام السودة، خذ لك فكرة من هنا.

 

3- حاتم علي:

(صورة خاصة بموقع Metahatem.com)

حاتم علي عايش في منطقة نيو برنسويك في كندا، وهو من الفنانين المبدعين اللي حققوا نجاح كبير بره مصر؛ حصل على جوائز واشتغل مع مؤسسات وشركات عالمية، إحنا شخصيًا متابعين أعماله اللي لها طابع طفولي غريب من أيام ما كان موقع deviantart.com حاجة.

4محمد أنور:

(صورة خاصة بمحمد أنور من Tumblr)

شغله مش بس هتلاقيه في "توك توك"، ده له كمان مساحة كاريكاتير في صحف كثيرة منها "روزاليوسف" و"إيجيبت إندبيندنت"، بالرغم من أن أغلب أعماله سياسية، إلا أنه بينفذها بشكل خفيف ومختصر زي ما كتاب الكوميك ستريب قال... حتى شوف.

 

5طارق شاهين:

(صورة خاصة طارق شاهين El Khan)

مولود في مصر وعايش في إنجلترا، طارق شاهين له سلسلة بعنوان "الخان"، واللي من خلالها نشر كتابين بعد تقديمها في Daily News Egypt. شغله باللغة الإنجليزية وله اتجاه سياسي ساخر وسلس سهل المتابعة.

 

6 - دعاء العدل:

(صورة خاصة بدعاء العدل من Tumblr)

من أكثر الفنانين المنتشرين على مواقع التواصل الاجتماعي، ده غير أنها من الفنانين المشاركين على طول في جريدة المصري اليوم. بجانب أنها من الرسامات القلائل في المجال ده بطابع أعمالها السياسي المؤثر، دعاء العدل تم القبض عليها بـتهمة ازدراء الأديان سنة 2012.

 

7شناوي:

(صورة خاصة بـتوك توك على الفيسبوك)

شناوي هو الرجل اللي وراء مجلة "توك توك"؛ مؤسسها، مصممها وكمان مشارك فيها برسومه، بالرغم من أنه مالهوش صفحة خاصة به، إلا أنك ممكن تاخد فكرة عنه من خلال صفحة الفيسبوك الخاصة بـ"توك توك".

 

8- شريف عادل:

(صورة خاصة بـبرباطوز على الفيسبوك)

لو لك في الخيال العلمي والكوميكس في نفس الوقت، عليك وعلى شريف عادل، سلسلته "فوت علينا بكرة"، واللي بتحكي عن البطل "فهمي" اللي عايش في سنة 3104 صدر لها كتاب بنفس العنوان، أما بقية أعماله فممكن تلاقيها على موقع "برباطوظ"... ممكن كمان تقرأ الحوار اللي كايرو 360 - موقعنا "الشقيق" عمله معاه.

 

9محمد وهيثم رفعت:

(صورة خاصة بـتوينز كارتون على Behance)

مش بس التوأم اللي عملوا لنا مجلة "جراج"، محمد وهيثم رفعت شاركوا كمان في تأسيس كوكب الرسامين، ده غير أنهم كانوا ضمن لجنة التحكيم في مهرجان القاهرة الدولي للقصص المصورة 2015. شغلهم له أسلوب منظم وذكي في نفس الوقت، اتفرج عليه من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
28/03/2016
-