5 حاجات ممكن تعملهم في البيت غير أنك تقضيها أنتخة وبس! - الحياة في كايرو Feature - كايرو 360
 







5 حاجات ممكن تعملهم في البيت غير أنك تقضيها أنتخة وبس!
5 حاجات ممكن تعملهم في البيت غير أنك تقضيها أنتخة وبس!
اصدرت في: 21/07/2016

لو حد من صحابك سألك أنت فين وقلت له في البيت على طول هتترسم في دماغه صورة ليك وأنت ممدد على السرير بالبيجاما وباصص للسقف وأقصى نشاط بتمارسه هو طرقعة صوابعك من وقت للتاني علشان تطمن اللي حواليك بس أنك لسه حي ترزق، أو تكتكات صباع إيدك اليمين الكبير على ريموت التليفيزيون كل شوية رغم أنك مش باصص له أساسًا.
مرحلة الـ "ولا حاجة" اللي بنعدي بيها كلنا، وفي الواقع مش دايمًا بنعمل كده علشان إحنا عايزين نعمل كده أو مبسوطين بيه، كتير بنعمل كده علشان فعلًا القعدة مملة، ومش لاقيين حاجة نعملها -باستثناء الأنتخة طبعًا بالصورة المذكورة- لما بنكون في البيت!

فإحنا هنا هنقول لك على كام حاجة ممكن تعملهم يخلوا قعدتك في البيت ممتعة مش مملة، ومفيدة في نفس الوقت، سيبك من تكتكات الريموت وركز معانا شوية بس.



1- افتح صالة جيم!

مشاغل الحياة بتاخدنا من نفسنا للدرجة اللي تخلينا نبطّل نهتم بأهم حاجة في دنيتنا.. صحتنا! وخلينا نكون واقعيين، طول ما الحاجة مش قدام عينك وفي المتناول هيبقى الكسل سهل وقريب وحتى لو بدأت هتلاقيك ماشي على سطر وسايب عشرة. طب ما تيجي نجرب نسهل الدنيا على نفسنا شوية وهتلاقي معدل نشاطنا واهتمامنا زاد. الموضوع بسيط، أسطوانة عُقلة تعلقها في أي حتة مناسبة، وجوزين وللا تلاتة دامبلز، وبس.. وتابع بقى أي برنامج لحد متخصص في التمارين هيقول لك على تمارين لكل عضلات جسمك تقدر تعملها بالحاجات دي وبس. كده بقت قعدة البيت فرصة جيدة لممارسة الرياضة اللي إحنا في الغالب بنكون مهملين ممارستها معظم الوقت.

 

2- افتتح قصرك الثقافي الخاص!
العمر بيجري والمعارف بتزيد، واللي كان عارف النهارده كلمتين مهمين، بكرة الكلمتين دول هيبقى مالهومش أي قيمة، وهيبقى الواحد محتاج يعرف كلمتين غيرهم علشان يفضل دايمًا يعرف حاجة عليها القيمة. لكن برضه نرجع ونقول أن حقيقة زي دي بتتوه عننا وسط زحمة المشاغل، وبننسى نركز أننا نزود معارفنا باستمرار. قعدة البيت فرصة جيدة جدًا للقراءة والاطلاع، اعمل لك مكتبة صغيرة واملاها واحدة واحدة بالكتب اللي بتحبها، واقرأ كل اما تلاقي فرصة للقراءة..

هتستفيد، وهتنبسط.


3- سينما على كيفك!
بالمناسبة الثقافة ماعادتش مقتصرة على المقروء وبس، في كمان الثقافة المسموعة والثقافة المرئية، الأغاني اللي مزيكتها نضيفة وكلماتها حلوة دي بتضيف لرصيد معارفك، والفيلم اللي رسالته نبيلة وقصته ممتعة كمان بيضيف لرصيد معارفك. ممكن تجيب بروجكتور، وتفضي حيطة مناسبة، وتجيب سبيكرز صوتهم كويس، وتقلب الموضوع سينما خاصة عندك في البيت. بس ابقى انزل هات الفشار بنفسك ماتطلبوش ديليفري.. اشطة؟

4- ادخل المطبخ.. ياجمالو يا جمالو!
أظن أننا فايتانا متعة كبيرة جدًا علشان مابنعرفش نقف في المطبخ ونعمل لنفسنا أكلة بنحبها.. جرب تتعلم في نفسك كده من وقت للتاني هتلاقي الموضوع سهل وممتع، وآهو ياسيدي تبقى صنعة في جيبك لوقت عوزة.. ماحدش عارف المستقبل وست بيته مخبيين له إيه!



5- احكي قصة حياتك.. لنفسك!
كتير أوي بننبهر بالأفكار والمشاعر اللي بنقرأها في الكتب والروايات وبنقعد نفكر أد إيه الفكرة دي عظيمة وأد إيه الشعور ده النبيل و .. و .. رغم أن الحاجات دي ممكن تكون بين إيدينا عدت علينا أو عدينا عليها! بس كل الفرق أن الكاتب فرغ نفسه لكتابتها، وإحنا لأ.. وبنفضل ندور في كلام غيرنا على وصف للحاجات اللي جوانا رغم أننا لو ركزنا ممكن نلاقي بنفسنا الوصف اللي يعرفنا بنفوسنا ويقربنا من فهم طبيعتها.. جرب كده في قعدتك في بيتك تمسك ورقة وقلم وتكتب خواطرك الشخصية والمواقف اللي أثرت فيك وتعاملك معاها كان إزاي! المذكرات الشخصية دي ممكن تكون هي سبيل تسليتك الوحيد في أوقات الضعف واليأس، لأنك هتشوف قد إيه حياتك كان فيها نقط منورة وأنت كنت جزء منها، أو نقط ضلمة وأنت عديتها.. بس أوعى الحبكة الدرامية توسع منك لحسن الموضوع يقلب كوميديا.. ولا أقولك.. ما يقلب يا عم، هيجرى إيه يعني!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر مسعد
حرر بواسطة:
عمر مسعد
تاريخ النشر:
21/07/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟