المكان اللي فتح فيه «كوفي شوپ كومپاني» كان دايماً هادي جداً، وده كان زمان، دلوقتي الشارع بقى يادوب بـ يعَدّي عربية واحدة من كُتر العربيات اللي راكنة صف تاني قدام الكافيه. أول ما سمعنا أن الكافيه فتح فرع جديد في شارع أبو الفدا في الزمالك قُلنا لازم نروح ونجربه. الغريب أننا أخدنا شارع أبو الفدا من أوله لأخره ومالقيناش حاجة، وفي الآخر إكتشفنا أن الكافيه فاتح على النيل على طول (مش تحت عمارة يعني)، وده بـ يخللي موقعه هايل جداً، بالرغم أنه من برة مش باين كويس، وممكن جداً أنك تعمل زينا وتعدّي جنبه من غير ما تاخد بالك منه.

موقع الكافيه اللي على النيل على طول وتقسيمته من جوة بـ تحسسك أنك قاعد في كافيه في المصيف، وخصوصاً كافيهات «مارينا». الجو المفتوح ونسيم مية النيل اللي بـ تبقى شامه وانت على باب الكافيه، كل ده بـ يدّي للقعدة جوة طابع مميز عن كل كافيهات كايرو.

طول ما انت ماشي في الكافيه هـ تلاقي سلمتين لفوق، وسلمتين لتحت. وهـ تلاقي قعدات كتيرة بترابيزات وكراسي متنوعة، وفيه قعدة فوق بـ تطلعلها بكام سلمة برضه، ولو بصيت من فوقها لتحت تحس أنك قاعد في الهوا. فيه كمان شاشات LCD لزوم الماتشات وكده متوزعة في المكان كله بحيث أن كل الترابيزت تقدر تتفرج على التلفزيون بوضوح. إحنا لمّا رُحنا كان يوم فيه ماتش مهم وماكانش فيه ترابيزة واحدة فاضية رغم أن الكافيه لسّه مش معروف قوي، وتقريباً كان فيه ناس قاعدة برة الكافيه في الشارع من كُتر الزحمة.

المكان بـ يقدم شيشة ومشروبات وأنواع بسيطة من الأكل والحلويات. إحنا لمّا رُحنا كان المكان لسّه في مرحلة الإفتتاح والأكل الوحيد اللي متوفر كان الپيتزا، والحقيقة الپيتزا طعمها وعجينتها هايلة جداً. الپيتزا المارجريتا (جبنة وصوص طماطم فقط) كانت بـ 32 جنيه وإحنا طلبنا عليها إضافة مشروم (5 جنيه) وإضافة سوسيس (5.5 جنيه). أمّا پيتزا الپيپيروني كانت بـ 38.5 جنيه وكانت لذيذة جداً.

المشروبات فيها كل أنواع القهوة والشيكولاتة (المثلجة والساخنة)، وكمان العصائر والمشروبات المثلجة اللي من غير قهوة، وأسعارهم من أول 15 جنيه لغاية 30 جنيه، ومشروبات السموثيز Smoothies كلها بسعر موحد (22.50 جنيه).

نيجي بقى للشيشة، والحقيقة الشيشة عندهم مميزة أكتر من الكافيهات التانية وأشكالها غريبة. فيه الشيشة اللي على شكل علبة وبـ يحطوها على الترابيزة مش على الأرض، وفيه شيشة تانية عادية بس شكلها غريب وبـ تتحط على الترابيزة برضه. إحنا طلبنا تفاح فاخر (18 جنيه) وبـ ينزل معاها اللي الطبي (4 جنيه).

الأسعار في الكافيه أغلى شوية من الأماكن العادية (بس هو يستاهل أنه يبقى أغلى). يعني لو طلبت شيشة ولا قهوة في أي مكان تاني هـ تبقى أرخص، لكن الأكيد أنه مش سهل أنك تلاقي جو قعدة زي دي داخل القاهرة يحسسك أنك في بلد تانية خالص.