دليل أحداث نهاية الأسبوع: حفل مسار إجباري وشارموفرز والحضرة ومسرحية تراب الماس ومعرض ديارنا - الحياة في كايرو Feature - كايرو 360
 







دليل أحداث نهاية الأسبوع: حفل مسار إجباري وشارموفرز والحضرة ومسرحية تراب الماس ومعرض ديارنا
دليل أحداث نهاية الأسبوع: حفل مسار إجباري وشارموفرز والحضرة ومسرحية تراب الماس ومعرض ديارنا
اصدرت في: 21/04/2016

الأجازة عادةً بيستخدمها معظم الناس علشان يرتاحوا من ضغوط الشغل والحياة، لكن فيه ناس بتحب تستغل كل لحظة في حياتها في أنها تجرب حاجة جديدة، علشان كده بنحاول نوفر لكم كل الأحداث الثقافية والفنية اللي هتساعدكم تستمتعوا بالويك إند.

نبدأ بالنهارده الخميس، وهتستمتعوا على مسرح الجمهورية بعرض مسرحي موسيقي بعنوان "كلنا كاليجولا"، واللي من تقديم فرقة الرقص المسرحي الحديث بدار الأوبرا المصرية، والعرض من تصميم وإخراج محمود مصطفى، وأسعار التذاكر 25 - 35 - 50 جنيه. كمان هتلاقوا في الربع حفل أغاني مصرية معاصرة واللي هيقدمها الفنان جو بمصاحبة فرقته "شوية فن"، وسعر التذكرة 25 جنيه.

ولعشاق المنتجاث التراثية زي لبس البدو ومشغولاتهم اليدوية ما تفوتوش معرض "ديارنا" للحرف اليدوية التراثية في أرض المعارض، والدعوة عامة. أما لو بتحبوا فن النحت يبقى لازم تشوفوا معرض "ترنيمة الشمس" للفنان أحمد عبد التواب، في قاعة 2 بقاعة الزمالك للفن. واللي كنا كتبنا عنه مقال نقدي.

وننتقل ليوم الجمعة، لكل اللي بيحبوا روايات الكاتب أحمد مراد ما تفوتوش العرض المسرحي "تراب الماس" على مسرح جلال الشرقاوي وهيكون فيه حفلتين في اليوم. كمان على مسرح الهناجر بدار الأوبرا المصرية فيه عرض مسرحي بعنوان "الخلطة السحرية للسعادة"، ودي مسرحية تجريبية من فصل واحد، والعرض كتابة وإخراج شادي الدالي.

أما لو عاوزين تجربوا موسيقى مختلفة شوفوا حفل موسيقي بعنوان "ميوزيفرينيا" في حديقة الحرية بالزمالك، واللي هيضم أثنين من أشهر الفرق الموسيقية في مصر وهما "مسار إجباري" و"شارموفرز"، وسعر التذكرة 100 جنيه. أما لو بتحبوا فن التراث الصوفي، شوفوا حفل إنشاد "فرقة الحضرة" في مركز الربع الثقافي بشارع المعز، وسعر التذكرة 35 جنيه.

ونختم بيوم السبت، وعرض مسرحي مختلف اسمه "المقام" من بطولة أعضاء فرقة "وجوه" للعروض المسرحية، والعرض متاخد من النص المسرحي "مدد مدد" للكاتب "أحمد أبو هيبة"، والدخول مجاني. كمان على مسرح معهد الموسيقى العربية عرض بعنوان "فلكلور مصر المحروسة" واللي هتقدمه فرقة "فرسان الشرق"، والتذاكر متاحة بشباك الحجز.

ولمحبي الأفلام القديمة شوفوا في ماجنوليا بالزمالك فيلم "جريمة في الحي الهاديء"، وده فيلم مصري من إنتاج 1967 للمخرج حسام الدين مصطفى، وسعر التذكرة 20 جنيه. كمان على مسرح الجمهورية فيه حفل موسيقي لأوركسترا "أم النور" بمناسبة عيد القيامة المجيد، بقيادة هناء طانيوس، والتذاكر متاحة بشباك الحجز.

لو عاوزين تعرفوا اكثر عن أحداثنا اللي بننشرها كل يوم على مدار الشهر، تابعوا أجندتنا.

ويك إند سعيد!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
21/04/2016
-