أحلى حاجة في كافيهات منطقة الشيخ زايد أنها مش زحمة ورايقة في أغلب الأوقات، ده غير أنها مختلفة، ومن الكافيهات المشهورة هناك قريب من المدخل الثاني للشيخ زايد «كافيه مو - Café Mo».

قبل ما نروح الكافيه ما حجزناش لأن لما كلمناهم في أول رمضان قالوا مافيش مشكلة لو فردين، المجموعة فقط هي اللي لها حجز مسبق، وللأسف لما رحنا هناك كان نفسنا نقعد في المكان المفتوح من الكافيه طلع كله محجوز ومش باقي غير مكانين في آخر الكافيه لحسن حظنا، وقالوا لأ لازم حجز مسبق!

مكان ما قعدنا ما كانش عاطفي أوي لأن الكنب كله قريب من بعض، إلى جانب أنك وأنت قاعد وشك في وش الكنبة اللي أمامك يعني هـ تقعد تتفرج على الناس وهي بـ تأكل خصوصًا أن الكنب قريب من بعضه قوي.

وأنت قاعد هـ تلاقي نجف أسود كثير نازل من السقف وشراشيب نبيتي كثيرة عاملة زي بتاعة الستائر مستخدمة كديكور، وفي جزء من المطعم حاطيين مرآة كبيرة علشان تعطي وسع للمكان والجزء الثاني متقفل زجاج بـ ينزل منه الجرسونات للمطبخ في دور تحت، ده غير أن فيه كذا مكان للقعود: نوعين كنب: واحد على شكل حرف U ومحطوط في منتصف المطعم كل كنبة عكس الثانية عاملة شكل ثعبان، وكنب ثاني ظهره مفرود قعدنا فيه لكن متعب شوية وطلبنا من الجرسون يجيب لنا مخدات من الكنب الثاني، وجزء ثالث للترابيزات وكراسى بار عالية، وجزء رابع قعدة بره في الهواء في الجزء الأمامي من الكافيه، وجزء مفتوح خامس في آخر المطعم وده فيه منطقة لعب للأطفال.

في البداية قلنا نسخن بطننا بشوربة كريمة بالفراخ على الأفطار (14 جنيه) وطلبنا معاها قمر الدين (8.95 جنيه) وبرتقال (19.75 جنيه)، أول ما نزلت المشروبات نزلوا معاها طبق عيش وطبقين صغيرين واحد فيه زيتون أسود مقطع صغير والثاني طماطم مقطعة صغير، العيش كان ناشف شوية وقعد يفرفط مننا وبهدل هدومنا، ولما جه الجرسون ينزل الأطباق الرئيسية شال طبق العيش والسلطات، وما فهمناش ليه!

للأطباق الرئيسية طلبنا T-Bone steak بـ 73.95 جنيه وهو اسمه T-Bone لأن لحم الستيك بـ يحيط بعظمة لحم بتلو على شكل حرف T، الستيك كان فوقه حتة زبدة على شكل فيونكة وطعمه حلو أوي لكن كان فيه دهن كثير، الطبق بـ ينزل معاها بطاطس ويدجز طعمها رائع وعليها بهارات لها طعم حلو، وطلبنا من الجرسون ينزل لنا مع الطلب طبق خضار إضافي (7 جنيه)، كمان طلبنا شرائح كبدة معمولة بالروزماري (55.95 جنيه) ودي بـ ينزل معاها اختيارين من الأطباق الجانبية المعروفة، الأكل كله عامة طعمه رائع ومخدوم حلو جدًا والشيف شاطر ومختلف في أصنافه.

المفاجىء بقى أننا لقينا في الحساب في الآخر أضافوا ثمن لغطاء الترابيزة في الحساب وضاربينه في اثنين (الغطاء بـ 3.95) فليه ندفع ثمن غطاء ترابيزة بـ 7.90 جنيه!

وعلى الرغم من أننا بـ نحب المكان واستمتعنا بالأكل، كان فيه حاجة سيئة غابت عن العاملين في المطعم هي أن منطقة لعب الأطفال مش منفصلة عن منطقة الأكل، وبالتالي كل صراخ وخبط ورزع الأطفال كان داوشنا وخلانا ما نقعدش في المكان شوية نستمتع بعد الأفطار، لكن بشكل عام بطننا مشيت مبسوطة.