الجملة دى أكيد عدت عليكم وأنتم صغيرين.. سواء كنتم بـ تقولوها سكر بنات أو سكر نبات وهو نوع من أنواع الحلوى الجميلة اللى بـ تدوب فى "الفم".. ومن هنا تم استخدام الاسم علشان يكون علامة مميزة لحاجات كثير، يعنى مواقع وألعاب وترفيه ومنتديات مهتمة بالستات والبنات الصغيرين والكبار اللى اتجوزوا واللى لسه على باب الجواز.

إحنا النهارده هـ نتكلم عن كتاب اسمه "سكر بنات" يعنى كتاب بـ يدوب فى "الفم" وبـ يخليك سعيد وأنت بـ تقرأه لأنه ببساطة كتاب فيه تفاصيل كثير ومتنوع ولغته سهلة وجميلة وبـ تدوب هى كمان لكن فى العقل مش فى "الفم"، وعلشان نتعرف عليه أكثر لازم نفهم الفكرة بتاعته.

الفكرة أن مجموعة من الشباب تجمعوا وقرروا ينشروا لنفسهم كتاب فيه شعر وقصص وخواطر لهم علشان الكتاب يشتهر ويتباع ويبقى معروف وفى نفس الوقت يبقى لهم كتاب فى السوق.. الفكرة حلوة لكن إيه الشروط مثلًا للنشر "مش قايلين"، طب بلاش.. ليه فيه ناس لها موضوعين أو ثلاثة وأغلب الباقيين لهم موضوع واحد بس.. "مش قايلين"، طب فين المقدمة اللى بـ تتكلم عن الفكرة "برضه مش قايلين"، دى الأسئلة اللى لازم هـ تسألها لنفسك وأنت بـ تبص على الكتاب.

لكن لما تخش جواه هـ تلاقى نفسك أمام ناس عندهم موهبة فى الكتابة لكن مستواهم الاحترافى متوسط، يعنى هما بـ يكتبوا حلو بس مش محترفين كتابة.. والكتاب فيه "31" كاتب وكاتبة تخيلوا.. إحنا بـ نتكلم عن: "آن محمود – خالد الفحام – إنجى مطاوع – دينا مصطفى – رانيا حجاج – ياسمين المساوى – إسلام كنفاش – نورة عبد الفتاح"وغيرهم كثير.

فكرة أن كل دول يتجمعوا فى كتاب فكرة حلوة لأنه هـ يضمن انتشار كبير لهم وكمان لو عملوا حفلة توقيع هـ تبقى هائلة جدًا، تخيلوا بس لو كل واحد فيهم قرأ شعر أو قصة أو لو كل واحد فيهم عزم عشرة أصحابه هـ يعملوا مهرجان.. وده تفكير حلو بره الصندوق.. بس علشان تقيم تجربة كل واحد فيهم هـ يبقى عندك مشاكل كثيرة قوى،إحنا لما نقرأ لواحد قصة أو شعر مرة واحدة هـ نعرف مستواه منين؟، علشان كده كانوا ممكن يقللوا العدد ويكثروا من الشغل بتاعهم.. لكن فى النهاية لازم نقف وراء المواهب والشباب علشان ينتشروا ويخلوا المجتمع يقرأ.