معظم الأماكن اللي بـ يتلعب فيها بلاي ستيشن بـ تقدم يا دوب بيبسي أو مياه معدنية وبعض الكافيهات بـ يكون عندها جهاز أو 2 بس بلاي ستيشن لزوم التسلية، لكن «ميز كافيه – Maze cafe» حاجة ثانية؛ فيه غرف مجهزة بالشاشات وأجهزة بلاي ستيشن 3 وكنبات سوداء أنيقة، والمنيو غني جدًا ومتنوع وفيه كوكتيلات وميلك شيك وبعض الحلويات.

ممكن تدخل تقعد في المكان حتى لو مش عاوز تلعب، فيه تليفزيون عادي وإنترنت لاسلكي مفتوح مجانًا. لو رايح للبلاي ستيشن فيه 5 غرف خاصة، وأكبر واحدة فيهم تكفي لحد 8 أفراد. كل غرفة فيها شاشة بلازما HD (50 بوصة) وجهاز بلاي ستيشن 3. وممكن تختار تلعب بالذراع العادي (Joy Stick) والساعة بـ تبقى بـ 25 جنيه، وممكن تلعب بالموﭫ (Playstation Move) وده اختراع خاص بالبلاي ستيشن للتحريك بدل الذراع العادي وكده الساعة بـ تبقى بـ 30 جنيه، ولو هـ تلعبوا مالتي بلاير أو أكثر من 2 في نفس الوقت هـ تزود 10 جنيه على سعر الساعة.

اختيارات الألعاب في «ميز كافيه» مش جبارة يعني، صحيح إحنا ما طلبناش نلعب كورةPES أو FIFA بس عرفنا أنهم موجودين طبعًا، وفيه مجموعة ألعاب ثانية زي Smackdown vs. Raw و WTA Tour Tennis وCall of Duty: Black Ops و Street Fighter.

ممكن كمان تحجز الغرف وتتفرج فيها على أفلام أو ماتش كورة (25 جنيه الساعة) والكافيه هـ يبقى مكان هادئ لأفكار زي دي، بس هـ تفضل المشكلة أن الاختيارات في المنيو محدودة إلى حد ما. مافيش بيتزا مثلاً ولا أي حاجة من الحاجات اللي الواحد يحب يأكلها وهو قاعد بـ يلعب، فـ ننصحك تأكل قبل ما تروح المكان أو خذ أكلك وروح المكان لو ناوي تعمل بارتي صغيرة كده بعد الماتش.

لو كنت شبعان جرب المشروبات، الأوريو فانيليا حلو قوي (22 جنيه) والعصائر الفريش والسبرايت الكومبو (22 جنيه) لكن السموزي (19 جنيه) كان فيه مياه كثير وطعم الفاكهة ما كانش باين.

الحلويات كمان كده وكده، فيه حاجات حلوة وحاجات لأ، وطبعًا زي أي كافيه مش كل حاجة مكتوبة في المنيو هـ تلاقيها، يعني 3 أصناف من الـ 12 صنف المكتوبين مثلًا، ومع ذلك التشيز كيك كان لذيذ، وكيك الشوكولاتة ما كانش حلو زي ماكان شكله بـ يقول، والحشو المقرمش ما كانش فيه شوكولاتة كفاية.

تجربة جميلة فيما يخص الألعاب والبلاي ستيشن، وبعيد عن موضوع الأكل ممكن نروح كل يوم علشان نستمتع بس بالكنب المريح والشاشات العملاقة.