أمام الأكاديمية البحرية للعلوم والتكنولوجيا في منطقة شيراتون هـ تلاقي كافيه «جاز – Jaz» بالقعدة الخارجية بتاعته، واللي بـ تضيف لمسة جمالية للمكان، كثير من طلاب الأكاديمية بـ يترددوا عليه علشان يروحوا عن نفسهم وقت الاستراحة، وبما أن كل اللي شغالين في المكان شباب فبـ يوفر بالضبط الإحساس اللي الطلاب ممكن يكونوا عاوزينه في مكان زي ده.

كان يوم ترابي دافئ، فـ قررنا نقعد بالداخل، فيه جرسون ودود فتح لنا الباب واختارنا مكاننا بنفسنا، الديكور بتاع المكان تحفة، واختيار الإضاءة الزرقاء مخلياه مبهج ومريح، وفي نفس الوقت بـ يوفر إضاءة جيدة للمكان. الترابيزات موزعة توزيع كويس بـ يوفر لكل واحدة فيها الخصوصية.

قررنا نقيم قدرات الشيشة عند "جاز"، فـ طلبنا شيشة تفاح (20 جنيه). وبغض النظر عن كام غلطة مطبعية، المنيو كانت واضحة، قسم البيتزا فيه مارجريتا عادية (32.99 جنيه) وفراخ بالباربيكيو (37.99 جنيه) كل ساندويتشات البرجر والكلوب ساندويتش بـ تيجي ومعاها طبق بطاطس جانبي، طلبنا تشيز برجر (27.99) وشوكولاتة ساخنة (12 جنيه).

أول ما خلصنا طلب كانت الشيشة وصلت، وممكن نقول أن دي أحسن شيشة جربناها في منطقة هليوبوليس كلها. التفاح طعمه كان قوي وواضح وفضلت الشيشة طعمها زي ما هو طول قعدتنا. الشوكولاتة كان طعمها لذيذ، وكانت فيها قليل من الكراميل أعطاها مذاق مميز. البرجر تخطى توقعاتنا، اللحمة كانت غنية ومستوية بامتياز.

أما بالنسبة للحاجات القليلة اللي ضايقتنا، فكان أولها التكييف السيء في المكان، ودي طبعًا ما كانتش حاجة كويسة خاصة في يوم حر زي ده، وكان فيه صوت خلاط عالي موجود طول الوقت، حاولوا يغطوا عليه بأغاني الثمانينات اللي كانت شغالة من السماعات بصوت عالي على طول.

تجربتنا في المجمل كانت تجربة ممتعة، وفريق عمل كافيه جاز عامل جذب للشباب اللي بـ يدوروا على مكان يقدروا يترددوا عليه بشكل ثابت، الأسعار مناسبة جدًا، والشيشة والشوكولاتة الساخنة أكثر من ممتازين، إلا أن المزيج الغريب من الأصوات اللي قادم من المطبخ والسماعات ودرجة الحرارة الداخلية كلهم نقصوا من عامل الراحة. وبغض النظر عن المشاكل دي، قليل قوي لما تلاقي كافيه كويس تقدر تروح له في أي وقت مع أصحابك من غير ما تفكر هـ تلبس إيه أو هـ تروح مع مين. "جاز" بالضبط المكان ده.