الأطفال أحباب الله.. نعمة ربنا بـ يرزقنا بها وبـ تملأ حياتنا وخاصة حياة الأم بمشاعر لا يمكن وصفها مهما بلغت درجة التعب والإرهاق اللي بـ تحس به، وبـ يضاف للأحاسيس دي شعور الخوف لو كانت تجربة الحمل فى الطفل الأول بالنسبة لأي ست، الطبيعي فى الشعب المصري الستات بـ ينقلوا خبراتهم لبعض من غير ما يتأكدوا هل هي مبنية على أسس علمية صحيحة ولا لأ، ده غير أن طبيعة حالة وجسم وظروف حمل كل واحدة ست بـ تختلف عن غيرها.

لو كنت حامل أو بـ تخططي للحمل لا غنى عن استشارة الدكتور الخاص بك طبعًا وكمان قراءة كتاب "أنا حامل" الصادر عن دار دّون، الفكرة بدأت بموقع ana7amel.net اللي فيه مقالات عن كل ما يخص المرأة الحامل، بعد كده فكر أصحابه ياسمين شاهين وشيماء الجمال أنهم يصدروا كتاب يعد دليل للمرأة الحامل فيه خلاصة مقالات وموضوعات الموقع بس بطريقة منظمة إلى جانب الاستعانة بمصادر ومراجع عربية وأجنبية، كمان راجع المادة العلمية فى الكتاب د. سحر البرادعي مدرس أمراض النساء والتوليد والعقم بجامعة القاهرة.

الموضوع بدأ مع شيماء الجمال أو فكرة الموقع بعد ما مرت بكذا تجربة إجهاض وولادة طبيعية وقيصرية وحمل لتؤام فى حياتها الشخصية فقررت تشارك خبراتها دي وإلا كانت هـ تتجنن، الكتاب أكثر من رائع، فيه معلومات قيمة جدًا وماشي خطوة بخطوة من أول التخطيط للحمل وإيه الأسباب اللي ممكن تمنعه لحد الأيام الأولى بعد الولادة، كل حاجة ممكن تتخيليها هـ تلاقي إجابة عليها، حتى الحاجات اللي ممكن تشوفيها أنها مش مهمة هـ تلاقي شرح وتوضيح لها، زي تأثير بعض الأكلات عليكي وعلى البيبي، إيه اللي منها ممكن يسبب إجهاض، ونفس الشيء بالنسبة للأدوية، 8 فصول، كل فصل مليان نقط كثيرة جدًا كلها مهمة فى رأينا، حتى أنهم مهتمين بجمال الحامل وبـ يقدموا نصائح تلبس إيه ومعلومات عن بنطلون الحمل، وجفاف البشرة، وحماية الأظافر، والتمارين اللي ممكن تتعمل علشان تسهل الولادة والرياضات الممنوعة.. وغيرها كثير جدًا.

كمان من الحاجات اللي ممكن تؤرق الحامل اكتئاب ما بعد الحمل، إيه أسبابه وممكن تتغلب عليه إزاي، والتوتر أثناء الحمل وتأثيره، وألم الدوالي، وغثيان الحمل، والوحم، ووجع الظهر، والاضطرابات المعوية، كل حاجة مفصلة بالأعراض والأسباب وتتغلب عليها إزاي.

فيه صفحات لطيفة قوي فى الكتاب مدعمة برسوم جميلة ورقيقة فيها ستات بـ تحكي عن تجربتها مثلًا لما بلغت زوجها أنها حامل قالت له إزاى وإيه كان رد فعله رسمت البسمة على وجوهنا، وكمان إيه النصائح اللي قيلت لهم خاطئة أو سمعوها خلال حملهم، بعضها كان يهلك من الضحك، عامة الرسومات والإخراج الفنى من تصميم أحمد عاطف مجاهد أضاف للكتاب كثير جدًا، خلتنا كل شوية نتشوق نقلب الصفحة علشان نشوف الرسمة اللي جاية إيه وكسرت حاجز الملل اللي ممكن يصيب حد من قراءته للنص.

أحلى جزء فى الكتاب بقى -بالنسبة لنا- آخره.. وهمي، فكرة أنك تبقى عارفة إيه اللي بـ يحصل لابنك جواكي دي رائعة، عاملة كده كأنه "سونار بالكلام"، بـ يشرح الجزء ده تطور الحمل أسبوع بأسبوع (إجمالى 40 أسبوع)، بـ يقول لك فيه دلوقت ابنك بـ يتكون في بطنك وإمتى بـ يكتمل القلب وباقى أعضاؤه، وشعور الأم فى الأسبوع ده مثلًا بـ يكون إيه وتتعامل معاه إزاي، وأقوى جزء أنه كمان بـ يقول لك ابنك دلوقت بقى وزنه وطوله قد إيه من أول ما يكون نطفة لحد لحظة الولادة، وده بـ ينمي إحساس ترابط فظيع بين الأم والطفل كأنها شايفاه أمامها أو جوه معاه.

مكتوب على ظهر الكتاب أنه الكتاب الأول فى سلسلة يحررها فريق عمل موقع ana7amel.net، وده بـ يخلينا متشوقين نعرف يا ترى الكتاب الثاني هـ يكون فيه إيه مختلف من معلومات ونصائح عن الأول أو هـ يقدم إيه جديد عامة.