سلي صيامك: 10 كتب مناسبة لنهار رمضان - كتب Feature - كايرو 360
 







سلي صيامك: 10 كتب مناسبة لنهار رمضان
سلي صيامك: 10 كتب مناسبة لنهار رمضان
اصدرت في: 11/06/2016

"سلي صيامك".. جملة مشهورة ومعروفة عند كل الناس، دايمًا بنحاول نلاقي حاجة نعملها علشان الوقت يضيع ومانحسش بالجوع، أو بالعطش (العدو الكبير) في الصيف ده، فيه ناس بتسلي صيامها بالنوم، التلفزيون، قعدة الصحاب، أو على الإنترنت، لكن فيه شكل تاني للتسلية وهو القراءة.. ودي مش أي تسلية.

في الموضوع ده هنرشح لكم مجموعة كتب، والترشيحات دي قايمة على حاجتين أساسيتين الأولى هي بساطة الكتاب وطبعًا يكون مفيد، والتانية هي فكرة التسلية اللي بيقدمها، وبكده هتكون سليت صيامك واستفدت، وكمان ممكن تعمل حاجة تانية حلوة أنك تحكي الكتاب لأصحابك لما تقابلهم.. يعني زي ما تقول كده (فيد واستفيد).

 

الكتاب الأول:

تاكسي (حواديت المشاوير) لخالد الخميسي، الكتاب اللي عمل صدى واسع لما نزل الأسواق، واتطبع طبعات كتير، وكمان اتحول لفيلم، الكتاب بيوصف المجتمع المصري بشكل شيق قوي، حدوتة سواق تاكسي، ويا عينى على اللي بيقابله.

 

الكتاب التاني:

عايزة أتجوز لغادة عبد العال.. الكتاب خرج من سلسلة مدونات اللي عملتها مؤسسة الشروق، كان من المفروض إنها سلسلة عادية بتطلع كتب ومحاولات كتابة لشباب واعد، لكن الكتاب كأنه عمل سحر للناس، تقريبًا أغلب الشباب اللي بيقروا اشتروا الكتاب ده وعاشوا مع حواديت البنوتة اللي بتحكي عن رحلتها مع اختيار العريس.

 

الكتاب التالت:

الخيميائي لباولو كويلهو.. هي مش مجرد رواية، ومش مجرد رحلة لشاب بيدور على الكنز، الموضوع أكبر من كده، على الرغم من بساطة اللغة والحدوتة، لكن باولو كويلهو عمل في الكتاب ده اللي ما يتعملش.

 

الكتاب الرابع:

يوتوبيا لأحمد خالد توفيق.. وصراحة شغل دكتور أحمد مختلف من وقت ما قرر يكتب للشباب قصص الرعب والبطل المختلف تمامًا د/رفعت إسماعيل، اللي هو دكتور مثقف وبيدخن بشراهة وكبير في السن، لكنه دكتور مختلف، في يوتوبيا بقى حالة تانية خالص هتعيش مع الأغنياء اللي عزلوا نفسهم في الساحل الشمالي وبحماية المارينز، لكنهم لما حاولوا يطلعوا بره اليوتوبيا.

 

الكتاب الخامس:

رحلتي مع غاندي لأحمد الشقيري.. كتاب في تنمية الذات لإعلامي متميز برامجه عملت نسب مشاهدات غير طبيعية، وكتاب رحلتي مع غاندي فيه خلاصة تجربة الشقيري في الحياة، هتستمتعوا.

 

الكتاب السادس:

الرباعيات.. لصلاح جاهين مش محتاجين نقول لكم أن الشعر زاد الروح، وأن شعر العامية ليه حالة خاصة، ولما يكون الشعر ده طالع من جوه قوي وبسيط وممتع وبيلخص رحلة في الحياة، يبقى ساعتها لازم تفهموا إننا بنتكلم عن عمنا صلاح جاهين اللي لخص تجربته في الحياة في مجموعة رباعيات اشتهرت بين الناس واتغنت واتعمل عليها مسرحيات وأفلام قصيرة ودنيا، لو مقرتش الرباعيات يبقى لازم تعمل كده.

 

الكتاب السابع:

مختارات محمود درويش.. درويش عمل دوواين كتير، له طابع خاص فى كتاباته بالفصحى، مش هتحس أنك بتقرا فصحى، هتحس أنك بتغني معاه، وهتقعد كل شوية تقول ياااه جاب منين الصور والتراكيب دي، الراجل ده عاش بيقرا ويكتب بس.

 

الكتاب التامن:

نقطة نور لبهاء طاهر.. أكيد محتاجين للروحانيات وإحنا في الشهر الكريم ده، وفيه روحانيات بأشكال مختلفة، لكن تقدروا تلاقوا روحانيات مرتبطة بالنور مع بهاء طاهر اللي بيغوص جوه النفس البشرية علشان يحكي لنا أسرار وعجايب هنعرفها عن نفسنا، وهنحاول معاه نلاقي النور.

 

الكتاب التاسع:

العادات السبع للناس الأكثر فاعلية.. ستيفن كوفي.. هو الأب الروحي لمدربي التنمية البشرية، ولازم تعرفوا أن مافيش تقريبًا مدرب تنمية بشرية ماقراش الكتاب ده واستفاد منه، هو ملخص تجارب كتير طلع من خلالها ستيفن كوفي، بأن الناس الأكثر فاعلية في الحياة والمجتمع عندهم سبع عادات ماينفعش ماتبقاش عندك، اقرأ الكتاب واكتشف العادات السبع.

 

الكتاب العاشر:

مثنوي.. لمولانا جلال الدين الرومي.. ماينفعش يعدي رمضان وأنت بتقرأ وماتقراش للصوفية، وماينفعش نقول تصوف، وماتجيش في دماغك مقولات مولانا جلال الدين الرومي، ولما نذكر الرومي يبقى لازم نذكر كتابه (مثنوي) اللي كل الاقتباسات اللي بتتاخد منه وبتقراها جاية من الكتاب ده، هو كبير صراحة، بس ممكن تبدأ قراية فيه وتعيش مع مولانا في حالة تانية خالص.

مزيد من الصور
  • سلي صيامك: 10 كتب مناسبة لنهار رمضان
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الجواد
حرر بواسطة:
أحمد عبد الجواد
تاريخ النشر:
11/06/2016
شاعر عامية وصحفى ومنسق مشروعات أدبية فى الساقية، كائن بـ يحب الحياة، أحيانًا بـ يتحول لشخصية أسطورية وهو بـ يكتب بـ يظهر له جناحين، أو بـ يختفى ويظهر فى أماكن مختلفة، بـ يفضل أكل البيت مع أسرته عن الأكلات السريعة، بـ يلعب لعبة يابانية اسمها "آيكيدو" وحصل على الحزام الأسود فيها بعد معاناة.