آخر مرة زرنا فيها «جوتيه - Gouthé» علشان نتعشى فى المطعم ما قدرناش ما نلاحظش الرفوف اللى مليانة كوكيز، ومخبوزات وفطائر محلاة، ولأننا فى كايرو 360 بـ نحب السكريات قررنا نزور المكان المرة دي علشان نجرب الحلويات.

للأسف المرة دي تشكيلة المخبوزات والكيك كانت مش كبيرة قوي، اتضايقنا شوية بس ده ما منعناش أننا نطلب تشكيلة من المتاح وقتها، كان فيه فطيرة شكلها حلو قوي اسمها Feuttine pie فكرنا نطلبها ولقينا كمان Praline walnut pie وتشيز كيك، لكن انطلاقًا من مبدأ "أفضل شيء ما قل ودل" اكتفينا وطلبنا قطعة جاتوه صغيرة، فى حالة لو عاوز تشتري تورتة الأسعار هناك بـ تتراوح بين 135 لحد 150 جنيه وتكفى لحد 8 أشخاص، وأحلى حاجة عندهم أن كل قطع الجاتوه متوفر منها مينى جاتوه بنفس الشكل، وسعر الكيلو منه بـ 110 جنيه.

من ناحية الشكل كل التورتات حلوة وجذابة، مثلاً تارت الليمون (9 جنيه للقطعة) التورتة الكاملة منه هـ تلاقى فيها كرات من الليمون محطوطين على كمية من البودينج، لكن للأسف الرؤية مش زي التذوق، الشكل حلو لكن لما ذقناها كان الوضع مختلف، كرات الليمون دي أى نعم كان شكلها زيه لكن كمان طعمها كان ليمون جدًا، وقعنا على روحنا من الضحك، هى إزاى كده؟ التارت كان حمضى ولاذع والبودينج ما كانش مسكر قوي علشان يعوض طعم الليمون.

تورتة الفراولة بالأناناس (13 جنيه القطعة) برضه كان شكلها حلو قوي لكن طعمها فيه مشكلة، توقعنا لأنها بالفواكة تكون خفيفة لكن برضه الموس اللى فيه كان طعمه لذيذ.

جربنا كمان إكلير الشوكولاتة (9 جنيه للقطعة)، جاء لنا محشي موس شوكولاتة أى نعم كان طعمه بايت شوية لكن الحشو الغنى عوضنا عن ده. آخر قطعة ذقناها وخيبت أملنا كانت قطعة بالشوكولاتة البيضاء والتوت (13 جنيه القطعة)، نسبة الشوكولاتة البيضاء كانت مش متوازنة مع التوت كانت محتاجة توت أكثر وشوكولاتة أقل.

على الرغم من أن الحلويات فى "جوتيه" شكلها جميل لكن النكهات كانت مخيبة للأمل وكان اقتراح أننا نجرب الحوادق هناك أكيد كان هـ تكون أفضل.