جوائز اختيارات محرري كايرو 360 لعام 2016 لأفضل أماكن الآيس كريم - كافيهات Feature - كايرو 360
 







جوائز اختيارات محرري كايرو 360 لعام 2016 لأفضل أماكن الآيس كريم
جوائز اختيارات محرري كايرو 360 لعام 2016 لأفضل أماكن الآيس كريم
اصدرت في: 17/05/2016

كثير من الناس بيعتبروا الآيس كريم عشق وإدمان مش مجرد حاجة مسكرة وساقعة ترطب عليهم الجو، علشان كده ما ينفعش تعدي عليه التفاصيل الصغيرة المهمة زي أن نسبة الثلج تكون كبيرة في الآيس كريم فمايكونش ليه طعم، أو أن النسب فيه تكون مش مضبوطة أو البسكويت مش طازة، حاجات كتير ممكن تضايق أي عاشق للآيس كريم علشان كده اختارنا لكم أفضل أماكن عمل الآيس كريم والجيلاتو والآيس كريم رولز علشان تستمتعوا بالصيف كما ينبغي أن يكون.

 

الفائزين بجوائز اختيارات المحررين لعام 2016 لأفضل أماكن الآيس كريم:

 

فروزي تويست – Frozzy Twist

إحنا مش بنبالغ لما نقول أن ده أفضل مكان تأكل فيه آيس كريم رولز في مصر، برغم المحلات الكتير اللي فتحت علشان تقلده إلا أن ما فيش حد قدر يوصل لتركيبة السرية للنكهات اللي بتخليك عاوز تعزل وتعيش جنبهم بس علشان متعتك ما تخلصش وأنت بتدوق كل يوم نكهة أحلى من التانية، خاصة آيس كريم التفاح لازم تجربوه.

 

ألورا جيلاتيريا – Alora Gelateria

 لو هنتكلم عن الإبداع والنكهة الأصلية يبقى ألورا لازم تكسب الجايزة الأولى، مش بس علشان موقعها المتميز في شارع 9 الأهم أن نكهات الجيلاتو رائعة، وكمان بيقدموا مخبوزات زي الكريب والوافل اللي طبعًا بتكون محشية آيس كريم.

 

جيلاتو ميو – Gelato Mio

سنة وراء سنة هيفضل جيلاتو ميو محافظ على سمعته والنكهات الجديدة اللي بيقدمها، سواء لما بيعمل مهرجان لنكهات معينة أو لما بنروح له في أي وقت علشان نستمتع بكل النكهات اللي بيقدمها.

 

ماندرين كويدر – Mandarin Koweider

الاسم اللي أول ما بنقوله أول حاجة بتيجي على بالنا الآيس كريم على طول، مين ما جربش عنده آيس كريم اللبان ولا الزبادي توت، كمان أثبت لنا انه مش بس متميز في الحلويات الشرقية، لأ ده يعتبر ملك من ملوك الآيس كريم في القاهرة.

 

ريجوليتو – Rigoletto

لما الماركة العالمية تفتح أكثر من فرع في فروع القاهرة بس علشان تبسط زبائنها بنكهاتهم المختلفة، يبقى لازم نمدح مجهودهم، اللي ممكن بيكون مش بيقدم أنواع كثير بس الأكيد أن النوع اللي بتجربه لا يمكن تناساه بعد ما تدوقه.

 

ستافولتا – Stavolta

 لو هنتكلم عن التنوع أو النكهة الإيطالية المختلفة، ستفافولتا في المعادي عنده تنوع كبير في نكهاته، سواء المنتجات اللبنية او اللي من الفاكهة، بس خلوا بالكم أنتم لو جربتوا الشوكولاتة عنده هتدمنوها.

 

يوجيز – Yoggy's

لو فيه مملكة سحرية للآيس كريم، أكيد هيكون فيه جزء كبير منه لليوجيز، مش بس لأنه دائمًا بيوفر فاكهة طازة مع الآيس كريم وحلويات مختلفة، لأ الفكرة في الطعم المختلف اللي قادر أنه يخطفك من دنيتك ويوديك دنيا تانية.

 

سكوبز – Scoops

المكان المختلف واللي بيقدم نكهات متنوعة ما بين الجيلاتو والآيس كريم بالزبادي والسموزي، سكوبز كمان بيقدم لك جيلاتو بوبز واللي هو عباة عن مصاصة آيس كريم لازم تجربوها.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
17/05/2016
-