كتاب "متى سكن المصريون مصر؟" صراحة ممتع وكله معلومات وجديد فى فكرته، قديم فى الكلام اللى جواه.. هـ نقول لكم إزاى يعنى جديد فى فكرة تبسيط المعلومات والعلم قوى كده، وبعدين الطريقة اللى مكتوب بها الكتاب بسيطة جدًا، وقديم فى اللى جواه علشان بـ يكلمنا على مصر من "2 مليون سنة".

بصوا بقى.. من الآخر كده هـ نحكى لكم من الأول، مركز دوم الثقافى قرر يعمل سلسلة كتب اسمها "ببساطة"، السلسلة دى تمويلها من المركز وهدفها زى ما بـ يقول الروائى خالد الخميسى فى مقدمة الكتاب "أنها سلسلة كتب هـ تناقش قضايا فكرية معروضة بشكل مبسط وهـ تلعب الرسوم والتصميمات الداخلية فيها دور رئيسى فى تسهيل عملية القراءة.. يعنى الموضوع أنهم عاوزين يعملوا شكل يخلى القراءة أسهل وأمتع وهـ ينتقدوا كمان الحاجات الثابتة أو القضايا اللى الناس فاكرة أنها انتهيت هـ يعيدوا التفكير فيها بشكل نقدى وتعالوا نشوف الكتاب.

الفصل الأول بـ يبدأ "كان المناخ فى مصر يختلف تمامًا عما هو عليه الآن وفى الفترة التى لم يعرف فيها الإنسان المصرى الكتابة والتى قدرها الباحثون بحوالى "2 مليون سنة" وأطلقوا عليها اسم "عصور ما قبل التاريخ".

والفصل الثانى بـ يحكى لنا عن المعتقدات الأولى وعلاقة الدفن بالشمس وإزاى أن أقدم دفنة كانت لطفل فى مكان اسمه "نزلة خاطر" فى أسيوط وكان الطفل بـ يبص ناحية الشمس.. وكمان هـ نلاقى كلام عن الحياة عند المصرى القديم وإزاى كان بـ يعيش وكلام عن الزراعة والصيد والفخار.

وكمان هـ نلاقى حكاية التحول القديمة من إيمان المصرى القديم بالسحر والقوى اللى وراء الطبيعة وتحكمها فى الشمس والقمر زى ما كان بـ يخيل، لحد ما وصل لفكرة الإله وبدأ يعبد إله محدد وقد إيه ده أفاده فى حضارته وبدأت تظهر بعد كده الحضارات الأولى فى مصر والمراكز الأولى كانت فين، وكمان هـ نلاقى معلومات عن عصور ما قبل السرات وحضارة المعادى وإزاى اتعمل النظام فى مصر وكان شكله إزاى؟

الكتاب فكرته حلوة جدًا ومعمول حلو، كمان كمية الرسومات الكاريكاتيرية فى الكتاب بـ تخليك قاعد بـ تقرأ وأنت مستمتع بالرسم وبالتعليقات اللى بـ تقولها شخصيات الرسوم وبـ تخلى خيالك يسرح معاهم وتقعد تتخيل إزاى كان عايش المصرى القديم وإيه حكايته وإمتى بنى القرى الخاصة به والسياسة هناك بلغة رقيقة بجد بـ تخلط العامية فيها بالفصحى وبـ تساعد الرسوم وأسئلة الشخصيات المرسومة اللى بـ تساعد على التفكير فى المصرى القديم.