بيقولك: اعرف عداد التاكسي عمل كام - الحياة في كايرو Feature - كايرو 360
 







بيقولك: اعرف عداد التاكسي عمل كام
بيقولك: اعرف عداد التاكسي عمل كام
اصدرت في: 12/06/2016

القاهرة معروفة بزحمتها، وتحس أن اللي عايشين فيها مع الوقت بيكون همهم الوحيد هو البحث عن حيل جديدة لتفادي الزحمة ومحاولة العيش وممارسة أنشطة الحياة بقدر كافي من الهدوء..
علشان كده نفهم أوي سر انتشار ونجاح كل المنتجات اللي لعبت دور أداة من أدوات محاربة الزحام في العاصمة، ومن أهم المنتجات دي: تطبيقات الهواتف الذكية اللي حاولت تساعد في السكة دي، وييجي على رأس التطبيقات دي بامتياز تطبيق "بيقولك".. اللي بقى أشبه بتجميعة كبيرة لشبكة مراسلين واسعة جدًا في كل مكان في القاهرة، بيعملولك نشرة أخبار حية لأحوال الطرق على مدى الـ 24 ساعة..

المهم.. تطبيق "بيقولك" طالل علينا اليومين دول بتحديث جديد، وكالعادة: في الجول!
مشكلة ركوب التاكسي في مصر أننا من كتر مواقف الغش اللي اتعرضنالها أو اللي سمعنا عنها بقينا دايمًا في حالة تشكك من السواقين.. ومتوقعين الغش طول الوقت حتى لو ماكانش حقيقي، والسواقين مصرين يساعدوا في تعزيز السمعة السيئة دي بنفسهم، بأنك تلاقي كتير جدًا منهم مش بيرضوا يشغلوا العداد، واللي بيشغلوه تحس أن عدادهم مش ماشي مظبوط.. فبتفضل دايمًا قلقان، لكن للأسف مافيش قدامك فرصة تحاسبهم بشكل مختلف!

تطبيق "بيقولك" انتبه للمشكلة دي، وفكر ازاي ممكن يعالجها، وكالعادة قدم حل بسيط ومباشر وعبقري في نفس الوقت.. أنه أضافلك "عداد" خاص بيك في التطبيق!
يعني أنت تركب التاكسي، وتفتح عدادك من على موبايلك، وتسيبه يحسب، وفي آخر المشوار تشوف عداد السواق ولو فارق كتير عن عدادك يبقى تعرف أنه بيغش، ولو مارضيش يشغل العداد أصلًا من البداية خلاص، هتركب وأنت مطمن أنك هتحاسبه صح من غير ما تظلمه ولا تديله فرصة يغشك.

الإضافة جت على هيئة "Icon" دائرية صغيرة عليها صورة تاكسي، بتدوس عليها فيتفتحلك "Tab" جديدة فيها اختيارين، على اليمين اختيار "Taxi".. هتدوس عليه هيبدأ العداد يشتغل من لحظتها، بنفس الآلية اللي بيشتغل بيها عداد التاكسي الحقيقي، وفي الآخر هيقولك كل تفاصيل مشوارك صح، وتدفع وأنت راضي ومطمن.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر مسعد
حرر بواسطة:
عمر مسعد
تاريخ النشر:
12/06/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟