إزاي تستخدم خدمة الإنترنت المجاني من تي إي داتا؟ - الحياة في كايرو Feature - كايرو 360
 







إزاي تستخدم خدمة الإنترنت المجاني من تي إي داتا؟
إزاي تستخدم خدمة الإنترنت المجاني من تي إي داتا؟
اصدرت في: 11/07/2016

في أحد اللقاءات التنموية كان بيحاضر فيه واحد من أشهر الوجوه الإعلامية الشبابية في مصر سأله واحد من الحضور: أنت كلمتنا كتير عن ضرورة تلبية احتياجاتنا كبشر، بس إحنا لسه ماعرفناش منك إيه هي الاحتياجات دي؟ فكان رد الضيف كالآتي: اليومين دول احتياجات البشر ما عادتش بس احتياجات بيولوجية من أكل وشرب وهوا، الإنترنت كمان بقى احتياج رئيسي للحياة كآدمي!

ودي حقيقة أدركتها كل الشعوب المتقدمة وبدأت تشتغل بناءً على الإدراك ده، ده لأنه الوصول بشبكة الإنترنت دلوقتي أصبح يعني ضمان مفتوح للمعرفة، عايز تعرف عن أي حاجة في أي وقت ممكن تعمل كده بمنتهى السهولة. فقط في حالة أنك متصل بالإنترنت، والموضوع دلوقتي كمان مابقاش متوقف على المعرفة طويلة المدى، لأ حتى الخدمات العاجلة بقى ممكن تعملها من خلال الإنترنت، زي أنك تطلب أكل أو حتى وسيلة مواصلات!

واضح أن القائمين على شركة "تي إي داتا" أدركوا الحقيقة دي بشكل ما، فقرروا أنهم يغطوا أكبر قدر ممكن من الأماكن في القاهرة بخدمة الإنترنت المجاني "TE Wifi". الخدمة اللي كانت مقتصرة على بعض الكافيهات الكبرى نسبيًا أو المؤسسات الثقافية والفنية الكبيرة زي ساقية الصاوي وغيرها. دلوقتي هتبقى متاحة بشكل أكبر وفي أماكن أكتر، علشان تبقى ضامن دايمًا أنك تفضل قادر تتصل بالإنترنت أي وقت وفي أي مكان وبالتالي تبقى دايمًا كل الخدمات اللي بتعملها عن طريق الإنترنت تفضل متاحة ليك.

طيب إزاي هتقدر تستخدم الخدمة؟ وهتعرف منين الأماكن الموجودة فيها؟
فكرة أنك تعرف الأماكن الموجودة فيها دي هتوفرها لك الشركة بنفسها، عن طريق يفط أو علامات في أماكن تواجد الخدمة تقول لك أن الخدمة موجودة في المكان ده. أما عن طريقة استخدامها فالموضوع بسيط برضه ولو مشيت على التعليمات اللي بتظهر لك على الشاشة وقت الاستخدام هتقدر توصل بسهولة، بس خلينا برضه نقول لك القصة في خطوات احتياطًا يعني لحسن تتوه:
- هتفتح الواي فاي على موبايلك أو اللابتوب اللي هتستخدم من خلاله الخدمة.
- هتختار اسم الشبكة اللي هيكون دايمًا "TE Wifi"، وتختار الاتصال بيها.
- تفتح أي براوزر (متصفح إنترنت) من عندك سواء جوجل كروم أو فاير فوكس أو غيرهم، هتلاقيه طلب منك تدخل رقم تليفونك.
- دخل رقم تليفونك ودوس connect أو اتصال.. واستنى شوية، هتوصل لك بعدها بثواني رسالة على موبايلك فيها رقم التفعيل أو التشغيل.
- خد الرقم اللي وصل لك في الرسالة ودخله في مكانه على البراوزر (متصفح الإنترنت) اللي أنت فاتحه، ودوس log in أو تسجيل الدخول.
- بس كده تمام، هتلاقيك اتصلت بالشبكة والنت هيشتغل عندك، وفي حال أنك عملت save للشبكة دي عندك فخلاص الجهاز بتاعك هيبقى يتصل بيها أوتوماتيك كل ما تكون في النطاق بتاعها وفاتح الواي فاي.
- خد بالك بس أنه أحيانًا كود التفعيل بيتأخر إرساله فلو ما وصلش ممكن تطلب إعادة إرساله علشان يوصل.. بس ماتستعجلش أوي لأنه بيكون عندك تلات محاولات بحد أقصى لطلب إرساله.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر مسعد
حرر بواسطة:
عمر مسعد
تاريخ النشر:
11/07/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟