لو الصيف بيقعد سنين، والشتا برضه بيقعد سنين، لو الدنيا مش مفهومة، لو كل حاجة بنقرأ عنها في الأساطير بقت حقيقة في لعبة العروش - Game of Thrones. في مملكة عجيبة بتكلم خيالك وبس بتخليك مش عارف أنت في حلم ولا في حقيقة.

الروائي جورج .ر. مارتن عمل تحفة أصلية بجد بتتكلم عن الإثارة والغموض والمغامرة، وكل ده أصلًا في قارّتين خياليتين هما ويستروس وإيسوس في نهاية صيف طويل جدًا وفضل مستمر لعقد كامل من الزمن، يعني سنين كتيرة وصلت لـ 100 سنة والناس عايشة في صيف، وبتتصارع سبع عائلات علشان يسيطروا على العرش الحديدي للممالك السبعة، واللي يسيطر على العرش ده هيبقى هو الملك الأكبر من غير منازع، وفانتازيا الرواية من النوع اللي يخليك تركز معاها بشكل كبير وخيالك يسرح لأبعد مدى، صراحة هي ملحمة بكل ما تحمله الكلمة من معاني، مش مجرد ملحمة عادية، مش مجرد تنانين وفرسان بيحاربوها، دي ممالك وطوايف ومخلوقات وأساطير بتخلق أساطير، عالم من الجن والشياطين والمخلوقات اللي كتبها خياله عالي جدًا.

وفي وسط كل ده الملك الحاكم في الجنوب قوته خلاص بتقع بعد ما بيموت مساعده في ظروف غامضة، وهو مش عارف يعمل إيه، بيموت الحكيم اللي كان في إيده الحل والربط، وبيحتاس الملك وبيدور على أفضل أصحابه علشان يحل محل مساعده، ومش بيلاقي غير آخر وأخلص أصدقاؤه علشان يطلب منه أنه يعاونه في حكم البلاد، وعلشان يتطور الموضوع أكتر بتبدأ المخلوقات في الظهور. المخلوقات اللي ماينفعش أوصفها وهنسيبك تقرأ أنت وتتخيلها لوحدك، لأنها هي الخطر الأكبر على الممالك.

لازم نقول أن لغة الكتاب قوية جدًا والصور والسرد والخيال والأساطير حالة كده ماينفعش نقول عليها إلا أننا قدام عمل تاريخي لازم يتخلد بجد. وطبعًا كلنا تابعنا المشكلة اللي حصلت أول ما نزلت النسخة العربية من الرواية علشان سرقتها على الإنترنت وسعرها المبالغ فيه جدًا يعني لو أنا بحب أجيب نسخة أصلية واحتفظ بيها هل يا ترى ينفع أجيب نسخة في مجلدين بـ (260 جنيه) أعتقد الموضوع كده كتير بزيادة.

والكتاب ده اتعمل مسلسل وجاب من خلال شخصياته الغامضة قضايا كتيرة وناقشها، زي الدرجات الاجتماعية واختلاف الطبقات والدين والحرب الأهلية والحب والجريمة وعقابها والولاء والعدالة. وده اللي بيميز سلسلة الروايات دي عن غيرها أنها مش مجرد عمل تاريخي تم تأليفه على سبيل التسلية، هو عمل متكامل أصحابه عايزين يوصلوا بيه لمرحلة كبيرة وعالية من الكمال علشان يقولوا إننا علمنا اللي ماحدش قدر يعمله، وطبعًا هما في طريقهم أنهم يعملوا ده والدليل المسلسل اللي كسر الدنيا ووصلوا للموسم السادس فيه.