«ماتيجوز هوكا لاونج – Matigoos Hookah Lounge» خلانا مدمنين لنكهاته المميزة من الشيشة والمنيو اللى مليانة أكلات حلوة زى البيتزا والفراخ المشوية. بس فيه حاجة غريبة فى أحدث لاونج فتح فى شارع 9 مش قادرين نعرف إيه هى.
ممكن يبقى علشان المكان زحمة فى الخارج؟ أو أنك تستنى مكان يفضى وسط الخدمة اللى ناقصها حسن الضيافة؟ أو علشان لو كنتم فردين بس بـ تقعدوا على ترابيزات مملة بعيد عن الكنب المريح حتى لو المكان فاضى؟
سحر "هوكا لاونج" مالوش مثيل، ماتيجوز هو مكان مودرن مجهز بممرين فيهم قعدات من الخوص وترابيزات قهوة، ومغطاة بتندات حرير، ومدخل على شكل قوس والحوائط منورة مكتوب عليها أمثال عربى منقوشة بلون بنى مصفر باهت.
الشيشة هناك مدهونة بلون روز وبنفسجى بـ يخلى شكلها عامل زى لعب الأطفال، وبـ يضيف شكل لطيف على المكان مع الكراسى البنى. نكهات الشيشة التقليدية سعرها 17 جنيه والميكسات سعرها الضعف. إحنا اختارنا نوعين من الميكسات وبـ ننصح بهم هما: النعناع مع البطيخ، ولبان مع الموز. تقدر تختار أن النعناع يبقى أكثر من البطيخ، أو اللبان يبقى زيادة عن الموز، حسب أنت بـ تحب إيه. طعم الشيشة فضل موجود طول القعدة ولو عامل الشيشة ركز معاك، هـ يفضل يحط لك فحم لحد دماغك ما تدور.
منيو ماتيجوز بـ تقدم اختيارات متنوعة من الأكلات المعروفة زى البيتزا، والباستا، ومختارات للإفطار والمشويات. جربنا بيتزا ماتيجوز ديلوكس (31 جنيه) وعليها لحم مدخن، وبيبرونى، وسوسيس، وبصل، وفلفل، ومشروم وزيتون أسود. البيتزا الرفيعة كانت قوامها متماسك ولذيذة بس صوص المارينارا كان قليل.
أحلى حاجة بقى فعلاً كانت دجاج المسحب (49 جنيه) وهى عبارة عن صدور فراخ مخلية وبـ تُقدم مع صنفين من بين: الأرز، والبطاطس المهروسة أو الشيبسى. الفراخ بـ تُقدم من غير نزع الجلد ومشوية بحيث تبقى مقرمشة، وغامقة، وفعلاً الفراخ كانت طرية ومتبلة كويس.
"تومى" و"تونكا" اسمين تحس أنهم أقرب للعب أطفال يابانى مش ميلك شيك. تومى سعره 20 جنيه عبارة عن مخفوق آيس كريم فانيليا مع الموز وزبدة الفول السودانى وده كان من أحلى الميلك شيك اللى جربناها؛ التونكا بقى سعرها 20 جنيه ودى بـ تفكرنا بمشروب لاسى الهندى وده عبارة عن عصير مانجو، وعسل وزبادى خلاط، الاثنين طعمهم تحفة.
من ساعة ما فتحوا فى رمضان اللى فات، "ماتيجوز" بقى فى وقت قصير مكان خروج محبوب للشباب النشطاء ومستخدمى تويتر والناس اللى بـ تحب تبقى متابعة أجدد الأماكن والموضة. بس أول ما شهر العسل ده يخلص، ماتيجوز هـ يحتاج أفكار جديدة ويخلق خطط مبتكرة علشان يختلف عن باقى الموجودين.
ماتيجوز فاتح أمام محطة مترو ثكنات المعادى، وفعلاً المكان مريح قوى، بس مافيش حاجة تمنعنا أننا نروح لأى مكان جنبه بـ يقدم نفس الكلام.