أفضل 10 كافيهات في القاهرة عام 2012 - كافيهات Feature - كايرو 360
 







أفضل 10 كافيهات في القاهرة عام 2012
أفضل 10 كافيهات في القاهرة عام 2012
اصدرت في: 27/12/2012

التميز لا يأتى من فراغ.. أى اسم ناجح لازم يكون وراءه فريق عمل ناجح.. واهتمام بالتفاصيل.. وجودة فى المنتج المقدم.. وعوامل كثيرة من شأنها أنها ترفع مكان للسماء وبغيابها بـ يتقصف عمره، ولأننا فى حالة اختبار دائم ومتابعة لكل شيء جديد بـ يحصل فى القاهرة وقرون الاستشعار عندنا بـ تلقط المتميز.. وبالتالى وعن تجربة دي ترشيحاتنا لأفضل 10 كافيهات فى كايرو عام 2012 (بدون ترتيب أو أفضلية).

 

تي بي إس – TBS

بفروعه الأربعة فى الزمالك والمهندسين والكوربة والمعادي.. تي بي إس يعتبر من أفضل الأماكن اللي ممكن تروح تشتري منها إفطار صحي وطازج الصبح بدري وأنت مغمض، عمره ما خيب ظننا.. مشهور بتشكيلته الكبيرة من العيش والمخبوزات خاصة الـ "ريكس ميلانو" وكمان هو أول واحد فى رأينا ابتكر فكرة "اعمل ساندويتشك بنفسك"، عندهم بار كبير فيه مكونات مختلفة، ده غير الدونتس والكوكيز والكب كيكس الرائعة.

وزيه محل المخبزات الشهير برضه فى الزمالك "بريد باسكيت" اللى فيه اختيارات مشابهة مع أصناف واختيارات ثانية من وجبات الإفطار والسلاطات، فى فرع المهندسين مدخله مشترك مع مطعم "جوليوز" وموجود فى الدور العلوي، إحنا بـ نحب جدًا البلاكونة اللى بره فى الهواء اللى خارج المحل.. وهمية. كل مكان من الاثنين له شخصيته المستقلة ولكنهم الأشهر والأفضل فى عالم المخبوزات دلوقت.

 

نولا كب كيكس – Nola CupCakes

ملك الكب كيكس ومتربع على القمة.. بصراحة قبل ما نعرفه ما كانش لنا فى النوع ده من الحلوى لحد ما عيوننا وقعت على الأشكال والأصناف المختلفة فى عزومة رحناها، ومن ساعتها مافيش عزومة نعملها إلا وهو منورنا على ترابيزة الضيوف، نولا معروفين بأصناف معينة مشهورين بها لكن فى كل مناسبة بـ يعملوا كب كيكس جديدة زي اللى بالكنافة والمانجا اللى عملوها فى رمضان، والخاصة بالكريسماس كمان دلوقت هـ تلاقيها على صفحتهم على الفيسبوك.

 

بينك بيري – Pink Perry

سبع سنوات من الهيمنة على العالم بنكهاته المميزة، "بينك بيرى" محل لآيس كريم الزبادي أو الزبادي المجمد، القائمة تطول فى المجال ده لكنه من اكتشافاتنا المميزة فى 2012، اختيارات النكهات كثيرة والإضافات أكثر، والخبر الحلو أنه بـ ينفع في الدايت، اطلب الحجم الصغير من الزبادي العادي مع الفاكهة، مافيهاش أي دهون زيادة وده بـ يخليها أكلة خفيفة صحية.

اللى على نفس الشاكلة برضه "شيري أون توب" اللى بـ يقدم كمان كب كيكس إلى جانب الزبادي المثلج، وبراحتك ممكن تحط من 4 لـ 6 إضافات على كل كوب، بس الجديد هنا أنهم بـ يعملوا افتكاسات في الأصناف اللي بـ يقدموها. وشعارهم "زبادي مثلج ع الماشي" أو "Frozen Yoghurt your way".

 

كولد ستون كريمري – Cold Stone Creamery

وعلى سيرة الزبادي المثلج لازم كمان نتكلم عن الآيس كريم –حبنا الأول والأكبر- اللى مافيش مكان فيكي يا جمهورية مصر العربية إلا وجربنا محلاته كلها تقريبًا، لكن يفضل المكان ده مميز فى قلوبنا.. "كولد ستون كريمري" مش بس مكان هـ تروح تذوق فيه آيس كريم معمول على حجر بارد وممزوج بالإضافات اللى تختارها أمام عينيك ده غير مشروبات الميلك شيك وتورتات الآيس كريم، لكن كمان هـ تستمتع بالأغاني والعروض اللى بـ يقدمها فريق العمل هناك اللى هـ تحسسك أنك طفل ثاني وهـ تدخل البهجة على قلبك.. كلمة السر هناك "X-Factor" :)

 

وافل هاوس – Waffle House

ملك الوافل حتى الآن بدون منازع في رأينا، كل ما نروح مكان ونذوق الوافل بتاعه بـ نلاقى نفسنا بـ نقول "حلو بس مش زي وافل هاوس"! العجينة –وهي الأساس- مضبوطة.. الاختيارات من صوص وآيس كريم وفاكهة أو مكسرات وقطع شوكولاتة مافيش كلام عليها، أحلى شعور هناك هو "اللغوصة".. ممتع لأنك كمان مش هـ تركز فيه على قد ما الطعم هـ يكون واخدك، نفسنا يفتح فروع ثانية غير أرض الجولف قريبة مننا.

 

بابليشيوس – Bubblicious

نيجي بقى للاختراع الكبير.. الشاي بالفقاعات.. أه ده بجد مش بـ نهزر.. بابليشيوس لهم الفضل والسبق أنهم يدخلوا اختراع الشاي بالفقاعات مصر. موجود فى الزمالك، لما بـ تروح هناك بـ تختار عاوز تشربه سخن ولا ساقع؛ وبعدين هـ تشربه أسود ولا أخضر، وبعدها اختار النكهة اللى هـ تضيفها من التوت البرى أو التفاح الأخضر أو الليتشى lychee وأخيرًا بـ تختار الكرات اللى بـ تُمضغ واللى تم تسمية الشاى بسببها "شاى الفقاعات"، فيه كمان منيو للإفطار وبيتزا وساندويتشات ووافل فيها اختيارات لطيفة هـ تشدك إلى جانب أن الجو هناك مريح، بـ نتوقع أنه هـ يبقى حاجة كبيرة فى المستقبل.

 

كوفي بين & تى ليف – Coffee Bean & Tea Leaf

فى منطقة الزمالك كمان كافيه كلنا عارفينه مش بس لأنه الأقدم أو من أوائل الكافيهات اللى أخذت شهرتها نطاق واسع، لكن لأنه كمان أصبح وجهة سكان وأهل الزمالك للخروج والسهر خاصة يوم الخميس بالليل، من كثر الزحام فى اليوم ده الدنيا بـ تقف ومجرد المرور من جانبه -خاصة عند الممرات اللى جنب فندق وتمثال أم كلثوم- يعد أزمة. مشهور من زمان بمشروباته خاص التشاي لاتيه والآيس بليندد، القائمة لا تنتهى من اختيارات الأطباق والحلويات والمشروبات الساخنة والباردة، والشعار هنا "Order yourself" من عند الكاونتر، مافيش جرسونات بـ تخدمك إلا لو طلبت.

 

بوتري كافيه – Pottery Café

أول ما عرفناه كان فى فرع الزمالك الملاصق لسيلانترو أبو الفدا، لكن لما رحنا الفرع بتاع المعادي اتبسطنا أكثر، المكان دائمًا زحمة فى الفروع الخمسة كلها، وده لأنه متميز فى نوعية الأطباق والمشروبات اللى بـ يقدمها، مافيش حاجة جربناها إلا وعجبتنا سواء فى التقديم أو الطعم، ساعتها اعتبرنا أن قائمة المفضلات عندنا زاد عليها مكان مميز.. ونتمنى أنه دائمًا يحتفظ بالتميز ده.

 

كافيه سوبريم – Café Supreme

موجود فى مول العرب أمام النافورة الراقصة اللى بـ تعد ساحة للتنافس بين المطاعم المطلة عليها، المكان من بره هـ يشدك لأنه عامل زي الصوبة الزجاج، الديكور من الداخل تحفة، الخدمة رائعة وفريق العمل بشوش وخدوم، والمنيو شيك والأصناف فيها مختلفة، ده غير تميز شكل الأطباق والكوبايات الحلو جدًا والمختلف، المكان كافيه ومطعم فى نفس الوقت وبـ يقدموا شيشة كمان، الأطباق اللى جربناها فى زيارتنا كانت رائعة لدرجة أننا شكرنا مدير المكان، نتمنى يفضلوا على نفس المستوى وأفضل كمان.. جرب هناك مكرونة البنا بالفراخ والخرشوف.

 

إل كافيه دي روما – Il Caffé di Roma

نختم آخر ترشيحاتنا لأفضل كافيهات 2012 بمنطقة التجمع الخامس و"إل كافيه دي روما"، لو عاوز تحس أنك زرت روما فلازم تروح هناك علشان تتذوق القهوة اللى بـ يتخصص فيها الإيطاليين.. بدون شك ده من أحسن الأماكن اللى بـ تعمل قهوة على حق فى كايرو.

الكافيه فيه تراس حلو جدًا والقعدة مريحة، طعم السبريسو "زي الكتاب ما بـ يقول"، والعصائر كمان عندهم رائعة، المكان بجد يستحق الرحلة الطويلة للتجمع الخامس.

 

لمزيد من المقالات النقدية عن الكافيهات زوروا اللينك ده. وكل عام وأنتم طيبين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
27/12/2012
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!