10 أغاني هيعملوا جو ممتاز في فرحك - الحياة في كايرو Feature - كايرو 360
 







10 أغاني هيعملوا جو ممتاز في فرحك
10 أغاني هيعملوا جو ممتاز في فرحك
اصدرت في: 09/05/2016

بعيدًا عن الأغاني الشعبي والمهرجانات اللي بنسمعها في كل مكان وخاصة في الأفراح وحفلات الزفاف، اختارنا لكم 10 أغاني ما بين أغاني إيقاعية وأغاني Slow بتعمل جو ممتاز في حفلات الزفاف.

 

صدقني خلاص

أول تعامل لعمرو مصطفى مع عمرو دياب، وكانت السبب أن الناس تعرف عمرو مصطفى كملحن، وبعدها تعاون في أغاني كتير مع عمرو دياب نجحت نجاح ساحق، صدقني خلاص مثال ممتاز على الأغنية الـ Slow المتكاملة من كل أركانها.

 

أنا كلي ملكك

سبب شهرة شيرين ونجاح أغانيها إلى جانب شطارتها في الغُنا كتكنيك، إلا أن إحساسها العالي بالكلمات واللحن فرق معاها كتير، وخلاها مختلفة عن كل الأصوات النسائية، ولما سألوا الموسيقار الراحل عمار الشريعي من هي المطربة اللي نقدر نقول عليها صوت مصر قال شيرين. في أغنية أنا كلي ملكك (من مقام العجم أو الماجور في المزيكا الغربي) اللي حققت نجاح كبير – أكتر من 25 مليون مشاهدة على اليوتيوب- فتحت لنفسها سكة جديدة مع الأغاني الرومانسية. كلمات أمير طعيمة مكتوبة مخصوص لشيرين، ولحن خالد عز أكتر من ممتاز زي ما اتعودنا منه.

 

أحلى حاجة فيكي

الأغاني الإيقاعية كلها تقريبًا مرشحة بقوة أنها تبقى موجودة في حفلات الزفاف. وأغنية أحلى حاجة فيكي لمحمد حماقي من أجمل الأغاني الإيقاعية اللي ظهرت في الكام سنة اللي فاتوا، ومن وقت صدورها في 2006 وهي مكسرة الدنيا وده بفضل الموزع تميم، اللي عمل شغل ممتاز، والجميل في الموضوع أن ممكن الضيوف يقوموا بدور الكورال ويقولوا (يالا إن شاالله أموت في هواكي إن شالله)

 

عشق البنات

منير أهم مطرب مصري استغل الفلكلور الشعبي بشكل عام والنوبي خصوصًا، وأعاد تقديمه بتوزيعات جديدة، في عشق البنات من أجمل أغانيه، صوت الكورال والإيقاع مفعم بالحركة والرشاقة.

ملحوظة: نابليون ملوش أي علاقة بالأغنية! الكلمات بتقول: (في عشق البنات أنا فقت نابي اليوم) نابي يعني حظي باللغة النوبية، يعني أنا عدّت معايا، وحظي بقى تمام.

 

ع بالي

بصوتها الناعم الأنيق قدرت إليسا تقدم أغاني متنوعة ومختلفة، لكن أنسب الأغاني لطبقات صوتها هي الأغاني الهادية الأقرب للرومانسية. وبذكاء شديد اختارت كلمات فارس اسكندر في أغنية ع بالي مخصوص علشان الجزء اللي بتقول فيه (يوم البسلك الأبيض) الجزء ده اللي رشح الأغنية أنها تكون ملائمة لحفلات الزفاف.

 

بارتاح معاك

رغم تصريحاته وتصرفاته الغريبة، والشبهات الكتير اللي حوالين مصادر ألحانه، إلا أن عمرو مصطفى قدم ألحان كتير ناجحة لمعظم مطربين الوطن العربي، ولما قرر يواجه الجمهور ويغني حقق نجاحات جيدة، أغنية بارتاح معاك كانت من أوائل نجاحاته في الغُنا، ومن أجمل ألحانه كمان.

 

مبروك عليّا

أغنية مبروك عليّا غنيتها بوسي في نهاية فيلم جوازة ميري، في مشهد الفرح الأخير، ورغم أننا متعودين على بوسي في الأغاني الشعبي إلا أن صناع الفيلم اختاروها، وكان اختيار موفق جدًا، بوسي قدرت تعبر عن الفرحة بصوتها الشعبي وخاصة أنها بتغني من الطبقة النحاسية (العالية) كلمات محمد البوغا جديدة وحلوة، قدر يتكلم من وجهة نظر البنت، ويعبر عن مشاعرها، لحن محمد عبد المنعم رشيق وغني، وبحرفنة مزج بين اللون الشعبي والإيقاعي.

 

أصلها بتفرق

نقدر نقول أن عمرو دياب صاحب فكرة الأغاني اللي بتتعمل مخصوص لحفلات الزفاف. وقدر بذكاءه يلعب اللعبة باقتدار، واختياراته غالبًا موفقة وفي محلها. أغنية أصلها بتفرق لحنها عمرو دياب بنفسه، ونزلت في البوم لوحدها بـ 3 توزيعات مختلفة للموزع عادل حقي، لكن أشهر نسخة كانت توزيعها بـمزيكا الـ Latin Pop اللي بيستخدمه عمرو في أغلب أغانيه.

 

ملهوفة عليك

جنات من أفضل الأصوات النسائية على الساحة دلوقتي، ومن بداياتها تمسكت بالأغاني الرومانسية، ونجحت فيه تمامًا، لأنه مناسب لصوتها الرقيق وإحساسها العالي، في أغنية ملهوفة عليك قدمت طرح جديد للحب من وجهة نظر البنت، وعبرت عن مشاعرها بكل وضوح وبساطة في نفس الوقت.

 

سهر الليالي

من بعد فيلم سهر الليالي اكتشفنا فجأة أغنية سهر الليالي للعظيمة فيروز، رغم أنها من التمانينات، لحنها إلياس رحباني ضمن ألحان معدودة قدمها للست فيروز، لحن إيقاعي غربي من الدرجة الأولى، معمول بعقلانية المزيكا الغربي ودقتها، ومع كده لحن مرح وخفيف.

مزيد من الصور
  • 10 أغاني هيعملوا جو ممتاز في فرحك
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى  عبد ربه
حرر بواسطة:
مصطفى عبد ربه
تاريخ النشر:
09/05/2016
برج العذراء.. ما عرفش يطلع مزيكاتي فطلع شاعر.. بـ يحب الكتب، والشاي بالنعناع، والعيون الحلوة، وأغلب الوقت بـ يحب حاجات ما بـ يحبهاش غيره.