كل اللي محتاج تعرفه عن الخط الجديد لمترو الأنفاق - الحياة في كايرو Feature - كايرو 360
 







كل اللي محتاج تعرفه عن الخط الجديد لمترو الأنفاق
كل اللي محتاج تعرفه عن الخط الجديد لمترو الأنفاق
اصدرت في: 26/07/2016

"زحمة يا كايرو زحمة، زحمة وتاهو الحبايب.." .. على الله بس ربنا يكرم كده والدنيا تروق والحبايب مايفضلوش طول العمر تايهين، علشان نلحق نعيش لنا يومين مبسوطين.. ولا إيه؟

والله يا عمّنا كله على الله فعلًا.. لكن خلينا نقول أنه من ساعة ما عرفنا عن موضوع خط المترو الرابع وإحنا كلنا أملنا زاد أن الحل هيكون قريب بإذن الله، وأنه هييجي الوقت اللي نشوف فيه شوارع القاهرة رايقة والحركة المرورية فيها سلسة ومن غير أزمات.. محتاجين بس نطمئن أكتر بمعرفة شوية تفاصيل كده عن المشروع علشان نعرف الدنيا واقفة فين وهتمشي إزاي وهتخلص إمتى، علشان برضه نبقى مستنيين على نور يعني!

طيب يا سيدي.. ركز معانا شويتين كده وهنقولك على كل المعلومات اللي محتاج تعرفها عن الخط الجديد بالتفصيل.. يللا بينا.



إيه شكل الخط وإيه الأماكن اللي هيعدي عليها؟
الخط هيبدأ من على حدود مدينة 6 أكتوبر بالقرب من مدينة الإنتاج الإعلامي وهيمشي في اتجاه حدائق الأهرام وبعدين هيعدي على المتحف المصري الكبير ثم ميدان الرماية ثم ياخد شارع الهرم بطوله لحد ما يتقاطع مع خط المترو الثاني (خط المنيب : شبرا) في محطة الجيزة.. وبعدين يكمل سكته لحد ما يتقاطع مع خط المترو الأول (خط حلوان : المرج) في محطة الملك الصالح، ويستمر لحد ما تنتهي المرحلة الأولى منه بمحطة "الفسطاط" بالقرب من منطقة مصر القديمة.. وخط السير المذكور ده هيكون للمرحلة الأولى فقط، على أن تكون المرحلة الثانية للمشروع في وقت لاحق باستمرار امتداد الخط من محطة الفسطاط مرورًا بالقاهرة الإسلامية ثم مدينة نصر وصولًا إلى القاهرة الجديدة.


طب و ده مش هيعمل أزمة كبيرة في فترة العمل والإنشاء؟
المفروض أنه في منطقة زحمة أصلًا زي الهرم وفيصل والجيزة أي تعطيل من أي نوع لأحد الطرق هيسبب شلل مروري تام للطرق الباقية، وبالتالي فالتخوف من حصول أزمة في وقت الشغل على خط المترو الجديد هو تخوف واقعي جدًا ومبرر.. لكن محافظ الجيزة أعلن عن تجهيز شبكة طرق بديلة للتخفيف من حدة الأزمة أثناء فترة العمل، وبدأنا بالفعل الفترة دي نشوف إجراءات التهيئة اللي بتحصل في شارع فيصل عن طريق إقصاء الباعة الجائلين عن الأطراف والتقليل من حجم الرصيف الفاصل بين الاتجاهين في وسط الشارع وإعادة إنارة الطريق بشكل جيد، وهكذا.. لكن خلينا نقول أن تجهيز شبكة الطرق البديلة هيعتمد بشكل أكبر على سلوك الناس في الاتجاه ليها والمشي في المسارات المحددة، ولو ده ماحصلش هتفضل المشكلة قائمة لأن المسارات هتتداخل وده هيخلي الدنيا ماتمشيش بشكل جيد.

طيب إيه اللي تم لحد دلوقتي؟
بحسب المذكور على موقع الهيئة المصرية للأنفاق؛ كل الدراسات الخاصة بالمشروع تم الانتهاء منها، والفترة الحالية دي هي فترة التجهيز الميداني للمشروع قبل بدايته، نقل المعدات وتهيئة الطرق البديلة ورفع بيانات مناطق العمل والبدء في إعدادها وجدولة مراحل العمل.. لمسات الإعداد النهائية يعني قبل الشروع في التنفيذ.

إيه المشاكل اللي مستنيين حلها بعد إطلاق المشروع؟
المفروض أنه إطلاق المشروع ده يساهم في حل أكتر من مشكلة، على رأسهم مشكلة ازدحام منطقة الجيزة وشارع الهرم وفيصل، بالإضافة إلى أنه هيقوم بربط المناطق النائية اللي بدأت تبقى مناطق كثافة سكانية مش قليلة زي أكتوبر والقاهرة الجديدة بمناطق الكثافة السكانية العالية والمؤسسات والمنشآت الحيوية في قلب العاصمة، وتسهيل التردد (توفير وقت ومجهود) على المناطق البعيدة دي.

وعلشان تبقوا متابعين الدنيا أول بأول ممكن تتابعوا صفحة "الخط الرابع لمترو الأنفاق" على فيسبوك، وتعرفوا باستمرار الدنيا وصلت لفين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر مسعد
حرر بواسطة:
عمر مسعد
تاريخ النشر:
26/07/2016
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟