"دي. كابتشينو – D. Cappuccino" رحناه من سنتين وكتبنا مقال نقدي وكنا طايرين به، مش بس علشان الأصناف اللى بـ يقدمها، لأ كمان لأنه مكان ضد التدخين وواخد طابع إسلامي (فيه مكان مخصص للبنات بس)، وبـ يعرض في شاشاته أفلام كارتون Despicable Me وغيرها، ولأننا كنا قريبين منه قلنا نعدي نشوفه لسه محافظ على مستواه ولا لأ.

أول حاجة لاحظناها أول ما قعدنا أن المنيوهات مش مُعتنيين بها، كانت صفحاتها مقطعة وتقريبًا ما عملوش لها تجديد من أول ما بدأوا، طلبنا في الأول ليمون منت (17.60 جنيه) وشاي بالنعناع (12.10 جنيه)، ومن الساندويتشات طلبنا ساندويتش تونة (19.80 جنيه) بـ ينزل معاه بطاطس محمرة وسلاطة كول سلو.

الليمون بالنعناع كان حلو أوي وسكره مضبوط، النعناع كان Syrup مش نعناع طبيعي فأضاف طعم مختلف للعصير، الشاي بالنعناع برضه كان لطيف، وساندويتش التونة بـ يقدم لك في عيش فينو مقسم لنصفين والتونة عليها مايونيز وزيتون كان طعمها خفيف وحلو أوي، البطاطس المحمرة عادية لكن حلوة، وسلاطة الكول سلو كنا حاسين أنها ثقيلة شوية.

نفس الشيء في ساندويتش تشيكن بانيه (25.30 جنيه)، قطع الفراخ المقلية مقرمشة ورفيعة عليها خس وطماطم ومايونيز كان طعمها خفيف وحلو جدًا، طلبنا بعدها بشوية سموزي كراميل (حجم كبير 27.50 جنيه) وعصير برتقال (14.30 جنيه)، الكراميل في السموزي كان كثير جدًا فـ كان ثقيل ولفتنا نظر الجرسون لها، والبرتقال لأنه مش الموسم بتاعه كان مش طعمه حلو أوي بس مقبول.

دى. كابتشينو مازال له مكانة في قلبنا، محتاجين بس يضبطوا المنيو، الأكل والمشروبات حلوة وأسعارها كمان، لو أنت في مدينة نصر عدي عليه واتفرج على أفلام كارتون وأنت قاعد هناك.