رغم كلام ناس كثير عن أنهم عاوزين يسيبوا البلد، يطفشوا ويروحوا لبلد متحضرة تعتبر فيها السرقة جريمة يعاقب عليها القانون، والبنات يقدروا يلبسوا شورتات براحتهم لما الحرارة تشد وتوصل لـ 35 درجة، بس رغم كده القاهرة لسه بـ تستقبل ناس عاوزين يستثمروا فلوسهم فيها، والحمد لله فى الزمالك يعتبر «بابليشيوس - Bubblicious» هو أحدث مكان شد انتباهنا.
مكانه فى شارع صغير متفرع من شارع محمد إسماعيل قريب من مطعم "فايف بيلز Five Bells"، وأحسن وصف لبابليشيوس هو أنه قديم وجذاب. مدخله أنيق لونه أبيض أمامه عمود نور عتيق ويعتبر مميز عن باقى الحاجات الرديئة المحيطة به. مدخل المكان صغير، وبرضه لونه أبيض، وفيه كام ترابيزة مدورة مع مكان للقعدة. كاونتر كبير للطلبات مواجه للمدخل هـ تشوف فيه ألوان كثير فى البرطمانات اللى مليانة نكهات من شاى بالفقاعات bubble tea.
وبما أنه بـ يفخر أنه أول محل بـ يقدم شاي بالفقاعات في مصر كان لازم نجربه. الخطوات بسيطة: الأول تختار عاوز تشربه سخن ولا ساقع؛ وبعدين هـ تشرب شاى أسود أو أخضر، بعدها اختار النكهة اللى هـ تضيفها من التوت البرى أو التفاح الأخضر أو الليتشى lychee وأخيرًا اختار الكرات اللى بـ تُمضغ واللى تم تسمية الشاى بسببها "شاى الفقاعات". الشاى الأخضر البارد مع نكهة الخوخ وحبات التبيوكة اللى بـ تُمضغ سعره 19 جنيه وكان خليط ممتع. المشروب كان سكره مش ثقيل، وكان خفيف ومنعش؛ مشروب مثالى علشان يفوقك فى يوم حر.
منيو الإفطار هو أحلى حاجة فى الموضوع. بيض مخفوق، وأومليت وبيض بينديكت eggs Bendict أسعارهم تبدأ من 10 جنيه لـ 24 جنيه، والوافلز موجودة بطعم حلو أو حادق؛ وافل السلامون المدخن بصوص الليمون هو أغلى حاجة فى المنيو سعره 33 جنيه. طريقة ثانية تبدأ بها يومك هى الفرينش توست وألبان كيكس، ولو بـ تدور على أكلة خفيفة فى نصف اليوم المنيو فيها كمان بيتزا وساندويتشات.
كاخون أومليت Cajun omelette (22 جنيه) بـ ييجى معاه سوسيس حراق، ومشروم، وفلفل أخضر مولع مع البصل وبـ يتقدم مع قرص محمص. كل مكونات الأومليت كانت طازجة، وكان مطبوخ كويس وطعمه تحفه. إضافة الجبنة سعرها 4 جنيه زى الجبنة البيضاء والجبنة الشيدر وتعتبر إضافة هائلة للوجبة.
رائحة القرفة خلتنا نجرب التوست الفرنسي الكلاسيكى (12 جنيه). واللى بـ يتعمل من توست سميك مقطع ومغموس فى شوية كثير من مخفوق البيض؛ القطعة مش كبيرة قوى، بس طعمها الصحى والشهى عوض ده، مع الكمية المناسبة من الطعم المسكر.
أكيد الأومليت والتوست كانوا ممتعين قوى، بس أكثر حاجة عجبتنا هى البان كيك بالتوت البرى (15 جنيه). البان كيك كانت محشية بتوت برى طازج، ورغم أنها كانت رقيقة لكن كانت متماسكة، وغنية بالطعم المسكر والحادق فى نفس الوقت.
الخدمة هناك ظريفة ومع المطبخ المفتوح على المكان تقدر تشوف الشيف وهو بـ يحضر طلبك. الأسعار تعتبر معقولة، ومع الأكل المتميز اللى بـ يُقدم فى جو مريح، إحنا بـ نتوقع أن بابليشيوس هـ يبقى حاجة كبيرة فى المستقبل.