الجاسوس العثماني رواية جديدة لمحمد معروف، بدايتها جريمة مكتملة الأركان.. مش هنفهم منها حاجة خالص.. غير إنها هتشدك جدًا.. الحكاية عن جماعة غريبة مش هتعرف عنها حاجة في الأول.. اللي فيها ناس من قديم الأزل.. موجودين في مصر في أماكن تاريخية كتير زى شارع المعز.. وعن راجل أجنبى بيعمل بحث عنهم.. لكنهم بيقتلوه بطريقة مبتكرة..

مبتكرة؟

هاه حلوة مبتكرة دى صح؟.. طب شدتك للرواية ولا لسه؟ ممكن تكون البداية عادية.. لكن لو عايز تتشد للرواية بجد.. تعالى معايا في الرحلة..

الرحلة:

هنمشي مع بعض بالراحة بين زمنين.. الأول 1878 أيام الدولة العثمانية هنعرف (طلعت رستم) اللي بينقلب ولائه ضد الدولة العثمانية عشان يتحول لجاسوس ويبقى بعد كده واحد من أهم رجال الباب العالي... الرحلة مخلصتش الرحلة مكملة، مع د/ حازم شاهين.. مش هتعرف هو إنسان عادي ولا مريض نفسي، بصراحة تركيبته صعبة جدًا، محتاجة دراسة لوحدها.. بيحب أخته ريم جدًا، لكنه تقريبًا بيكره كل الناس.. إلا لما شاف بنوتة صحفية هي اللي حبها وبدأ يقرب منها، علشان يعترف لها بحبه، ومن ساعتها الدنيا اختلفت واتحولت.. التحول إننا في رحلة جوه رحلة، رحلة في التاريخ، وفي الآثار، وفي قلب الجماعات السرية، وفي الحالات النفسية المعقدة اللي بيكتب عنها محمد معروف.

وكمان في الحاجات المهمة التانية اللي بيطعم بيها الرواية..

الرواية:

إيه بقى الحاجات التانية المهمة؟ عدوا معايا:

الراوي العليم اللي قادر يوصف لك كل المشاهد بدقة ومعرفة، وده كان اختيار جيد جدًا من الكاتب لأن النوعية دي من الروايات لازم يكون الراوي بتاعها عارف كل حاجة. طريقة حكيه وسرده اللي بتدخلك في حكاية وتقعد مكمل فيها بكل تفاصيلها، وبعدين ينقلك في فصل تاني لحكاية تانية خالص، ويستمر كده لحد ما يوصلك في النهاية لتجميعة الخيوط. وصف الشخصيات من العلامات المهمة في الرواية دي علشان الكاتب بيهتم بالتفاصيل، ويمكن ده خلى الرواية كبيرة عدت الـ 400 صفحة، لكنها مش مملة، بتخليك متابع كل مشهد وشايفه بتفاصيله (كأنك تراه). لعبة الإثارة مهمة جدًا كمان في السر وراء الباحث التركي اللي بيدور على الجاسوس العثماني اللي اتشاف آخر مرة فى القاهرة، وعلاقته بجماعة سرية عجيبة، وعلاقة حازم وصاحبه بالموضوع والتجارب العجيبة اللى هيخوضوها، والدنيا التانية اللي هيدخلوا فيها. السؤال الأخير اللي هتسأله لنفسك.. يا ترى الحياة الرتيبة أحسن، ولا العجيبة، ولا المفاجآت، ولا الرحلة، ولا الغموض، ولا إيه بالضبط؟ ركز معايا وابقى جاوب بعدين..