الحلقة الأولى قتلت القيصر.. ده أول عنوان بيقابلنا في الرواية الجميلة "وادي الرماد" للكاتب أحمد صلاح سابق، الرواية مكتوبة حلو، لكن متابعة أحداثها متعبة حبتين، يعني متعبة ومجهدة ووجع قلب.. مافيش مقدمة ولا إهداء، دخول مباشر في قلب أحداث الرواية اللي بتحكي عن انتهاكات كتيرة قوي عملتها قوات الأمن الوطني ضد المدنيين من الإسلاميين، وكل ده حصل بعد الإحتلال الأمريكي لمصر بخمس سنين، والدنيا اتحولت لرماد بجد، اغتصاب وقتل وسرقة ونهب، وخيال يخليك تكره مصر لو اتحولت للشكل ده فعلًا، أو لوالسيناريو ده حصل بجد.

القصة باختصار أن فيه حدث خيالي اسمه "فبراير الموت"، وبعده بشهر وبالتحديد يوم 25 مارس الطيارات الأمريكية هجمت على مصر بحملة كبيرة جدًا.. وفى خلال خمسين يوم القوات الجوية الأمريكية عملت أكتر من 100 ألف هجوم جوي على كل مصر.

وقبل ما يخلص الأسبوع السابع من الهجوم الجوي دخلت القوات البرية الأمريكية الأراضي المصرية، ودمرت المدن والقرى، وكل العمليات استمرت لمدة 90 يوم، حتى المقاومة اللي حصلت اتضربت بسهولة، والغزو ده سموه "عملية صواعق الرعب"، واللي كان اسم على مسمى صحيح، لأن الرعب دب في كل مصر، الحياة في الوادي بقى لها شكل تاني شكل جديد بقت حياة الرماد والوادي مبقاش وادي النيل بقى وادي الرماد.

ممكن تصنف الرواية دى أنها من أدب الحروب، زي روايات كتيرة حكت عن حروب ووثقت اللي بيحصل فيها، ودخل فيها قصص حب وعذاب وفراق وموت كده.. لكن المختلف هنا أنها مش موثقة لحرب حصلت فى الحقيقة، دي وثقت لحرب في خيال الكاتب، بس من كتر ما هو حقيقي في وصفه، ومجتهد في الكتابة فعلًا ده خلانا نصدق أن مصر اتبهدلت بجد، والحياة ما بقتش هي الحياة، الكاتب عنده نفس طويل بجد في الكتابة يقدر يحكي لك عن حاجات كتير ومتشعبة، ومتقلقوش مش هنحكي الرواية عشان أصلًا مش هينفع تتحكي فى مقال، وعشان هي طويلة قوي صراحة، ساعات بتحس بالملل فى النص من كتر التفاصيل، لكن الأكيد أنك هتستمتع لحد النهاية، ولما تيجي النهاية هتتفاجئ عشان المؤلف أحمد صلاح سابق متميز في كتابة روايات بتدور حوالين الجريمة، بس هو خد سكة تانية خلى الجريمة في حالة حرب، وخلى الناس تبين معدنها، وخلاك تسأل نفسك سؤال، هو إيه اللي هيحصل لو فعلًا حصلت حرب فظيعة زي دي في مصر؟

والمفاجأة بقى إن الرواية لها جزء تاني كمان، لسه بيكتبه، وفي آخرها عمل رسوم لكل الشخصيات اللي جات في الرواية زي نيفين أندرو صبري، بلال محمد سعيد، كارتر، والجنرال والقواد والعقل المدبر والباغية وغيرهم كتير..