دليل كايرو 360 عن أهم الكتب اللي تناولت الثورة المصرية - كتب Feature - كايرو 360
 







دليل كايرو 360 عن أهم الكتب اللي تناولت الثورة المصرية
دليل كايرو 360 عن أهم الكتب اللي تناولت الثورة المصرية
اصدرت في: 26/05/2013

"عيش، حرية، عدالة اجتماعية" ده كان الشعار الرئيسي للثورة الشعبية في 25 يناير 2011 واللي بدأت بمظاهرات سلمية تحولت لمظاهر عنف في الأيام اللي تلتها في القاهرة والمحافظات، وانتهت بسقوط رأس النظام الرئيس السابق محمد حسني مبارك وحل الحزب الوطني وحل مجلسي الشعب و الشوري، دلوقتي في الشارع الناس بقت منقسمة على نفسها ما بين مؤيد للثورة، "الثورة دي نعمة من ربنا" ده كان رأي سواق تاكسي عن الثورة وفي الناحية الثانية "فين أيامك يا مبارك؟" وده رأي واحد من المعارضين، لكن في كل الأحوال الثورة كانت جاية جاية لأن اللي كان بـ يحصل في البلد زي ما بـ يقولوا "ما يرضيش الكافر"، النهاردة حضرنا لكم دليل من نوع جديد عن أهم الكتب اللي تناولت الثورة المصرية كأسباب وأحداثها ونتائجها، فيه أكثر من كتاب تناول الثورة فيه منها بشكل جدي وموضوعي ونظم وفي كتب ثانية كانت أشبه ما تكون تدوينة وما تستاهلش يتكتب عنها كتاب.

 

الثورة 2.0

هو واحد من الكتب اللي لازم تقروها عن الثورة المصرية، من تأليف المدون وائل غنيم اللي كان له دور كبير في صفحة "كلنا خالد سعيد" اللي تعتبر واحدة من أهم العوامل المحفزة لقيام الثورة، وائل في الكتاب بـ يحكي لنا أسباب الثورة من الأول خالص وكمان سيرته الذاتية من بداية تخرجه وحتى عمله في شركة جوجل، الكتاب يقدر يغير وجهة نظركم ويخليكوا تشوفوا حقائق ممكن ما شوفتوهاش قبل كده.

 

بلاغة الحرية

كتاب من تأليف د.عماد عبد اللطيف مدرس البلاغة والخطاب السياسي بكلية أداب جامعة القاهرة، بـ يحلل في الكتاب أشكال الخطاب السياسي وقت الثورة وبعدها اللي اختلف ما بين "خطاب الميادين" و"خطاب الشاشات" و"خطاب الصناديق"، لغة الكتاب بسيطة ومناسبة للقارئ العادي وبـ يحلل شوية حاجات أكيد هـ تعجبكم.

 

ثورة السلاحف

كتاب سياسي ساخر من تأليف الكاتب أحمد عبد العليم اللي بـ يتوقع فيه ويأمل في التغيير عن طريق الثورة، لو عاوزين تعرفوا ليه التغيير كان قادم قادم اقرأوا "ثورة السلاحف" وقولوا لنا رأيكم إيه؟

 

100 يوم من الثورة

كتاب مختلف شوية عن بقية الكتب اللي اتكلمت عن الثورة من ناحية أنه بـ يرصد الأحداث قبل الثورة، وبـ يقسم الثورة على ثلاث مراحل: الأولى "ما قبل ثورة" والثانية "25 يناير.. مصر تصنع المستقبل" والثالثة والأخيرة "مصر بعد ثورة 25 يناير"، كتاب معقول لو عاوزين تشوفوا الثورة بوجهة نظر مختلفة.

 

أجندة الثورة

ثلاث شباب وهم: إنجي محيي الدين وهالة الزغندي وأحمد سلطان اتفقوا على توثيق أحداث الثورة زي ما شافوها من أول البرد في يناير وهتافات "يا أهالينا انضموا لينا" والضرب والاعتقالات في كوبري قصر النيل، الكتاب إهداء لكل الشهداء والمصابين في أحداث ثورة حولت ميدان التحرير ليوتوبيا، اقروا وقولوا لنا افتكرتم ولا نسيتم.

 

الثورة الآن

لو أنت من جمهور فيديوهات قبل وبعد، يبقى أكيد هـ يعجبكم كتاب "الثورة الآن" للكاتب سعد القرش اللي بـ يرصد في الكتاب المتحولين اللي كانوا مؤيدين وجزء من النظام السابق وبعد سقوطه بقوا يتكلموا عن مساوئه ويهاجموه بكل قوة، كمان بـ يرصد حكايات الثورة اللي بـ تختلف من شخص لثاني، جربوه وقولوا لنا كام متحول اتصدمتم فيهم؟

 

على باب الثورة

هو رحلة جديدة مع الكاتب محمد فاروق عجم ينظر فيها بعين مختلفة وسط زحام المجتمع المصري وعرض للطبقات اللي قليل تكلموا عنهم في توثيقهم للثورة المصرية، بعيد عن النخب السياسية واللي زهقونا من كثر ما بـ نشوفهم في التليفزيون الكاتب بـ يعرض الناس "ولاد البلد" زي ما هو بـ يقول ويوصف لنا حال مصر قبل وبعد الثورة من خلال شهادات ناس بسطاء قامت الثورة علشانهم، من خلال ثلاث أبواب وهم: ديوان المظالم ونبض الثورة وعلى هامش الثورة يتناول الكتاب جوانب ماحدش تكلم عنها قبل كده من حياة المصريين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد نصر
حرر بواسطة:
محمد نصر
تاريخ النشر:
26/05/2013
منسق تحريري بالموقع العربي، دماغه مطرقعة وخيالية، بـ يحب القراءة والسفر، مدمن شوكولاتة، بـ يحب سبونج بوب وأيرون مان.