5 حاجات بسيطة هتخلي يومك بيضحك - الحياة في كايرو Feature - كايرو 360
 







5 حاجات بسيطة هتخلي يومك بيضحك
5 حاجات بسيطة هتخلي يومك بيضحك
اصدرت في: 15/05/2016

في ناس بتروح شغلها كل يوم الصبح حزينة، مخنوقة، ومش طايقة تتكلم مع حد، ولما تسألهم فيه إيه يردوا: الزحمة والحر الخ الخ.. في المقابل في ناس تانية بتمشي في نفس الشوارع، وبتواجه نفس الزحمة، وماشية في نفس الجو لكن بتروح شغلها مبسوطة.. فرحانة.. سألت نفسك ليه كده؟ وإيه الفرق بين النوعين؟ ببساطة فيه شوية حاجات بسيطة لو عملتها يوميًا نظرتك للحياة هتختلف تمامًا، وأول حاجة لازم تؤمن بيها هي أن نظرتك للحياة هي اللي بتحدد إيه اللي هيجرى لك في يومك، لو بدأت يومك بحاجة بتحبها دي هتكون بداية صح لليوم.

 

العب رياضة الصبح بدري

ناس كتير بتصحى بدري عن ميعاد شغلها ساعتين وتنزل تجري أو تركب عجل أو تروح الجيم، وحاجة زي دي مفيدة جدًا ومبهجة بطريقة غير طبيعية، ولو مش هتقدر تعمل كدة ممكن تعوض ده بأنك تجيب جهاز رياضة بسيط في بيتك تبدأ يومك بالتمرين عليه، المهم أنك تكون همتك عالية وتنام بدري، وطبعًا تفطر كويس بأكل صحي.

 

اركب فلوكة الساعة 7 الصبح

أكيد بتقول إيه الفكرة المجنونة دي، لكن فعلًا الفكرة دي جديرة انها تخلي يومك جميل، خصوصًا أن أغلب الناس هتكون لسه نايمة ومش كلها رايحة شغلها، ويا سلام لو جربت تفطر على النيل برضه، مع منظر النيل وريحة الندى الصبح، مافيش أحلى من كده بداية لليوم.

 

وزع بونبوني على الأطفال وأنت في طريقك للشغل

سهل جدًا أنك تسعد الأطفال خاصة بحاجة بسيطة زي البونبوني، وممكن لو عندك الجرأة توزعها على الكبار كمان برغم أن رد فعلهم مش مضمون، بس جرب هم محتاجين يفرحوا أكثر من الصغيرين.

 

اشتري ورد وحطه على مكتبك

الورد من الحاجات القليلة المبهجة في الحياة، ممكن تشتري قصرية زرع فيها ورد وتسقيها كل يوم، أو مجرد 3 وردات ريحتهم حلوة مش لازم يكون غالي، المهم أنك تكون بتفرح كل يوم الصبح تشوفه قدامك.

 

اعزم حد من زمايلك في الشغل أو الكلية على الفطار أو شوكولاتة

شعور أنك تكون معزوم ده مبهج في حد ذاته، وأنك تفرح حد غيرك دي حاجة بتديك سعادة غير طبيعية، سعادة العطاء، صدقني أنت اللي محتاج تدي مش هم، وسعادتهم بالحاجة دي كفاية أنك تخليك مبسوط طول اليوم.

مزيد من الصور
  • 5 حاجات بسيطة هتخلي يومك بيضحك
  • 5 حاجات بسيطة هتخلي يومك بيضحك
  • 5 حاجات بسيطة هتخلي يومك بيضحك
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
15/05/2016
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.