بيبسي بتقول لنا: باللمة نقدر نخلي مجتمعنا أحسن - الحياة في كايرو Feature - كايرو 360
 







بيبسي بتقول لنا: باللمة نقدر نخلي مجتمعنا أحسن
بيبسي بتقول لنا: باللمة نقدر نخلي مجتمعنا أحسن
اصدرت في: 26/06/2016

اتعودنا دايمًا نشوف "بيبسي" فوق مستوى المنافسة في إعلاناتها التجارية أو التسويقية، وفي رمضان السنة دي بيبسي قررت تختار سوق الخير.. وتحاول -زي ما عودتنا- تقدم حاجة من الآخر، وتنادي بصوت عالي: اللي يقدر يحصّلني!

الحملة الإعلانية لـ "بيبسي" في رمضان 2016 اتلخصت فكرتها ورؤيتها وأهدافها في فيديو مدته دقيقة ونص تقريبًا، عنوانه: "رحلة إزازة بيبسي".. واللي تقدروا تتفرجوا عليه من هنا.

 

أما عن الرسالة الأساسية للفيديو فهي شرح سريع للحملة الرئيسية اللي شغال عليها فريق "بيبسي" للتنمية المجتمعية في الفترة دي، بالإضافة للفت النظر للحملتين التانيين اللي شغالين بالتوازي معاها.. الحملة الرئيسية حملة "لتر من نور" هي حملة متعددة الأهداف والفوائد، حاجة كده "كومبو" يعني.. الحملة بتهدف إلى إنارة بعض قرى الصعيد الفقيرة باستخدام طاقة نظيفة وصديقة للبيئة وهي الطاقة الشمسية، والفكرة الأجمد ماكانتش هنا الحقيقة.. كانت في طريقة تنفيذ الحملة، أو في جزء محدد من خط سير عملية التنفيذ، الجزء اللي نقدر نحطله عنوان عريض: "إعادة تدوير هادف".. بعد محاولات كتير من جهات مختلفة لإنشاء حملات إعادة التدوير ماحققتش النجاح المطلوب، لأنها دايمًا كانت بتفتقد الصورة الواضحة للمنتج للنهائي.. حاول فريق بيبسي يتفادي الحفرة دي، فرسم خط واضح لسير الحملة، وهو: تجميع الماتيريالز اللي هي: أزايز بيبسي الفاضية، واستخدامها مرة أخرى، في مناطق محددة وهي: قرى الصعيد الفقيرة، سواء في المنازل أو في الأماكن العامة ومراكز الشباب علشان الشباب يقدروا يمارسوا أنشطتهم فيها.. وبكده تكون العملية واضحة ومانخافش من التوهان في النص اللي يخليها تقف أو ماتحققش هدفها.. وزي ما احنا عارفين، فايدة عمليات إعادة التدوير الناجحة بتنضرب في اتنين: فايدة الإنتاج الغزير من مواد رخيصة، بالإضافة لفايدة تفادي الأضرار البيئية الناتجة عن التخلص من النفايات لو لم تتم إعادة تدويرها.

 

الحملتين التانيين اللي شغالة عليهم بيبسي في نفس الوقت هما حملة "طموح" أو خلينا نسميه "مشروع" يمكن تكون تسمية أدق بكتير من أنه مجرد "حملة".. ده لأنه عمل جاد متصل على مدار تسع سنين فاتوا للحد من خطر التسرب من التعليم بالتعاون مع برنامج الغذاء العالمي التابع للأمم المتحدة.

.. والفكرة البسيطة اللي قايم عليها المشروع أنه غالبًا الأطفال بيتسربوا من التعليم في سن صغير لأن أهاليهم بيكونوا فقراء فبيحتاجوا أولادهم يشتغلوا معاهم علشان يزودوا دخل الأسرة فبيخرجوهم من التعليم للسبب ده.. فكان شغل فريق "بيبسي" على أنهم يساهموا في تغطية بعض تكاليف الأسرة من خلال تزويدهم باحتياجاتهم الأولية من الغذاء في مقابل أن الأسرة تسيب ولادها يكملوا في التعليم.. والحملة التانية هي حملة "بيبسي ستارز" اللي شاورت عليها بيبسي بوضوح في إعلانها في بداية رمضان مع نجم مصر ونادي الأرسنال الإنجليزي "محمد النني".. واللي بتسعى من خلالها إنها تحقق أحلام الشباب الصغير في النجومية وده ببرنامج منظم لاكتشاف المواهب وتنميتها وإخراجها للنور، واستفاد منه على مدار 13 سنة أكتر من مليون طالب!

 

الحقيقة أنه تحمُّل الجهات الكبيرة –سواء الجهات الحكومية أو الجهات الخاصة- مسؤولياتها تجاه المجتمع بالشكل ده بيكون حافز كبير لينا كأفراد أننا كمان نتحمل المسؤولية ونشوف إيه الدور اللي نقدر نساهم بيه أو الحاجة اللي نقدر نساعد فيها علشان نلاقي بدل الإيد مليون إيد بتزق لقدام.. ودي الفكرة اللي نورتها بيبسي بوضوح عن طريق أنها حطت شعار واحد جامع للتلات حملات وهو شعار: "#باللمة_نقدر" وخلته هو الهاشتاج المصاحب لأي كلام عن واحدة من الحملات دي على السوشيال ميديا.. ودي نقطة إيجابية كمان تضاف إلى كل النقط الإيجابية التانية في الحملة والإعلان.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
26/06/2016
-