أول أسبوع من رمضان: المصريين كلوا 10 آلاف طن فول و 40 مليون فرخة - الحياة في كايرو Feature - كايرو 360
 







أول أسبوع من رمضان: المصريين كلوا 10 آلاف طن فول و 40 مليون فرخة
أول أسبوع من رمضان: المصريين كلوا 10 آلاف طن فول و 40 مليون فرخة
اصدرت في: 15/06/2016

كل سنة وأنتم طيبين تاني وتالت..
المرادي هناخدكم معانا في الموضوع بسرعة شوية علشان نناسب الطابع الرسمي ليه، وعلشان برضه الحقيقة نعبر عن جزء من أسفنا على الجزء التاني من المحتوى، اللي هو هيكون عبارة عن أرقام وإحصاءات وردت في تقرير رسمي عن معدلات استهلاك بعض السلع الغذائية للمصريين في رمضان.. رمضان الشهر الفضيل اللي المفروض جايلنا كفرصة علشان نضبط نفوسنا ونحارب عاداتنا السيئة ونحاول نستبدلها بعادات تانية أكثر صحية وإفادة لأجسامنا وأرواحنا؛ اتحول مع الوقت لشهر بتستوحش فيه رغباتنا وبتخلي ممارستنا للعادات السيئة تزيد ومعاها بتزيد معدلات استهلاكنا للموارد علشان نشبع رغباتنا اللي الشهر جاي يقولنا تخففوا منها شوية!

الكلام ده كان مجرد أفكار عامة بتدور في دماغنا مبنية على اللي بنشوفه في محيطنا وبس، لكن ماكناش عارفين لو قمنا بشوية إحصائيات حقيقية ودقيقة على نطاق أوسع شوية الفكرة دي هتتأكد وللا هتطلع فنكوش.. لحد ما صادفنا تقرير رسمي بيأكد الفكرة بالأرقام، وبيأكد أسفنا اللي شاورنا عليه في البداية.. مش علشان أي حاجة غير علشان واضح أنه لسه الأهداف بتغيب عننا فبنمشي في سكة غير اللي المفروض نمشي فيها.

التقرير الصادر عن مركز المعلومات بمجلس الوزراء طلع بأرقام ماكانتش مخالفة لتوقعاتنا يعني لكن دايمًا الحقيقة بتفاجئ وتدهش لما بنشوفها حتى لو ماخالفتش توقعاتنا.. أرقام التقرير قالت أنه في العادي إحنا كمصريين بنصرف تقريبًا نصف دخلنا السنوي على الأكل (44.9% منه بالضبط).. وأنه معدلات الصرف على الأكل تحديدًا بتزيد جامد في شهر رمضان.. لدرجة أنه تقريبًا سدس (1\6) من إجمالي الفلوس اللي بنصرفها على الأكل بيكون في رمضان.. يعني إحنا بنصرف في شهر رمضان أد اللي بنصرفه في أي شهرين تانيين تقريبًا من بقية شهور السنة.. ونظرًا لأن أسعار السلع الأساسية السنة دي زاد شويتين عن السنة اللي فاتت؛ فخبراء الاقتصاد بيتوقعوا أن معدل الاستهلاك كمان يزيد، وأن الصرف يوصل لرقم 45 مليار جنيه بعد ما كان 30 مليار بس رمضان اللي فات.. ووفق تقارير الاتحاد العام للغرف التجارية بشعبه المختلفة، فإحنا بنستهلك في رمضان 3 أضعاف استهلاكنا من اللحوم في أي شهر تاني.
التقارير تضمنت كمان شوية أرقام تفصيلية عن بعض السلع الاستهلاكية، وقالت إننا في أول أسبوع من رمضان أكلنا 2.7 مليار رغيف، و 10 آلاف طن فول، و 40 مليون فرخة.. ودي أرقام كبيرة نسبيًا مقارنةً بأرقام الاستهلاك العادي.
وفي بدايات رمضان كمان قالت التقارير أنه بسبب الإقبال الشديد من المصريين على استهلاك الياميش وقلة المعروض منه؛ تم استيراد حوالي 7 مليون و 89 ألف طن منه.. وده خلى الأسعار تبقى في السما.
في النهاية نقدر نقول لنفسنا ولكم أنه تعاملنا مع الفرص الجيدة بصورة غلط بيحولها من فرصة جيدة لتجربة سيئة وبيخلي عوايدها سلبية للغاية.. فيارب ده ما يحصلش معانا ونفضل دايمًا نفضل مركزين وواخدين بالنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر مسعد
حرر بواسطة:
عمر مسعد
تاريخ النشر:
15/06/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟