لسبب ما انتشرت بشكل ملحوظ مؤخرًا الأماكن اللي بـ تقدم الكريب والوافلز والآيس كريم في كل حتة في القاهرة. «شاتشو - Chatcho» كان واحد من الأماكن دي وفتح في شارع 9 في المعادي على الناصية اللي عليها بنك باركليز. 

«شاتشو» بالفعل كان تجربة جديدة ورخيصة بالمقارنة بالمنافسين له. المكان من الداخل واخد الشكل القديم أو السبعينياتي للمطاعم الأمريكية للأكلات السريعة، وفيه ترابيزات وكاونتر من الجرانيت وكراسي جلد مريحة باللون الأحمر. الشاشات غالبًا بـ تعرض مباريات كرة قدم والشيفات بـ يحضروا الأكلات وراء الكاونتر اللي جنب منطقة الجلوس؛ وعن رائحة الوافلز الجميلة وأنت قاعد حدث ولا حرج.

المنيو متنوع بين الوافلز والكريب الحلو والحادق، والإضافات بـ تبقى تقريبًا واحدة للاثنين. ممكن تضيف النوتيلا والكاندي والفواكة لو عاوزها مسكرة، وممكن تضيف للحادق الدجاج والبيف والتونة والخضروات. وممكن تستمتع بمشروبات ساخنة وباردة زي الكابوتشينو (14 جنيه)، والشوكولاتة الساخنة (15 جنيه) والسموزي (20 جنيه) ومشروبات المكان الخاصة زي "سيناكوول" و"شاتشوكوول" و"شاتشو سبرنج" بأسعار من 17 لـ 23 جنيه.

الكريب بالموز والمتغطي بالنوتيلا أو الـ Black & White كريب له مكانة خاصة وسط كل الأنواع الثانية (21 جنيه)، مش مجرد أكلة لذيذة للأفطار أو بين الوجبات؛ إنما الكريب نفسه كان طازج ولذيذ. وزي أي مكان بـ يقدم كريب بـ تأخذ الطلب بتاعك خلال 5 دقائق.

لو بـ تدور على حاجة مفتكسة وتشبع ممكن تجرب وافلز التشيكن جريل (23 جنيه) بالموتزاريلا والطماطم وصوص البصل. كل المكونات كان طعمها رائع، وبـ ييجي معاه كمية وفيرة من الزيتون المقطع، والوافلز ده كان من أحسن الأكلات اللي حصل فيها خلط بين الملح والسكر.

بالنسبة للمشروبات المميزة للمكان أسعارها كانت معقولة، لكن كانت مسكرة بزيادة. ممكن تجرب "سينا كول" (20 جنيه) لكن أطلب أنه يقلل لك الشربات شوية علشان ما تبقاش معسلة قوي. طعمه لذيذ لكن بـ يسيب طعم المكونات الصناعية في الفم بعد ما تخلصه. وكالعادة السكر الكثير وأضراره هو أكثر حاجة مزعجة في أي أكلة أو مشروب إحنا بـ نحبه.

لهواة التغيير؛ «شاتشو» تجربة جديدة فيما يخص الوافلز والكريب موجود في المعادي، لو كنت قريب من هناك المكان يستحق الزيارة، لو معاك حد كمان ممكن واحدة كريب حلو مع الشاي المثلج (14 جنيه) والإسبريسو (9 جنيه) يشبعكم أنتم الاثنين.