في العيد: هدي أعصابك بشوية تأمل واسترخي - الحياة في كايرو Feature - كايرو 360
 







في العيد: هدي أعصابك بشوية تأمل واسترخي
في العيد: هدي أعصابك بشوية تأمل واسترخي
اصدرت في: 07/07/2016

زي ما فيه ناس كثير بتستنى أجازة العيد علشان تسافر وتخرج وتسهر براحتها، وتفك قيود روتين الشغل والحياة اليومية في الكام يوم دول، زي ما برضه فيه ناس بيعدوا الدقايق والثواني علشان الأجازة تبدأ فيقفلوا على نفسهم قوقعتهم اللي مش بالساهل يدخلوها في الأيام العادية.

المجموعة الثانية دي أقصى خروجة عندهم بتبقى من باب الأوضة للحمام والعكس –والحقيقة أن أغلبية اللي عايشين معاهم في بيت واحد ممكن ما يبقوش عارفين إزاي الناس دي بتقضي أجازتها. إحنا نفسنا ما نعرفش هما بيقضوها إزاي، علشان كده قررنا نكتب لهم المقال ده؛ واللي فيه هنقدم لهم مجموعة من خطوات التأمل البسيطة اللي ممكن تساعدهم يروقوا بجد ويفصلوا عن العالم الخارجي وينسوا الروتين اللي هاربانين منه.

شخصيًا، في تجربة سابقة التأمل بالنسبة لنا كان وجع قلب وصعب... ولكن كل حاجة بتيجي بالتمرين... والكام يوم اللي جايين ممكن يكونوا فرصة حلوة للتأمل، يمكن جلسة التأمل تقلب بعادة مفيدة مريحة للجسم والعقل.

1 - مبدأيًا اختر لك ركن بعيد وهادي في المكان اللي أنت متواجد فيه وحاول تلبس حاجة خفيفة مريحة –وعلى فكرة مش شرط تكون "مستربع على الأرض"- ممكن تقعد على كرسي... بس برضه ما نلاقيكش نايم بعد دقيقتين، واسند كفوفك على ركبك.

 

2 - شد نفس عمييييق... خرجه واحتفظ بضهرك مفرود على قد ما تقدر. علشان عارفين أن موضوع الضهر المفرود ده معقد حبتين –إحنا نفسنا ضهرنا انحنى من القعدة على المكتب- ممكن تسند ضهرك على حائط أو ضهر الكرسي أو حتى الكنبة اللي قاعد عليها.

 

3 - غمض عينيك وحاول تنظم نفسك.

 

4 - اختار لنفسك "مانترا". عارفين أن اللي إحنا هنطلبه منك ممكن يبقى مضحك وغريب ومبتذل حبتين بس اسمع مننا، المانترا دي هتكون عبارة عن كلمة تكررها في سرك طول جلسة التأمل؛ يعني ممكن مثلًا كلمة "سلام" تكررها لنفسك أو لو تعرف ممكن تتخيل أنك بتسمعها. طبيعي جدًا أنك بعد شوية تلاقي نفسك سرحت في مشاكلك وحياتك... عادي جدًا، أول ما تلاقي فكرك شريد، لف وارجع ثاني للكلمة من جديد.

 

5 - بعد 20 أو 30 دقيقة، وقف تكرار الكلمة اللي اختارتها وخليك على نفس وضعك. لو أنت حاسس أن الوقت ده طويل، ما تزهقش نفسك وحاول على قد ما تقدر أنك تعود نفسك عليه بالتمرين. ولو عايز تحسب لنفسك الوقت، ممكن تخلي موبايلك يحسب لك الوقت –راعي أن يكون صوته هادي- أو استخدم تطبيق من التطبيقات اللي معمولة مخصوص لحساب الوقت في التأمل زي التطبيق المجاني الأشهر Insight Timer: Meditation Timer.

 

وفي النهاية حاول أنك تكرر جلسات التأمل، وزي ما بيقول مدربي اليوجا دانيل سكوت ووندي كورييفا –اللي كانوا مصادرنا للخطوات الموجودة في المقال ده- أفضل وقت لممارسة جلسات التأمل هو يا بداية يا نهاية النهار، وطبعًا بصفة يومية.

 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
07/07/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.