10 اقتراحات لتمضية وقت الصيام بفايدة أكتر - الحياة في كايرو Feature - كايرو 360
 







10 اقتراحات لتمضية وقت الصيام بفايدة أكتر
10 اقتراحات لتمضية وقت الصيام بفايدة أكتر
اصدرت في: 06/06/2016

ناس كتير بيكون عندها مشكلة كبيرة مع تمضية الوقت في رمضان، بيسألوا نفسهم أسئلة مرعبة من عينة "إزاي الوقت هيمر من غير نسكافيه أو شاي؟".. "إزاي هقدر استغنى عن السجاير وكل الحاجات اللي بتخليني أقدر استحمل سخافة اليوم وطوله، وكمان هكون صايم!

الحقيقة أن معاهم حق، لكن مع بعض هنحاول نلاقي طريقة تخلينا نعدي باليوم في رمضان، بسلام من غير أزمات أو مشاكل، وخلينا نبص على الجانب الإيجابي في الموضوع، وهو أن رمضان فيه بعض الطقوس والتفاصيل اللي مش موجودة في أي شهر تاني ودي لوحدها كفيلة تخلي الشهر يعدي بسرعة وبدون ما نشعر بيه، سواء للناس اللي بتشتغل أو حتى اللي قاعدين في البيت، وخلونا نعترف كمان أن الشهر كدا كدا ضيف خفيف بيعدي بسرعة وكلنا بنقف نسأل روحنا إزاي مر بسرعة من غير ما نحس!

 

خصص وقت لقراءة القرآن

 

أول حاجة بتخطر على بالنا في شهر رمضان الكريم، هي قراءة القرآن، لكن الأكيد إنه اليوم بيكون مليان أوقات لقراءته وكمان التدبر فيه، لكن فيه جزء إضافي القرآن نفسه أمرنا بيه في أول آية وإحنا مابنعملهوش تقريبًا على اعتبار أنه تضييع وقت، "اقرأ" مع الساعات الأولى ليومك في رمضان، لو راكب مواصلة تقدر تاخد في إيد أي كتاب كنت حابب تقرأه بقى لك فترة ومش لاقي وقت، ولو بتسوق ففي كتب إلكترونية كتير تقدر تحملها وتسمها وأنت ماشي بكل سهولة، هتحس أنك في عالم تاني والوقت هيمر بسرعة وكمان هتتمنى يكون في إشارات علشان تعرف أكتر عن الكتاب اللي بتسمعه أو بتقرأه.

 

اقفل الفيسبوك

 

في الشغل ماتفتحش الفيسبوك، أيوة ماتفتحهوش، مش هيساعدك تعدي الوقت، بالعكس، هيحسسك إن المهمة اللي في إيدك ما بتخلصش، وصعبة وطويلة، وبالتالي هتتخنق وتحس أن الوقت طويل على الفاضي، ركز كويس جدًا وخلص اللي في إيدك، ولو دا وفر لك وقت هتحس ببراح، وتقدر تشتغل مقدمًا حاجات كانت المفروض تتعمل في أيام تانية، التركيز الشديد في الشغل بيخلي الوقت يسحب ماتحسش بيه أبدًا، وبيخليك تنجز، ويمكن لو قدرت تنجز ليومين قدام مثلًا تاخد أجازة ترتاح فيها في البيت.

 

اتصل بقرايبك

 

خصص جزء في يومك للاتصال بقرايبك وأصحابك وليكن 10 دقايق أو تلت ساعة طول الشهر، أصحابك اللي ماتصلتش بيهم بقى لك سنين، زمايلك، مديرينك القدام، قرايبك اللي من بعيد، كل الناس اللي ما كنش عندك فرصة تكلمهم وكنت بتبقى مسحول في مليون حاجة تقدر تتواصل معاهم وده هيخليك تسرح في عالم تاني وبرضو هينسيك إنك صايم، بس حاولوا ماتنموش عشان الصيام مايبوظش.

 

ساعد في البيت

 

لأن مواعيد الشغل في رمضان مختلفة، ناس كتير بتروح بدري، النوم صحيح بيخلي الوقت قبل الفطار يمر بسرعة لكن في حاجة تاني ممكن تخليه يعدي وكمان هتسيبلكم ذكريات حلوة و تخلق لكم جو حلو تفضلوا تفتكروه، رصوا السفرة مع بعض، قسموا المهام وماتسيبوهاش كلها على ماما، أو زوجاتكم، اعرضوا المساعدة، حتى لو كانت مهمة بسيطة هتساعدكم تخلصوا الوقت وكمان تاخدوا ثواب المساعدة.

 

حافظ على الصلاة

طبعًا مش عاوزين نقول أن الصلاة في أوقاتها، بتركيز وهدوء، من غير استعجال ولا كروتة، هتاخد مساحة لا بأس بها من اليوم، غير صلاة التراويح طبعًا، لو حسبناها هنلاقي الموضوع فعلًا بيشغل مساحة مش قليلة من اليوم.

 

اتعرف على جيرانك

 

ممكن تعتبر رمضان فرصة للتعرف على جيرانك اللي عمرك ما عرفت عنهم حاجة قبل كدا، تقدري تعملي صينية كيك صغيرة تهادي بيها جارة كل يومين أو تلاتة في الشهر الكريم ومعاها ورقة "كل سنة وأنتم طيبين" هتعمل علاقات طيبة وتخلي في صلة حقيقية.

 

نام ساعة في النهار

ساعة أو ساعتين نوم خلال ساعات النهار هتساعد إنه اليوم يعدي أسرع، وكمان هيساعد إنكم تقدروا تصحوا بالليل.

 

اقعدوا مع ولادكم

تغيير مواعيد الشغل في رمضان فرصة كبيرة للآباء والأمهات اللي مابيلحقوش يقعدوا مع ولادهم كفاية، حاولوا تعملوا أكل بسيط ماياخدش مجهود، واقضوا وقت أطول مع الولاد، ابنوا بيوت من المكعبات، ارسموا مع بعض، اعملوا عجينة ورق، ولونوا، وأضحكوا من قلبكم الوقت هيمر بسرعة وكمان هيبقى عندكم ذكريات حلوة مابيبقاش ليها وقت في الأيام العادية.

 

خصصي وقت لنفسك

 

الأمهات عندهم فرصة ذهبية في الشهر ده بالذات، فترة الصبح مافيش استعجال عن تحضير الغداء ولا زحمة سندوتشات الفطار ولا كل التفاصيل الكتير اللي بتضيع أوقاتك في الأيام العادية، حاولي تتنفسي الصعداء، واهدي خالص، وخدي وقت للاستجمام، اقعدي بهدوء اكتبي خططك لبعد رمضان، فكري في اللي فات واللي جاي، وحطي نقط للحاجات اللي عاوزة تحققيها وعاوزة تنجزيها، زوجك في شغله وأنتِ فاضية تمامًا لساعة أو ساعتين خليهم لنفسك ولأفكارك ولاحلامك اللي هتحققيهم عاجلًا أو آجلًا.. اكتبِ مذكراتك في الوقت ده واتكلمي مع نفسك علشان تقدري تواصلي.

 

رمضان يحب اللمة

تقدروا تعيشوا تجربة مختلفة بالفطار الجماعي مرة في الأسبوع على الأقل، برا البيت، سواء بعمل ديش بارتي في حديقة عامة، أو بالفطار برا في أحد المطاعم القريبة من مسجد مشهور، تقدروا تصلوا فيه المغرب والعشا والتراويح من بعدها، دا هيخفف عنكم كتير الضغط وهيخلي الوقت يمر أسرع في التجيهز للخروج قبل الفطار، وكمان هينقذكم من القعدة قدام التليفزيون بعد الفطار واللي بيقع فيها ناس كتير.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
06/06/2016
-