في الجو الحر ده الناس بـ تفضل تهرب منه وتسافر على إسكندرية أو الساحل، أما المواطنين اللي لسه ما عرفوش يستخبوا من الحر هناك، مافيش أجمل من أنك تطلب آيس كريم ينعشك ويهدئ أعصابك في الجو ده، وده اللي حصل لنا لما رحنا "كولد ستون كريمري – Cold Stone Creamery" اللي لسه فاتح فرع جديد في شارع 9 في المعادي.

طبعًا الآيس كريم هناك مختلف عن أي محل ثاني، مش بس علشان النكهات المختلفة والجديدة، لأ كولد ستون كريمرى مشهور بأحجامه من الصغير خالص للكبير جدًا، ووصفاته الخاصة اللي تقدروا تشوفوها من صفحتهم على الفيسبوك.

إحنا حبينا نجرب أكثر من نوع فـ طلبنا حجم كبير في بسكويتة واللي كان فيه منها بالشوكولاتة من الجنب بس إحنا اختارنا السادة، أما بالنسبة للنكهات، طلبنا آيس كريم أوريو كريم البولة بـ 17 جنيه، وآيس كريم نوتيلا وشوكولاتة غامقة بنفس السعر، وآيس كريم نعناع بـ 13 جنيه، والنكهة اللي عجبتنا جدًا آيس كريم بطعم غزل البنات بنفس السعر، وآيس كريم كراميل برضه بـ 13 جنيه. كمان حبينا نجرب الوافل اللي عندهم جبنا وافل our strawberry Blonde وأضافنا عليه صوص توت مع إضافة مارشميلو وتوت وفراولة، والإضافة الواحدة بـ 7 جنيه مع بولة آيس كريم اختارنا طعمها يكون French vanilla، كمان قولنا نجرب حاجة من منيو الميلك شيك، فـ طلبنا Cherry cheesecake وما كانش فيه شيري فـ بدلناه بـ Blackberry وسعره 30 جنيه.

نبدأ بالآيس كريم أكثر طعم عجبنا ورجعنا لأيام الطفولة ومزجنا فعلًا كان آيس كريم غزل البنات Cotton Candy، لو كنا نقدر نأكله هو بس إلى ما لا نهاية كنا عملنا كده، برضه طعم النعناع كان حلو قوي والنوتيلا والشوكولاتة الغامقة والكراميل، آيس كريم الأوريو كان حلو قوي بس أكثر طعم عجبنا دوقناه هناك بس ما أكلناهوش هو الليمون، لأنه أخف طعم ممكن تذوقه، كمان التشيز كيك كان لذيذ، ولو أن النكهات بشكل عام كانت محتاجة تبقى أكثف من كده شوية، بس هي حلوة جدًا طبعًا.

نيجي بقى للوافل اللي أول ما قُدم لنا كان شكله تحفة، وكمان أضاف لنا عليه كريمة مخفوقة زيادة من عندهم، الوافل مش كان تحفة.. ده كان وهمي، مضبوط ما تحسش بطعم البيض، مع صوص التوت والفراولة والآيس كريم خلطة منعشة ومبهجة، الحاجة الوحيدة اللي ضايقتنا أن المارشميلو كان ناشف لدرجة أنه بـ يقرمش زي المكسرات تخيلوا! وده طبعًا علشان ما كانش فريش، بس فيما عدا ذلك كان حلو جدًا، كمان ميلك شيك البلاك بيري مع التشيز كيك تجربة رائعة تستحق أنك تغامر بها لآخر قطرة في العصير.

بشكل عام تجربتنا في كولد ستون كريمرى كانت ممتعة وأكيد مش هـ تكون زيارتنا الأخيرة.